¹ Aran ma ciya ay dondonkoyan, sanda mate kan ay mo go Almasihu wane. ² Sohon ay g'aran saabu, kan aran fongu nd'ay hay kulu ra. Aran go ga dondonandiyaney yaari mo. mate kan cine ay n'i ci aran se. ³ Amma ay ga ba aran ma faham nda woone: alboro kulu bono ga ti Almasihu, wayboro mo a bono ga ti alboro, Almasihu mo a bono ga ti Irikoy. ⁴ Alboro kulu kan go ga adduwa te, wala a go ga annabitary te, d'a bono go daabante,a go ga nga koyo kaynandi. ⁵ Amma wayboro kulu kan go ga adduwa te, wala a go ga annabitaray te, d'a bono si daabante, nga mo go ga nga koyo kaynandi, zama a ga saba nda wayboro kan na nga bono cabu. ⁶ Zama da wayboro si nga bono daabu, a ma nga bon hamno dumbu mo. Amma da haawi hari no wayboro se a ma nga bon hamno dumbu, wala a m'a cabu, kala a ma nga bono daabu. ⁷ Zama alboro ma na hima ka nga bono daabu, za kan nga wo Irikoy alhaalo no, Irikoy darza mo no. Amma wayboro ga ti alboro darza. ⁸ Zama i mana alboro kaa wayboro gaa, amma wayboro no i ka alboro gaa. ⁹ Woodin banda i mana alboro taka wayboro sabbay se, amma day wayboro no i taka alboro sabbay se. ¹⁰ Woodin sabbay se da malaykey sabbay se mo, a ga hima wayboro ma bara nda dabaro kan cire a go seeda nga bono gaa. ¹¹ Kulu nda yaadin, Rabbi do wayboro si bara alboro baa si, alboro mo si bara nda wayboro baa si. ¹² Zama mate kan cine i na wayboro kaa alboro gaa, yaadin mo no i ga alboro hay wayboro do, woone yan kulu mo Irikoy do no i fun. ¹³ Aran ma sanno dumbu aran bon se hala a ga hima wayboro kan mana bono daabu ma adduwa te Irikoy gaa? ¹⁴ Manti adam-ize alhaalo bumbo g'aran dondonandi kan, da alboro bon hamno ga ku,woodin haawi hari no a se? ¹⁵ Amma da wayboro gonda bon hamni kuuku, a darza hari no. Zama Irikoy na bon hamni no a se, a ma ciya a daabuyan hari. ¹⁶ Amma, da boro fo ga ba nga ma kakaw woodin bon, iri nda Irikoy margey wo sinda alaada kan waani woodin. ¹⁷ Amma lordo kan ay g'aran no ra, zama mate aran ma hanse se no,amma hasaraw se no aran go ga margu. ¹⁸ Sintina day ay ma fay-fayan go aran game ra waati kan aran ga margu Almasihu marga ra. Ay ga jara cimandi mo. ¹⁹ Zama haciika a ga tilas no wurdi waani-waani ma bara aran game ra, hala borey kan yangonda cimi aran game ra ma bangay. ²⁰ Yaadin gaa, waati kan aran ga margu nangu follon, manti Rabbi gwaaro no aran go ga gwa. ²¹ Zama gwaaro do boro kulum ga cahaka nga wano gwa.Boro ga ma haray, afo mo gaa han ka bugu. ²² Mate no aran sinda fuyan kan ra aran ga gwa ka han no? Wala aran go ga donda Irikoy marga ka borey kan gaa janay go haawandi? ifo no ay ga ne aran se? Y'aran saabu nda woone? Ay si. ²³ Zama Rabbi do no ay du woone kan ay n'aran no, kan gati: ciino kan ra i na Rabbi Yesu nooyandi, a na buuru sambu. ²⁴ Waato kan a sabu, a banda a n'a ceeri-ceeri ka ne:((woone ga ti bay gaahamo kan i go ga pati aran sabbay se. Aran ma woone te ga fongu nd'ay. ²⁵ Yaadin mo no a na gaasiya sambu hawra banda ka ne: gaasiyo ga ti alkaali tajo ay kuro ra. Alwaati kulu kan aran goono g'a han, aran ma woone te ga fongu nd'ay.)) ²⁶ Zama alwaati kulu kan aran ga buuro wo gwa, ka gaasiya wo han mo, aran go ga Rabbi buuyano waazu no hal a ga kaa. ²⁷ Boro kulu mo kan ga Rabbi buuro gwa wala, a g'a gaasiya han da fondo kan mana hima nd'a, bora din gonda taali Rabbi gaahamo d'a kuro do. ²⁸ Kala boro kulu ma nga bon neesi, woodin banda a ma gwa buuro gaa ka han gaasiya gaa. ²⁹ Zama boro kan go ga gwa ka han, d'a si Rabbi gaahamo fayyanka,c iiti no a go ga candi nga bon gaa, gwayano da hanyano din do. ³⁰ Woodin sabbay se no, aran game ra boro boobo te londibuunoyan, i jante, iboobo mo kani. ³¹ Amma d'iri g'iri bon neesi, don Rabbi si ciiti nd'iri. ³² Waato kan Rabbi g'iri ciiti binde, a go g'iri gooji no, zama nga ma s'iri zeeri ndunnya banda. ³³ Yaadin gaa, ay nya-izey, waati kan cine aran ga margu zama aran ma gwa se, kal aran ma care batu. ³⁴ Da boro fo haray, a ma gwa za fu, zama aran marguyano ma ciya ciiti daliili. sanney kan cindi, ay g'i hanse waati kan ay ga kaa.