¹ Son day, hayey din kan aran hantum ay se ciine ra, ngey neeya: ² A ga boori alboro se ama si lamba wayboro gaa. Amma, zama i masi zina, wa nan alboro kulu ma bara nda nga bon wande, wayboro kulu mo ma bara nda nga bon kurnye. ³ Kurnye ma nga wandeno han kan hagu a se, wande mo yaadin nga kurnye se. ⁴ wando sinda nga bon gaahamo dabari, kala day kurnyo. Yaadin mo no kurnyo sinda nga bon gaahamo dabari kala day wando. ⁵ Aran ma si wangu care se, kala day d'aran yadda aran mate alwaatiyan zama aran ma du ga mo ye addua gaa. Amma woodin banda aran ma ye ka margu, hala saytan ma si aran si zama aran jan bon hiniyan. ⁶ Amma woodin ay goono ga ci no yadda bon, manti lordi bon no. Kulu nda yaadin ay diyano gaa a ga bisa boro kulu ma bara sanda ay cine. ⁷ Amma boro kulu gonda nga bon nooyan kan Irikoy n'a no. Boro fo woone cine, boro fo mo yaadin cine. ⁸ Amma borey kan sinda wande nda wayborey kan kurnye bu se, ay ga ne woone: a ga bori i se d'i ga goro sanda ay cine. ⁹ Amma d'i si du ka hin ngey bon, kala i ma hiiji, zama i ma hiiji ga bisa i ma ton. ¹⁰ Amma borey kan hiijay ra se ay ga lordi no, manti ay bon wane no bo, amma Rabbi wane no. ¹¹ Wande ma si nga kurnye fay. (Amma d'a fay, a ma goro yaadin, kurnye si, wala a ma ye ka saba nda nga kurnyo.) ¹² Amma cindey se ay no go ga salan, manti Rabbi no. Ay ne da Almasihu ganako fo go no kan wando mana cimandi, wando mo yadda nga ma goro a banda, ganakwa ma s'a fay. ¹³ Zama kurnye kan mana cimandi, a hanan wando do, wande mo kan mana cimandi, a hanan kurnye kan ga ti ganakwa do. ¹⁴ Da manti yaadin no don aran izey si hanan. Amma sohon hananteyan no. ¹⁵ Amma nda boro kan mana cimandi ga nga bon fay, a ma nga bon fay. Ganako alboro wala wayboro kan go yaadin si tamtaray ra. ¹⁶ Amma Irikoy n'aran ce aran ma goro nda laakal kanay. Zama nin wande, mate ni ga te ka bay hala nin no ga ni kurnyo faaba? Ni mo kurnye, mate ni gate ka bay hala nin no ga ni wando faaba? ¹⁷ Kala day boro kulu ma nga goray te mate kan Rabbi n'a no, mate a go d'a waato kan Irikoy n'a ce. ¹⁸ Yaadin no ay go ga lordi ka ne Almasihu margey kulu ra. Irikoy na boro fo ce kan jin ka du dambanguyan no? A ma si dambanguyano kaa. Irikoy na afo mo ce kan mana dambangu no? ¹⁹ A ma s'a ceeci. Dambanguyan manti hay fo no, dambanguyan-janay mo manti hay fo no, amma day Irikoy lordey ganayan no ga ti hay kulu. ²⁰ Goray kan ra Irikoy na boro ce,boro kulu ma goro yaadin. ²¹ Irikoy na ni ce waato kan ni go bannya no? woodin ma si ni kankam. Amma da ni gonda daama ka du fansayan, dambe ni ma nafa nd'a. ²² Zama boro kan Rabbi n'a ce, ago bannya, bora din te Rabbi burcini. ²³ Yaadin mo no boro kan Rabbi n'a ce a go burcini, a te Almasihu bannya. Irikoy n'aran day da hay bambata, wa si ciya adam-izey se bannyan. ²⁴ Ay nya-izey, boro kulu ma goro Irikoy banda mate kan a go waato kan Irikoy n'a ce. ²⁵ Wandiyey ciine ra binde,ay sinda lordi kan fu Rabbi do. Amma ay g'ay diyaney no, sanda boro kan ciya nanaykoy Rabbi suujo sabbay se. ²⁶ Ay lasaabuyano gaa,sohon gurzuga sabbey se, a bisa boro se mate kan a go. ²⁷ Ni gonda wande? Ma si ceeci ni m'a fay. Ni na ni wande fay no? To ma si wande ceeci. ²⁸ Amma baa da ni hiiji, ni mana zunubi te. Da wandiyo mo hiiji, a mana zunubi te. Amma borey din ga taabi han ndunnya goray ra. Ay mo ga ba ay m'aran wa taabi. ²⁹ Han kan ay ga ci neeya, nya-izey: alwaati boobo mana cindi. Zama hunkuna banda, baa borey kan yan gonda wande, i ga te danga ngey sinda. ³⁰ Borey kan yan go ga he mo,sanda i si ga he. Borey kan yan go ga farha, sanda i si ga farha. Daykoy mo, sanda boroyan kan sinda hay kulu. ³¹ Borey kan yan go ga goy nda ndunnya harey mo, i ga te sanda ngey na saalay kaa i gaa. Zama ndunnya wo alhaalo go ga bisa. ³² Amma ay ga ba aran ma si goro nda karha. Boro kan si hiijay ra ga laakal da Rabbi muraadey, mate kan a ga te ka kaanu Rabbi se. ³³ Amma boro kan go hiijay ra ga laakal nda ndunnya muraadey, mate a ga te ka kaan nga wando se, a laakalo ciya fayante mo. ³⁴ Wayboro kan sinda kurnye nda wandiyo mo ga laakal nda Rabbi muraadey,hal ngey ma goro ihanno gaaham nda biya ra. Amma wayboro kan hiiji ga laakal nda ndunnya muraadey, mate kan a ga te ka kaan nga kurnyo se. ³⁶ Amma da boro fo di kan a mana hagu nga ize wandiya ma bisa hiijay alwaato gaa,d'a ga miila nga m'a hiijandi, a ma te han kan a ga ba,a mana zunubi te. Wa nan i ma hiiji. ³⁷ Amma boro kan na sanka sambu nga bina saaware gaa,woodin mana tilas a gaa,amma a gonda dabari nga bumbo miila bon,a jin ka suuban mo nga bina ra kan nga ize wandiya si hiiji, bora din te han kan ga boori. ³⁸ Yaadin mo no boro kan na nga ize wandiya hiijandi te ihanno, amma bora kan man'a hiijandi bis'a. ³⁹ Hiijay ga wande haw hala nga kurnyo fundo me, amma da kurnyo bu, hiija n'a tan,a ma hiiji nda boro kan a ga ba, kala day Rabbi ra. ⁴⁰ Amma, ay diyano gaa,a ga farha ka bisa d'a goro yaadin. Ay ga tammaha mo ay gonda Irikoy biya.