¹ Aran game ra, da boro fo na boro fo kalima, a ga yaaru ka koy ciitikoy kan si Irikoy cimo gana do no, i ma ciiti dumbu i se? ² Manti hanantey do no aran ga hima ka koy? Wala aran ma na bay kan hanantey no ga ndunnya ciiti? ³ D'aran no ga ndunnya ciiti binde, aran ma na to nan kan aran ga sanni kayney ciiti? Aran ma na bay kan iri no ga malaykey ciiti, sanku fa zamana wo harey? ⁴ Yaadin gaa, d'aran gonda zamana wo ciiti harey, aran ga boroyan dan i ma ciiti, kan yan manti hay kulu Almasihu marga ra no? ⁵ Ay go ga woodin ci zama aran ma haaw! Haba? Sohon aran ga jan laakalkooni follon aran game ra kan ga waani ka nya-izey da care sanni feeri? ⁶ Amma sohon nya-ize fo ga ga konda nga nya-izo ciito do. A go ga woodin te mo ciitikoy kan manti Almasihu ganakoy jine! ⁷ Haciika, ba sohon woone te mursay hari aran da care game ra, za kan aran konda care ciiti do. Manti a ga bisa aran ma yadda nda toonye bo? Manti a ga bisa i m'aran kom? ⁸ Amma aran bumbey nobgoono ga toonye, aran goono ga kom mo,hal aran nya-izey gaa. ⁹ Wala aran mana bay kan bora kan sinda adilitaray si Irikoy koytara tubu no? wa s'aran bon darandi! Boro ziibey, wala tooru ganakoy,wala zina-teerey, wala aru-ci-way, wala aru-baay, ¹⁰ wala zayey, wala binikomey, wala baji-han-ka-bugukoy, wala wowkoy, wala komkoy, ikulu si Irikoy koytara tubu. ¹¹ Aran ra afoyan, yaadin no aran goro don. Amma Irikoy n'aran nyumay, a n'aran hanandi, a n'aran adilandi Rabbi Yesu Almsihu maa ra d'iri Irikoyo biya do mo. ¹² Hay kulu ga halal ay se, day manti hay kulu no ga hagu ay se. Hay kulu ga halal ay se, amma ay si yadda hay kulu m'ay dabari. ¹³ Gwaari ya gunde wane no, gunde mo go gwaari se, amma Irikoy ga ihinka kulu halaci. Amma i mana gaaham te zina se, amma day Rabbi se. Rabbi mo go gaaham se. ¹⁴ Irikoy na Rabbi tunandi ka kaa buuyan ra nga dabaro do, a g'iri mo tunandi. ¹⁵ Wala aran mana bay kan aran gaahamey ya Almasihu gaahamo jareyan no? Ay ma Almasihu gaahamo jara sambu k'a ciya kaaruwa gaaham jare no? Abada! ¹⁶ Wala aran mana bay kan boro kan margu nda kaaruwa, a te gaaham follon nga nd'a? Zama a ne: ((I boro hinka ga ciya gaaham follon)). ¹⁷ Amma boro kan margu nda Rabbi, a te biya follon nga nda. ¹⁹ Wala aran mana bay kan aran gaahamey ga ti biya hanna fuwo? Nga no go aran ra, Irikoy do mo no aran du a. ²⁰ Aran manti aran bumbey wane yan mo no zama Irikoy n'aran day da hay bambata. Yaadin gaa aran ma Irikoy beerandi aran gaahamey ra.