¹ I go g'aran baaru dede kan ziina go aran game ra. Zina woone dumi i s'a gar badumi cindey game ra, hal aran boro fo gonda nga baaba wande. ² Aran te bonbeerey mo! Aran ma na tebine saray. hala bora din kan na woodin te aran m'a kaa aran game ra. ³ Zama haciika ay wo, baa kan ay si noodin gahamo ra, kulu nda yaadin ay go aran do biya ra. ⁴ Ay jin ka ciiti mo bora kan na goyo din te se, danga day ay go noodin no. D'aran margu ay biya mo go aran banda, d'iri Rabbi Yesu dabaro mo. ⁵ Rabbi Yesu maa ra aran ma boro wo dumi dan saytan kambe ra a gahamo halaciyan se, hal a biya ma du faaba Rabbi zaaro ra. ⁶ Aran fooma wo si boori! Aran mana bay kan dalbu kayna no ga motta kulu fuurandi? ⁷ Aran ma dalbu zeena kaa,hal aran ma bara motto taji, kan sinda dalbu, mate kan aran go nda cimi. Zama Irikoy n'iri paska feejo, kan ga ti Almasihu, sarga iri se. ⁸ Yaadin gaa iri m'iri bato te, manti nda dalbu zeena, wala nda zamba nda lala wane bo, amma iri m'a te da buuru kan sinda dalbu, ihanno nda cimi wane. ⁹ Tira fo ra ay hantum aran se ka ne aran ma si hangasinay da zina-teerey. ¹⁰ Ay si ndunnya ganako zina-teerey gaa, wala binikomey, wala komkey, wala tooru ganakoy, zama nda yaadin no, a ga tilas aran ma fun ndunnya ra. ¹¹ Amma sohon ay go ga hantum aran se ka ne aran ma si hangasinay da boro fo kan i ga ne a se nya-ize, da bora din ya zina-teeri no, wala binikom, wala tooru ganako, wala wowko, wala baji-han-ka-buguko, wala komko. Aran ma si baa gwa da bora din koy. ¹² wala ay muraadu no ay ma ciiti borey kan yan go taray se? Manti aran Almasihu marga borey no gaa care ciiti bo? ¹³ Amma ngey kan yan go taray, Irikoy g'i ciiti. Aran ma boro laala din kaa aran game ra.