¹ Ay mo ay nia-izey, ay si du ga salan aran se danga boroyan kan ga Irikoy biya gana, amma day danga boroyan kan go bine ibaay laaley banda, danga boroyan kan go attaciriyan Almasihu ra nooya. ² Ay n'aran no wa aran ma han, manti gnaari tino bo, zama waato aran mana hin a. oho, hala hon mo aran si hin a, ³ zama baa sohon aran go bine ibaay laaley banda. Za kan canse nda kusuuma go aran game ra, manti bine ibaay laaley banda no aran go? ⁴ Manti aran go ga dira Adam-ize alhaali ra no? Zama waati kan aran boro fo go ga ne:(( ay ya bulos wane no!)) Afo mo ma ne:((ay wo abolos wane no!)) ⁵ Manti Adam-ize alhaali no aran go ga te? Ifo ga ti Abolos binde? Ifoga ti bulus mo? Goy-teeriyan no kan do aran cimandi, mate kan Rabbi na boro fo kulu no. ⁶ Ay wo duma, Abolos mo na dumaro hanandi,amma Irikoy no ka nan a beeri. ⁷ Yaadin gaa bora kan ga duma wala bora kan ga hanandi manti hay fo no, amma Irikoy no kan ga nan a ma beeri. ⁸ Sohon binde bora kan ga duma nda bora kan ga hanandi, i kulu affolon no, boro kulu mo ga du nga alhako nga goyo bon. ⁹ Zama iri ya Irikoy goykasinyan no, aran mo Irikoy faron nda Irkoy cinaro no. ¹⁰ Ay binde Irikoy gomno bon a n'ay no, ay na daba sinji, mate kan cinako goni kan gonda laakal ga te, amma boro fo go ga cina abon. Amma boro kulu ma haggoy da cinayano kan nga ga cina abon. ¹¹ Zama boro kulu si hin ka daba fo sinji, kan waana wo kan i jin ka sinji, nga kan ti Yesu Almasihu. ¹² Boro kulu kan goono ga cina daba din bon, da wura no, wala nzorfu, wala tondi darzakoy,wala bundu, ¹³ wala subu, wala buunu_ boro kulu goyo ga bangay. Zama zaro din g'a bangandi, za kan denji ra no Irikoy g'a neesi. Danjo bumbo mo ga boro kulu goyo neesi, hala dumi kan no. ¹⁴ Da bora goyo ton, a ga mursu nda, ¹⁵ amma nga bumbo ga du faaba, danga boro kan fun danji ra punti. ¹⁶ Aran mana bay kan aran ya Irkoy fuwo no,Irkoy biya mo go aran ra da goray? ¹⁷ Boro kulu kan na Irkoy fuwo halaci, Irkoy g'a koy halaci, zama Irkoy fuwo ya hanante no,kan ga ti aran. ¹⁸ Boro kulu ma si nga bon halli. Aran game ra boro kulu kan ga tammaha nga te zamana wo laakalkooni, nan a ma bare ka ciya saamo, hala a ma du ka ciya laakalkooni nda cimi. ¹⁹ Zama ndunnya wo laakalo ya saamotaray no Irikoy do, mate kan i n'a hantum ka ne: ((Ay ga laakalkooney di ngey bon hiila ra.)) ²⁰ I na hantum ka ne koyne: ((Rabbi ga laakalkooney miiley bay, kan yaamoyan no.)) ²¹ Yaadin gaa, boro kulu ma si fooma nda boro! Zama hay kulu aran wane no. ²² Da bulos no, wala abolos, wala kefas, wala ndunnya, wala fundi, wala buuyan wala sohon hayey, wala hayey kan go kaa, i kulu aran wane yan no. ²³ A ran mo Almasihu wane yan no, Almasihu mo Irikoy wane no.