¹ Ay mo nya-izey, waato kan ay kaa arasn do,ay mana kaa da sanni gonitaray,wala laakal wane,ka Irikoy seeda waazu aran se. ² Zama ay miila ay ma si hay kulu bay aran game ra kala day Yesu almasihu hinne,nga kan i kanji. ³ Ay goro aran do da londibuunay, da humburkumay, da jijiryan gumo. ⁴ Ay sanno d'ay waazo mo manti nda fahamay sanni waaniyan no kan ga te sigaw, ⁵ amma i te da Biya hanno cebeyano da dabari mo hal aran cimbeero ma si bara boro laakal bon, amma a ma bara Irkoy dabaro. ⁶ Amma iri goono ga laakal salan toonantey game ra, day manti zamana wo laakalo, wala zamana wo koyey wano. Ngey kan yan goono ga bisa. ⁷ Amma iri goono ga Irikoy laakalo salan, gundu wane, sanda wo kan don a go tugante, kan Irikoy waadu iri darza se za waato zamaney mana te. ⁸ Zamana wo koyey kulu mana bay laakalo din gaa, zama d'i bay a gaa don i sin Rabbi darzakoyo kanji. ⁹ Amma a te ma te kan i n'a hantum ka ne: ((hayey kan mo mana di, kan hanga mana maa, kan mana furo boro bine ra mo, hayey din no Irikoy soola borey kan ga bar'a se.)) ¹⁰ Amma iri se no Irikoy n'i bangandi biya hanno do. Zama biya hanno goono ga hay kulu fintal. Baa Irikoy hayey kan ga guusu, a g'i fintal. ¹¹ Zama may no ga boro muradey bay, da manti bora biya kan go a ra? Yaadin mo no, boro kulu si Irikoy muraadey bay, kala day Irikoy biya. ¹² Iri wo manti ndunnya biya no iri du bo,amma biya kan fun Irikoy do, hal iri ma hayey kan Irikoy n'iri no nga gomno do bay. ¹³ Hayey wo iri goono g'i salan, manti nda sanni kan Adam-ize laakal ga boro dondonandi,amma iri goono g'i salan da wo kan biya hanno g'iri dondonandi. Iri goono ga biya hanno harey deedandi nda biya hanna sanney ¹⁴ Amma boro kan ga nga Adam-ize daa laala gana si Irkoy biya harey ta. I ga ciya a se saamotaray. A si hin k'i bay mo, zama biya hanno do no boro g'i fayanka. ¹⁵ Amma boro kan ga Irikoy biya gana ga hay kulu fayanka. Nga bumbo mo, boro kulu s'a fintal. ¹⁶ Zama i ne:((may no na Rabbi miila bay hala bora m'a dondonandi?)) Amma iri wo iri gonda Almasihu miila.