¹ Sohon, nya-izey, ay g'aran fongandi da baaru hanna kan ay waazu aran se, wo kan aran ta, kan ra aran go ga kay mo. ² A do mo no aran go ga du faaba, d'aran go ga sanno kan ay waazu aran se gaay gumo. Da manti aran cimandi fahamay si. ³ Zama ay noaran se haya kan nafa bisa ikulu, kan ay bumbo mo ta. Nga neeya: Almasihu bu iri zunubey sabbay se, sanda mate kan i hantum Irikoy tira hanney ra, ⁴ i na fiji, Irikoy n'a tunandi mo zari hinzanta hane sanda mate kan i hantum Irikoy tira hanney ra. ⁵ A bangay kefas se, waato din gaa taalibi way cinda hinka se. ⁶ woodin banda a bangay nya-ize kan bisa zongo gu saaya follon ra, kan i baayano kulu ga funa hal hon, amma afooyan jin ka kani. ⁷ Waato din gaa a bangay yakuba se, gaa diyey kulu se. ⁸ Ikulu banda gaa, a bangay ay mo se, kan go sanda booma cine. ⁹ Zama ay ya diyey koda no, kan a mana hima baa i ma ne ay se diya, za kan ay na Irikoy marga gurzugandi. ¹⁰ Amma Irikoy gomno do no ay go mate kan ay bara. A gomno mo kan a n'ay no mana goro yaamo, amma ay goy kabisa i kulu. Day manti ay no, amma Irikoy gomno kan go ay banda no. ¹¹ Yaadin gaa, d'ay no wala ngey no, woone no iri go ga waazu, nga mo no aran cimandi. ¹² Amma d'i go ga waazu ka ne Almasihu tun ka fun buukoy game ra, mate no aran boro fooyan ga te ka ne buukoy tunandiyan si no? ¹³ Da buukoy tunandiyan si no, yaadin gaa Almasihu mo mana tun. ¹⁴ Da mo Almasihu mana tun, iri waazuyano ya yaamo no, aran cimbeero mo yaamo no. ¹⁵ Koyne mo i n'iri gar tangari seedakoyan Irikoy bon. Zama iri seeda ka ne irikoy na Almasihu tunandi. Amma da buukoy tunandiyan si no, Irikoy man'a tunandi. ¹⁶ Zama da buukoy tunandiyan si no, yaadin gaa Irikoy mana Almasihu mo tunandi. ¹⁷ Da Irikoy mana Almasihu tunandi, yaadin gaa aran cimbeero ya yaamo no, hal hon mo aran go aranzunubey ra. ¹⁸ Koyne borey kan yan kani Almasihu fonda ra, i halaci. ¹⁹ Diri gonda beeje Almasihu ra fundi wa ra hinne, yaadin gaa iri te bakaraw hari yan ka bisa boro kulu. ²⁰ Amma haciika Irikoy na Almasihu tunandi ka kaa buukoy game ra. ²¹ A te bon-jina borey kan yan go ga kani game ra. Zama za kan boro do no buuyan kaa, boro do mo no buukoy tunandiyan kaa. ²² Zama mate kan Adamu ra boro kulu go ga bu, yaadin mo no Almasihu ra ikulu ga funa. ²³ Amma boro kulu nda nga nango no sasara ra: sintina Almasihu kan ga ti bon-jina, waato din gaa Almasihu waney, alwaati kan a ga kaa. ²⁴ Ga no bananta ga kaa, waati kan Almasihu na koytara ye Baba Irikoy se, saaya kan a jin ka mayray kulu da hin kulu da koytaray kulu tuusu. ²⁵ Zama a ga tilas no Almasihu ma koytary gwaa, hal a ma nga ibarey kulu dan nga cey cire. ²⁶ Ibare bananta kan a ga tuusu mo ga ti buuyan. ²⁷ Zama:((Irikoy na hay kulu dan a cey cire.)) Amma waato kan a ne nga na hay kulu dan acey cire, danga Almasihu wane nooya, a go taray kwaaray kan Irikoy kan n'i dan a mayra ra si a ra. ²⁸ Amma waati kan Irikoy na hay kulu dan Izo mayra ra ka ban, gaa no Izo bumbo ga nga bon ye ganda a se kan na hay kulu dan a mayra ra, halIrikoy ma bara a kulu hay kulu ra. ²⁹ Da manti yaadin no, ifo no borey wo ga te kan se i go ga baptisma te buukoy se? Da buukoy situn da cimi, ifo se no i go ga te boprey din se baptisma buukoy sabbay se? ³⁰ Ifo se mo no iri ga kay kataru ra saaya kulu. ³¹ Haciika, nya-izey, ay go buuyan me gaa han kulu, ay ga woone daahirandi ay farha bon kan ay gonda iri Rabbi Almasihu do aran sabbay se. ³² Da adam-ize miila bon no ay tangam da ganji hamey afasos ra, man ay riiba? Da buukoy si tun kala ((iri ma gwa iri ma han zama suba no iri ga bu!)) ³³ Wa s'aran bon darandi! Hangasinay laalo ga daa hanno halaci. ³⁴ Aran ma laakal ye mate kan a ga hima nd'a gaa, ka fay da zunubi, zama boro fooyan si Irikoy bay. Ay ga woodin ci hala haawi m'aran di. ³⁵ Amma boro fo ga ne: mate no buukoy ga tun d'a? Gaaham woofo dumi mo no i ga kaa d'a? ³⁶ Nin saamo! Han kan ni bumbo ga duma, a si fun bo kala nd'a bu jina. ³⁷ Han kan ni go ga duma mo gurayze koonu no, hambara alkama no, hambara dumi'ze fo no. ³⁸ Amma wo kan ga fun si hima gurayzo kan ni duma. Amma Irikoy g'a no a himando da mate kan nga miila, dumi'ze dumi kulu nda nga bumbo himando. ³⁹ Manti basi kulu mo no ga saba nda care. Zama boro basi go waani, alman wane go waani, curo wane go waani, hamisa wane mo go waani. ⁴⁰ Beene kaarey go no, da ndunnya gaahamey mo, amma beene waney darza go waani, ndunnya waney darza mo go waani. ⁴¹ Wayna gonda nga darza, hando darza go waani, handariyayzey darza go waani. Baa handariyayzey darza mo ga waana nda care. ⁴² Yaadin mo no buukoy tunyano ga te nd'a: i ga duma gaaham fumbi ra, ⁴³ Irikoy g'a tunandi han kan si hin ka fumbu! I ga duma kayna ra, Irikoy g'a tunandi nda darza. I ga duma londibuunay ra, Irikoy g'a tunandi dabarikooni! ⁴⁴ I g'a duma adam-ize gaaham, Irikoy g'a tunandi biya wane. Adam-ize gaaham go no, biya wane mo go no. ⁴⁵ Yaadin no i n'a hantum ka ne:((Alboro sintina, adamu ciya takahari kan gonda fundi.)) Adamu bananta mo ciya biya kan ga fundi no. ⁴⁶ Amma biya wane mana ciya sintina, kala day adam-ize gaaham, woodin banda kala biya wane. ⁴⁷ Irikoy na alboro sintina kaa laabu gaa, laabu no. Boro hinkanta[Rabbi no kan] fun beene. ⁴⁸ Mate kan cine bora kan i te da laabu bara, yaadin no a waney go. Mate kan cine beene bora bara, yaadin no a waney mo go. ⁴⁹ Mate kan cine iri na bora kan i te da laabu hima-cara sambu, yaadin no iri ga beene wano hima-cara mo sambu. ⁵⁰ Koyne ay go ga wone ci, nya-izey: basi nda kuri si hin ka Irikoy koytara tubu, fumbi mo si han kan si hin ka fumbu tubu. ⁵¹ Guna, ay go ga gundu fo ci aran se: m,anti iri kulu no ga kani, amma iri kulu, Irikoy g'iri barmay. ⁵² A ga te fap follon,mo-ka-miyan ra, waati kan hilli bananta ga he. Zama hillo ga he, buukoy ga tun fumbi si, iri mo, Irikoy g'iri barmay. ⁵³ Zama tilas no fumbikoyo ma han ka si hin ka fumbu dan, woone kan ga bu mo, tilas a ma wo kan si hin ka bu dan. ⁵⁴ Waati kan fumbikoyo ga han kan si fumbu dan, waati kan mo woone kan ga bu ga wo kan si hin ka bu dan,waato din no sanno ga kubay kan i hantum ka ne: ⁵⁵ "Zaamayan ra no i na buuyan gon! ya buuyan, man ni zaama? yaa buuyan, man ni naajo?" ⁵⁶ Buuyan naajo ga ti zunubi, zunubi dabaro mo asariya no. ⁵⁷ Amma iri ma Irikoy saabu, nga kan go g'iri no zaama iri Rabbi Almasihu Yesu sabbo ra!