¹ Aran ma anniya haw ka baakasinay di a ma bori. Amma aran ma beeje nda biya hanno nooyaney mo, sanku fa annabitaray teeyan. ² Zama boro kan ga salan da ciine waani, Irikoy se no a go ga salan, manti borey se, za kan boro kulu si faham d'a,day biya hanno do a go ga gunduyan salan. ³ Amma boro kan go ga annabitaray te ga jina-koyyan, da baakaraw, da bine gaababdiyan sanni salan borey se. ⁴ Boro kan go ga salan nda ciine waani, nga bon se no a ga jina-koyyan te, amma boro kan go ga annabitaray, Almsihu marga se no a ga jina-koyyan te. ⁵ Ay ga ba aran boro kulu ma salan nda ciine waani-waani yan, sanku fa anbabitaray teeyan. Zama boro kan go ga annabitaray te, a bisa boro kan go ga salan nda ciine waani-waani yan, da manti a g'a feeri no hala marga ma du ka koy jina. ⁶ Sohon binde nya-izey, d'ay kaa aran do da ciine waani-waani yan,ifo no ay ga hanse aran se, da manti ay ga salan aran se da bangandiyan fo, wala bayray, wala annabitaray, wala dondonandiyan? ⁷ Baa hayey kan sinda fundi kan boro g'i kar, da seese no wala moolo no, d'i s'a jinda fayanka, mate boro ga te ka bay han kan seesa wala moola ga ba ka ci? ⁸ Zama d'i na hilli kar kan jinda mana kay ka boori, mate no boro ga te ka soola wongu se? ⁹ Yaadin mo no aran bumbey, d'aran deeney si sanni kan i ga tara ka faham d'a salan, mate no i ga te ka bay han kan aran goono ga ci? Zama aran goono ga salan hawo ra. ¹⁰ Baa kan jinde waani-waani boobo goono ndunnya ra, i afo kulu si jan han kan ga fahamandi. ¹¹ Amma d'ay si faham da jinda, ay go sanda mebaraw cine bora kan salan se. Nga mo kan go ga salan ga hima ay se mebaraw. ¹² Yaadin gaa aran wo, za kan aran gonda anniya aran ma du biya hanno noyaney, kala aran ma ceeci nda bayyan wo kan yan ga nan Almasihu marga ma koy da jina. ¹³ Wo se no boro kan go ga salan da ciine waani, a ma Irikoy gwaarey hala nga ma du k'a feeri. ¹⁴ Zama d'ay te adduwa ciine waani ra, ay biya go ga salan amma ay fahama mana du albarka. ¹⁵ Mate no? Ay ga adduwa te da biya, ay ga adduwa te da fahamay mo. Ay ga baytu te da biya, ay ga baytu te da fahamay mo. ¹⁶ Da manti yaadin, da ni go ga saabu nda biya, mate no boro kan si waani ga te ka ne((Amin!)), ni saabuyano banda, za kan a si bay han kan no ni go ga ci? ¹⁷ Zama nin wo, daahir ni go ga saabu ihanna dumo, amma bora di mana du jina-koyyan. ¹⁸ Ay ga Irikoy saabu kan ay ga salan da ciini waani-waani yan ka bisa aran kulu. ¹⁹ Kulu nda yaadin,Almasihu marga ra a ga bisa ay se ay ma sann'ize gu ci d'ay fahama, ya du ka cindey dondonandi, ka bisa ay ma sann'ize zambar way te da ciine waani. ²⁰ Nya-izey, fahamay ra aran ma si ciya zankayan. Amma laala do haray aran ma ciya zanka kaynayan, fahamay do haray mo aran ma te albeeriyan. ²¹ Tawreta ra i na hantum kan Rabbi ne: ((Ay ga salan dumo wo se da ciine waani-waaney, da mebarawey meyey, amma kulu yaadin i ga wangu ka maa.)) ²² Yaadin gaa,ciine waani-waaney ga ciya alaama borey kan yan mana cimandi se, manti cimandikoy se. Amma annabitaray ga ciya alaama cimandikoy se, manti borey kan mana cimandi se. ²³ Da Almasihu marga kulu margu care banda, nga no boro kulu ga salan da ciine waani-waani mo, da boro fooyan furo mo kan mana caw, wala kan mana cimandi, manti i ga ne aran follo no? ²⁴ Amma d'aran kulu go ga annabitaray te, nga no boro fo furo mo kan mana cimandi wala kan mana caw, annabitaray sanney kulu g'a zeeri, ikulu g'a neesi, a bina gundey mo ga bangay. ²⁵ Nga mo kal a ma kan ganda birante ka sududu Irikoy se ka seeda kan daahir Irikoy go aran game ra. ²⁶ Yaadin gaa, mate no a ga bara nd'a, nya-izey? Waati kan aran ga margu care banda, boro fo kulu gonda zabura fo, wala dondonandiyan fo, wala ciine waani fo, wala feeri fo. Wa nan hay kulu ma te jina-koyan se. ²⁷ Da boro ga salan da ciine waani, kala ngey boro hinka, wala a ma si bisa ihinza. I ma salan afo-fo, boro fo ma feeri. ²⁸ Amma da sanni feeriko sino, kala bora ma dangay Almasihu marga ra, a ma salan nga bon se da Irikoy se mo. ²⁹ Annabey mo ma salan, ngey boro hinka wala ihinza, cindey mo ma sanney feeri. ³⁰ Amma da boro fo kan go ga goro noodin du bangandiyan, bora kan go ga salan ma dangay. ³¹ Zama aran kulu ga du ka annabitaray te afo-fo, hala boro kulu ma dondon, ikulu ma du yaamaryan mo. ³² Annabi kulu biya mo go nga bumbo dabaro ra, ³³ Zama Irikoy ya manti kosongu wane no, amma laakal kanay wane no. Mate kan a bara hanantey margey kulu ra. ³⁴ Wa nan wayborey ma dangay Almasihu margey ra, zama i mana yadda i se i ma salan, amma i ma ngey bon ye ganda, mate kan cine tawreto ci. ³⁵ D'i ga baa ngey ma du bon-feeray mo, kala i ma ngey kurney han fu, zama haawi hari no wayboro ma salan Almasihu marga ra. ³⁶ Mate no? Aran do no Irikoy sanno fu? Wala aran hinne do no a kaa? ³⁷ Da boro fo ga miila nga ya annabi no, wala boro kan gonda biya hanno nooyan, kal a ma woone bay: hayo kan ay go ga hantum aran se ya Irikoy lordo no. ³⁸ Amma da boro fo baa si nd'a, i ma saalay kaa bora din gaa. ³⁹ Yaadin gaa, ay nya-izey, wa beeje nda annabitaray teeyan, wa si wangu mo borey ma salan da ciine waani-waani yan. ⁴⁰ Amma hay kulu ma te da laakal, i m'a te nga fonda bon mo.