¹ Do Yeso hetonok tong bei donsha Ndeyi, modik tong majirakuni anita "Mallum, moi shida goshaku mamaye 'e ki shida sali wanses 'e!" ² Si anita, "Ko moiko nakshik salik goshaku mamaye 'e? Lei moɗik hawosu an so a ɗeya ka zafto bu so a rugza te eli bum an bu. ³ "Do si ɗeiko ka goshok zaitun so moishe laha ban Ndeyi, Bitrus, Yakubu Yahaya ki Andarawus dolangko Si tong bungko, ⁴ "Amu, woi a hele ta miya "Shida ei miyam moyai na 'ya woi a gonni hele?" ⁵ Yeso some anshensu, " Sa simbotku kada ngo zof nguni riyabu. ⁶ Shei, a nditu tong suno a anata, Nzuni ne 'e, me a zoftik ma ato shei riya. ⁷ Nang kollangko kekesi ki somok kesi, kelungku hinde bu; shida 'ya woi kaba na hala, me boh ernos dongo dinobu. ⁸ Lardi henɗa ka Lardi, mene ke a hinda ka mene. Eli ina didide a be'i shei, ki, kizi. Woi me dongo zala her bone. ⁹ Deya ka bolotku. Nzuni ona ngunik koknoku, me a iku jibo ban shutantu. A moka nguni ana mene ki ma'inshe ki go sunk kika do on sheida kanno. ¹⁰ Eni Ndeyi me kaba na anangkosi lardi shaf. ¹¹ Na ngahangko oanangko nguni, kadang damte ka ei gotku anshe bu. Kika a jajum wom, ei ngu anai a ongkuti; a ina eniy nguni bu, me a inai kelui bu'uno. ¹² Ngo ontik beinoni bo mato, boti ke a ontik lani, milla hinda ka ana le'insu a kunzinsu zob nzuni bo mato. ¹³ Lei ngoi yiya a kuɗnkuk ka suno. Me ngoi na erinni har ka shekeni, ngoi yom a watik wangu. ¹⁴ Na ngu moyangko ei disa ei zinabu a erno be' is subabu (eri a karanta mante), biyai tong Yahudiya gugnasu ka gosho, /v 15 ngoi na a ɓaɓa ka bano kada urtu eli tong banonni, nam ei yo'oto bu. ¹⁶ ngoi na a riya metu tong gyabani nama kareini bu. ¹⁷ Titikuk biyai anan milla ki biyai a onshe yedik koklagu sombodi womi'i. ¹⁸ Donsha Ndeyi kada hele ki huzo bu. ¹⁹ Kika a deyak dadok 'yakjig-yayi, ki ka shida 'ya woi damba hele bu tingki tononni, do Ndeyi iko dunya, har kauso, an bu, ke a sauwidi hele bu. ²⁰ Kaba na Bomu abano kasanta sombodiy 'e, an ngoi a wala bu. Me kika biyai taminsu, mamoyei si zaɓai, kasantitkok sombodiy 'e. ²¹ Na lei ngoi yiya angku ta, 'Moyai, woi Kristi! domana 'Moyai, Womsi!, kadang on jire bu. ²² Kika ana rerei ta nzuni Kristi, ki nabaku ngadar a hetetu a ina'yak monmoni, kika a bo'ite nguni, na gitankoi har ki biyai zabansu. ²³ Deya moino! Ne angkutik mamaye shaf kabui a helai. ²⁴ Mek bei sombodi maito, hoti itito tutudu, tere ona talkuni bu, ²⁵ Jenjaku ngektetuk ɓaɓa, ki geɗos ɓaɓa a ina didide. ²⁶ Nami nzuni a moya La Ngo isno tong keɓe ki geɗo ki nama ka, ²⁷ A sara taktakakuni a daha shafki biyaniy si zaɓa ki lahai mayei hoɗoi, ki boh jeni ki zoni kaba haushi ki bo gudi har bo ernok ɓaɓa. ²⁸ Shuta 'yak zug ro gudbi. Manto na heteno nami zof kumo, ngu manangkoti ta huzo ndinto nem. ²⁹ Ka' a ke'e, nang moyangko 'ya woi a helei, ngu manangkoti inni nem, nem ki bo ɗubano. ³⁰ Jire, Ne anshengku, zaman woi a teke bu kaba 'ei maye na hala. ³¹ ɓaɓak eli gedasu, me enino geɗebu, ³² Mek ka hoti ki jajum wom an ngoi manbu, lei taktakakui tong ɓaɓa, nama Lai 'e, kaba Boti. ³³ Deya ka babilotku! Deyai idangku eheno, ngu donshu kika ngu mananko jajum yo a hele. ³⁴ Kit shida ngoi a gonni marshe: si di'iko banonni sarak ngarakuni deyi ka banos 'e, yiya kek rutani. Si angkok a deita banos a ɗeyi idani eheno. ³⁵ Kika ka'a deya zugongku ramtenoh, kika ngu manangko badis abanoi a metu bano bu, a ɗeya beibuk bozoni, tintil bedi, ɗo gyaja lula, domana ki babadi. ³⁶ Na si ndino wara eni kada boltu nguning monsom bu. ³⁷ Ei ne anshengkui Ne anshek lei ngoi yiya: Moyai!"