¹ Ki bei woi Yeso soma kokranta gyabanaku nakshi ki mimi'i, a anshe somos zei a ka mene Ndeyi. Dirboloi a gemani, ² shafki mondei ma'ato yo ho'oko maskakuk zugonsu ke darantansuk gollansu: Maryamu so a wunda te Magdaliya, so hodangko maskaku babilok zugonto; ³ Yuwana, man Kuza, wakili ban Hiridus; Suzana; ki ma'ato shei, yo, ki tong ei nzuni anandi, 'yangko rutak nzuni. ⁴ Algi shei do daheno be'i modi, algi ndishe gemnik tong gyabanaku, a eni tong sere bo ngamo: ⁵ "A mara hata nduko kahi. A tong kahis, ma'ato ngaktangko bo bille bibdansuk sheke, rayinshei baba ya'akiti. ⁶ Ma'ato ngaktangko ka gosho, do hatangko somangko sire, hok'yansu, kika be is ho'iko. ⁷ Ma'ato ngaktangko tong hara, sirangko be'i modi harai ndino njekinsu. ⁸ Ma'ato me ngaktangko ka elis zina hodangko ka zignen wallak shidai ka dalmak dalmak." Ki bei do Yeso iko eni woi, iko wundik dolya, "Ngoi na an kumok kolshi, eri si koli." ⁹ Majirakuni dolangko si ta sere bo ngamo wonses ngafko miya. ¹⁰ Si ta, "Manta ei tong mene Ndeyi onangkuti, yo ma'atoi me ne retei ki sere bo ngamo, 'a moyai a gita moishe bu, a kolai a manta bu.' ¹¹ Woi ei sere bo ngamos ngafko: shidai eni Ndeyi. ¹² Mayei ka billei biyai kolangko, me singkau ndino gorak eniy ki tilinsu, do kada nzuni on jire we wangu bu. ¹³ Mayei ka goshoi maye, do nzuni kolangko eniy, biskangkok kuyu. Nzuni me anan shori bu; onangko jire so sommodi shim, a tong sommodi kabtu ngaktansu. ¹⁴ Shidai ngaktangko ka goshoi biyai kolangko eni, me do a tong marshe, matangkok kelunsu ka dara ki kola zei ki dunya, hokdangko ka bu. ¹⁵ Me shidai ngaktangko ka elis zinai, woi mayei, kolangko eniy biskangkok tili modi, ngahangko zina ki habri nami hod ka zignen. ¹⁶ An ngoi na hinta yesi, namtu woka hatik kato domana zofti her indi bu. Kaba dei, zanto bo guudu, kika leilo na a rishe tong banos a moi talku. ¹⁷ Kika an ei heno yo a hoda si hena bui andi bu, domana ei bungkeno a tama si hili bum andi bu. ¹⁸ Kika woi gosa kumangku, ngoi andi a sauwenidi, me ngoi andi bui, lei ei si andiy a biskitik gemani." ¹⁹ Moishe noni ki minnoni ndano gemni, me gitangko ndishe gemni bu kika sheiki algi. ²⁰ Anani ta, "Anbangkuk minnongko erno hena, ndalangko moya koi." ²¹ Yeso me lafko ansu ta, Anbammu ki minnonoi mayei kolangko eni Ndeyi ke a rutak si." ²² Hoti yo'oto ruko tong gerei ki majirakuni, nami si ansu ta, "Ndamu laha haushis ki wondi." Nzuni some marshe. ²³ Do nzuni tong marshe monsom namini. Hibla hindeno tong haushis 'e, gereisu inni nem ki ngamshek ham, bogebasu ngata to ko. ²⁴ Kaba moishe majiraku Yeso ndano gemni juktangko si, a anshe ta,"Abano! Abano! Mu 'yammu nemki mato!" Si hinda gilla ka hibla ham ye ki huhulonni, shafsu eransu, be is ye'eti to. ²⁵ Nami ansu ta, "Ta ona jiretku?" shaf 'yansu zuba. Do a tong zuba monmoni jo ngahinsu, a dodogla zehe, "Woi shida ngoi yiya, yo a gilla ka hibla ki ham, shafsu ke a dafshe si?" ²⁶ Nzuni ndangko elik Garasinaku, so a laha haushik Galili. ²⁷ Do Yeso urno eli, ngoi yo'oto hetenok tong gyabanis goma boni an maska zugoni. Nasko wara ola karei zugoni, si ke a deino bano bu kaba tong burare. ²⁸ Do si moiko Yeso, iko lula nami ngete domni iko enik gedo ta, "Ko nda miyak ne 'e, Yeso, Lah Ndeyi? Ne donsha koi, ko maite ne 'e bu." ²⁹ Kika Yeso angkok maskai zug ngo ye hetek zugoni. Kika ka shei a olshe si eli, a ka woi a ngarshenik yakla zenidi a moya, a babtantik yaklas maskas a zofsheni riya. ³⁰ Nami Yeso dol si, "Sungko lo?" si lahi ta, "Dingim," kika maskaku shei ransu zugoni. ³¹ Nzuni some donsha si kada sar nzuni tong wuyok deita maskaku bu. ³² An birik dogzakui bano deyi ka guzare. Maskakui donshangko si wus nzuni go rusu hawosu, si wusinsu. ³³ Maskakui haktanok zug ngo ye go rusu tong dogzakui banoi 'e, biris laktangkok jijijo rusu tong haushi shafsu maftansu. ³⁴ Do ana deita dogzakui moyangko 'ei halai, gunangko go aknek algi tong gyabani ki kine elis shafto. ³⁵ Algi haktangko go moi 'ei hala, ndano gem Yeso boltu woi yo maskaku haktangkok zugoniy 'e. A deino dom Yeso, an karei zugoni keluni ke a zugoni; zuba ngahinsu. ³⁶ Mamayei moyangko 'ei halai idansui anansu shida 'ei hala a takur ye wadgo darantu. ³⁷ Moishe ma elik Garasinakui anangkok Yeso wustik elisu, kika shafsu zuba ngahinsuko yam. Nami danni tong gerei do some marshesu. ³⁸ Ngoyei maskaku hatangkok zugoniy donsha si ta ndalo gonnik si, Yeso me ngeniti, ani ta, ³⁹ "Mitko banotko ko an 'ei shaf halak koi." Ngoye ngafko billeni, a tong gyabanis shafto a dafshe anshe ei Yeso ini. ⁴⁰ Yeso do meno, algi gomangko boni, shafsu a geshe si. ⁴¹ An ngoi yo'oto suni Yayirus, modik tong makshiy tong ban donshu, ndino ngata dom Yeso, donsha si nditu banonni, ⁴² kika ba'i modato, sanito nem ki dirbolo, a bo mato. Yeso do a ka billeini, algi shei nje-njeka si. ⁴³ An mandus so'oto wondi so dom nzere domto har sani dirbolo ke bo'itak dogdonto shafni, ke an ngoi jouko daranta te bu. ⁴⁴ Te ndinok bei Yeso safko bo godonni, wara eni dom ye erinni. ⁴⁵ Yeso ta, "Safko ne 'ei lo?" Shafsu an ngoi angko ta si bu, Bitrus ta, "Abano, algi shei a wonde shafsu a nje-njeka koi." ⁴⁶ Yeso me ta, "Ngoi yo'oto safko ne'e, kika ne manoti gedo hatak zugono." ⁴⁷ Mandus do moiko a gita bo'ishe bui, te hetenok didide zugo ngata domni. Te angko dom algi shaf 'ei zofko te saha si, ki shida darantui te wa kato ka modi. ⁴⁸ Nami si anto, "Ba'ano, ona jireshi onshitik lahiya. Uri lahiya." ⁴⁹ Do siy a tong eni, yo'oto ndinok ban a na'akok rutai ban donshu, ta, "Ba'ako matito. Kadak damtidi malum ye bu bolo." ⁵⁰ Yeso me do kolko woi, si lafkok Yayirus, "Ko 'e zuba bu; on jire yak'i, ke a darito." ⁵¹ Do si ndino banos, wusko leilo rok si bu, kaba Bitrus ki Yahaya ki Yakubu, namik boti las 'e ki nonto. ⁵² Algi shaf a bebele ki jig-yayik kato, si me ta, "Ngu 'e bele bu; te matko bu a monsom." ⁵³ Nzuni me 'yani zurok bokshi, manangkoti ta te matito. ⁵⁴ Si namko te saranni, 'e wundi ta, "La gumyo, hindi!" ⁵⁵ Zauto mento, moishe te hinda kato ka modi. Si ansu onto 'yak tishi toi. ⁵⁶ Ana le'into 'yangko monmoni, me si ansu ta an 'ei woi halai ki ngo bu.