¹ Ki bei Yeso taka enini dom algi, si runni Kafarnahum. ² An ngaru a kesiy yo'oto, nda si yam, an lahiya bu har inni nem ki mato. ³ Me do kolko somok Yeso, ma'i kesiy sarni koknaku Yahudaku, do ani nditu walte ni ngarunik bo mato. ⁴ Do ndano nem ki Yeso, donshangko si tong danum, a ansheni ta, "Ngoi woi suba ko zofni sara, ⁵ kika si nda elimmu, har salmu ban donshu." ⁶ Yeso ngafko billek nzuni gonni ndishe. Me do si nduko gerak zug bano bu, ma'i kesiy sarno sha'eni bunji gemni a ani ta, "Bomu abano, ko damte katko bu, nen tadak ndituk ro banonno bu. ⁷ Kika 'ya woi ne moikon tadan nditu gemko guda kanno bu, me yak i eni ngaruno darinni. ⁸ Kika ne e ken ngoi a her yo'oto ken an ana kesi elelinno. Ne analk woi ye e, 'Ndui,' si ke a go, ki yo'oto jo, 'Nditi,' si ke a nditu, ki ngaruno ke, 'I woiye e,' si ke a ina." ⁹ Yeso do kolko woi, iko monmoni kanni, wangla gem algi ana daha si ani ta, "Nen anshengku, lei a tong Urushalima ne damba wena a gedok ona jire kit woi bu." ¹⁰ Mamayei sarano nzuniy mangko bano bolangko lai darinni. ¹¹ Sommodi shim ki bei wom, Yeso ndunni gyabanis so'oto so a wunda te ta Nayin. Majirakuni isangkok si, ki dahik algi shei. ¹² Do ndino nem ki bogyargyar gyabanis, kaba, ana nama gubu iano hete, lai modabi gem noni. Te daushi, algik tong gyabanis a marshek te. ¹³ Ki moya te, Bomu abano kolko jig-yayito yam nami anto ta, "Shi 'e bele bu." ¹⁴ Nza'ano nem nami saf nzeetei nzuni namingo gubui a kanniy 'e, mamayei namano si erangko kato modi. Si ta, "Lah bunga, Ne anshengko, hindi." ¹⁵ A matoi hinda some eni. Nami Yeso on sik noni. ¹⁶ Zuba ngahinsu shafsu. Nzuni some nama ka Ndeyi, a anshe ta, "Nabiy na'ako hindinni hotommu" Ke "Ndeyi moikok biyani." ¹⁷ Somok Yeso wonses ruto lei tiya tong Yahudiya ki kine elis nem ki te. ¹⁸ Majiraku Yohana anani ei maye shafsu. ¹⁹ Yohana wunda majirakuni bolo sar nzuni gem Bomu abano ta, "Isnoi ko do, do an ngoi mu zoha idom gessi?" ²⁰ Do nzuni ndano nem ki Yeso, nzuni ta, "Yohana a Baptisma sarno muni gemangko ta, 'Isnoi ko do, do an ngoi mu zoha idom gessi?'" ²¹ A jajum wom darantak algi shei ki tong mure lahiyasu ki bonesu ki maskaku, makumshe shei wangko moino. ²² Yeso lafko ansu ta, "Na ngu ndangko ka billengku, anak Yohana ei ngu moyangko ki ei ngu kolangko. Makumshe weshe moino, kudau marshe, ana wale daransu, somaku kolshentik eni, ana mato hindansuk mato, a anshe somos zei ki ana mure. ²³ Ngoina wusko ona jire kannok ka rutai ne ishe bui an barka." ²⁴ Do ana sarnik Yohana ndansu, Yeso some enik algi ka Yohana, "Ngu ndangko tong riya moya miya, santai geeri yo hibla gofshe nzuni? ²⁵ Me ngu ndangko riyai a moya miya, moya ngoi tuko ombo? Moyai, biyai ana zoha karei yo zignen ki ana deino tong banos zignen a bodubanok ma'i. ²⁶ Me ngu ndangko moya miya, Nabi? Wo'o, Nen anshengku, ei wallak Nabi. ²⁷ Woi si yo turangko kanni, 'Moyi, Ne sarshe a sarnino gonni domko, yo a ramteko bille.' ²⁸ Ne anshengku, a howok le'ik monde, an ngoi walla Yohana bu, shafki ka a me yo kaseno tong ban mene Ndeyi wallini." ²⁹ Algo do shaf kolangko woi, shafki ana biska ngala, anangko ta Ndeyi a jire. Nzuniy a hawok mayei Yohana isu Baptismai 'e. ³⁰ Me Farisaku ki malumshe sherya, mayei si isu Baptisma bui, kudangkok mantu Ndeyik kasu. ³¹ Nen kabta biyai sommodi woi ki miya? Nzuni 'yangko subak miya? ³² Nzuniy kit 'yak milla ana goyou tong goma, deyangko a wunda zehe ta, 'Mu buyangku meele, me ngu 'yangko wona bu. Mu deino be'i mato, ngu 'yangko bele bu.' ³³ Yohana a Baptisma ndino a tishe 'ya bu a seshe ham yo shomshom bu, ngu anangko ta, 'Si an maska.' ³⁴ Lah Ngo ndino a tishi a seshi ngu anshe ta, 'Moyai, si a tishi ki a seshi, zafti bunga ana biska ngalana ki ana zunhu!' ³⁵ Jire me a tamshe tek be'i millanto." ³⁶ An ngoi Farisai yo'oto wunda Yeso tina wo'oto. Yeso do ruko ban a Farisai, deiko bo tebur do to wo'oto. ³⁷ An mandus so'oto tong gyabanis 'e an zunhu. Te kolko ta Si ban a Farisai 'e, te mokno tuba atursas zei. ³⁸ Te erkok beini nem ki shekeni iko bele. Moishe yelunto soma shoba shekeni, te some lelantik som yo kato, a ngakha shekeni, a kasheni atursas 'e. ³⁹ Do ngoi Farisai yo wundeno Yesoi moiko ka ai, angko tong tilini, ta, "Ka na ngoi woi Nabi, ka a mantitik shida mandus a safshe siy an zunhu," ⁴⁰ Yeso lafko ani ta, "Simon, Ne an ei ne gonno anshengko." Si ta, "Ani, Malum." ⁴¹ Yeso ta, "An biyai ma'ato bolo biskangko guduk gem a ona gudu. Yo'oto biska dinar dalmak bad, yo'oto dinar bibad. ⁴² Nzuni anan dogdo tuhe bu, si yahinsu shafsu. Kika ka a, hotosui lo a walliti ndalta si yam ye?" ⁴³ Simon lafni ani ta, "Ne moishe woi yo yahani shei ye 'e." Yeso ani ta, "Ko angko jire." ⁴⁴ Yeso wangla gem mandus a anik Simon, "Ko moiko mandu wonses 'e. Ne rino banotko. Ko ono ham ne bud shekeno bu, teme itko, ki yelunto, bu'unotik shekeno lelitkok somto. ⁴⁵ Ko ngakha ne 'e bu, teme itko, tingki risheno, wusko ngakha shekeno bu. ⁴⁶ Ko kasno mor kanno bu, teme kasnotik atursa ka shekeno. ⁴⁷ Ki ka ruta woi, Ne anshengko ta tei yo an zunhu shei ye yahantoti shei, ke jo an ndaltu shei. Me ngoi na yahani shim, a ndaltu ke shim." ⁴⁸ Nami jo anto, "Yahanshitik zunhushi." ⁴⁹ Mamayei a deinoi some anshek zehe ta, "Woi si lo har a yaha zunhu ye?" ⁵⁰ Nami Yeso anik mandus ta, "Ona jireshi wanginshi. Uri lahiya."