¹ Woi hala hoti subdu do Yeso reta tong kori majirakuni datha ka hai, a burya sarasu a ha'ashe. ² Ma'atok tong Farisaku me a anshe ta, "Kika miya ngu ishe ei suba bu hoti subdu ye." ³ Yeso lafko ansu ta, "Ngu karantangko bu do ei Dauda iko do a kolshe kizi ye, sik mayei a be'i modik si? ⁴ Si ruko tong ban Ndeyi, namko sinakir so daseno genga toi, nami on ma'atok ana marshenni toi, yo suba kaba toi ana ruta tong ban Ndeyi." ⁵ Nami ansudi, "Lah ngoi Boti abano subdu." ⁶ Hala hoti subdus so'oto ruko tong ban donshu shutantak algi wondi. An ngoi yo'oto wondi yo sarannis tina sureno. ⁷ Malumshe sherya ki Farisaku moishe bei a daranta yo'oto hoti subdu, ndalangko we billei a ngafdi sik leihi. ⁸ Me si manotik dinabu nami anik ngoyei saranni surenoi ta, "Hindi, eri tintil wonde."Moishe ngoye hinda erko wondi. ⁹ Yeso ansu, "Ne dolshe nguni, suba hoti subdu 'e ei zina do disa, walte zau do dugti?" ¹⁰ Moiko nzuni shafsu anik ngoye 'e, "Dimti saratko. "Si iko ka a, moishe saranni mento lahiya. ¹¹ Nzuni me tilinsu yabtinni, some enik zugonsu ka ei a inak Yeso. ¹² Hala tong sommodiy hata gonni ka gosho donshu. Sungko ka donsha Ndeyi. ¹³ Do babadi wuya, wundeno majirakuni gemni, worko dirbolok hawosu, yo wunda nzuni ana "deino kusani." ¹⁴ Sun ana deino kusaniy Simon [yo a wunda si Bitrus] ki beinoni, Andarawus, Yakubu, Yahaya, Filip, Bartalmawus, ¹⁵ Matta, Tomas, Yakubu la Halfa, Simon, yo a wunda si a gedok tili, ¹⁶ Yahuda la Yakubu, ki Yahuda Iskariyoti, yo deyinni a mure jire. ¹⁷ Yeso urnok ka goshok nzuni b ida eli. Majirakuni shei a wondi, ka a ke e algik Yahudiya ki Urushalima, ki bohaushik Taya ki Sidon. ¹⁸ Nzuni ndano kolai ke we darantuk gogollansu. Biyai anan maskaku ke shaf wangkok darantu. ¹⁹ Leilo tong dahis ndalo safsi kika gedok darantu hetek zugoni, ke darantinsu shafsu. ²⁰ Nami moi majirakuni, ani ta, "Nguning ana barka ana mure, kika yokui mene Ndeyi. ²¹ Nguning ana barka ana kola kizi kauso, kika ngu kawatku. Nguning ana barka ana bele kauso, kika ngu ina zuro. ²² Nguining ana barka na algi kudangko nguni hodangku a namshe nguni kit ngu biyai zignen bu, kika sun La Ngo. ²³ 'Ya kuyu tong sommodi wommi'i 'ya duduro kika hetrek tili, kika ngu gotku wena bohawotku baba, kika dikensu ke 'yangko ka'ak Nabaku. ²⁴ Nguni me titikutku ana dara! Ngu wangkok zena sara bogebatku. ²⁵ Titikutku mayei keweno kauso! Ngu kola kizik naso. Titikutku ana zuro kauso! Kika ngu ina belek yabtu tili. ²⁶ Titikutku, na algi shaf a anshe eniy zina katku! Kika dikensu 'yangko ka ak Nabaku ngadar. ²⁷ Men anshengku nguniy ana kolshe, ndalta ana gyahatku ngu 'e ei zinak ana kuda nguni. ²⁸ Zoha barkak ana kunza nguni ngu 'e donshuk ana maita nguni. ²⁹ Ngoi mara ko jigya modi, wangleni so'otos 'e. Na ngo namko subangko, ko ngeni godotko bu. ³⁰ Leilo na dolko koi oni. Na yo'oto namko kareiko, ko dol si matetko bu. ³¹ Kit yok ndalo algi iko, ko ke isu ka'a. ³² Na ko ndalta biyai ndalangko koi, woi sauwe ko miya? Kika lei ana zunhu ndalta sha ensu ana ndalta nzuni. ³³ Na ko ishe ei zinak ana ishe zako zinai, woi sauweko miya? Kika lei ana zunhu ishe ka a ke e. ³⁴ Na ko onshe gudu kabak ngoi a matetkotiy, wom sauweko miya? Lei ana zunhu onshe guduk shasu ana zunhu, ke a zofshe tili matesu kit yo onangko. ³⁵ Me ndalta ana gyahatku ngu isu ei zina. Onasu gudu, ngu damte ka ei a matetku bu, bohawotku ke a deya na'ako. Ngu deya milla Ndeyi, kika Si ishe ei zinak ana mure kunani ki ana rutai disa. ³⁶ Kola jig-yayi, yak shida yo Boku a Jig-yayi. ³⁷ Ko e sherya bu, ko ke a iko sherya bu.ko moi ngok idos disa bu, ko ke a moya kok idos disa bu. Yahi algi, ko ke a yahingko. ³⁸ Onik ma'ato, ko ke a ongko. Gerwale ngamno-njekeno, ngamno zina har a kashe eli-a kasku ka hundotku. Kika shida ei ko kabtak siy, ko ke a kabtekok si." ³⁹ Nami jo ansu sere bo Ngamo. "Makum ke a gitik ella zawak makum? Na si ikoi, shafsu ngete tong wuyo, do ka a bu? ⁴⁰ Majiri walla malumni bu, me ngoi na watkok shutantu zinai a deyinni kit malumni. ⁴¹ Kika miya ko moishe la santai tong ida yagenangko, ko mek moishe guudui tong idangko bu ye? ⁴² Lolok anak yagenangko, 'Yagenano, erin shaftekotik la santai tong idangko,' ko guda katko mek moiko guudui tong idangkoi bu? Koi a mure jire! Yo tono ho'otik guudui idangko dongo, ko we moino zina namik ho'odi guudui ida yagenangkoi 'e. ⁴³ An roi zina yo a le'ishe le'is dafteno bu, ke an roi dafteno yo a ho'oshe le is zina bu. ⁴⁴ Lei shida roi yiya manta sik be'i le'inni. Kika biya worshe mormik zug bureni bu, domana zonge ki zug ngebri. ⁴⁵ ngoi zina ki tong tilini a ho'oshe ei zina, ngoi disa ke ki tong tilini a ho'oshe ei disa. Kika ei tong tiliniy a anai si. ⁴⁶ Kika miya ngu wunda ne 'e, 'Bomu abano, Bomu abano,' me ngu dafshe ei ne anshe bu? ⁴⁷ Lei ngoi yiya na ndino gemano kolko enino ke dafko nzuni, ne angku ei si suba. ⁴⁸ Siy kit ngoi a sala bano, yo ofko eli gera someno salinnik ka gosho. Ham godo do ndino gofko banos 'e, me gitko didanta te bu, kika salanto zina. ⁴⁹ Me ngoi na kolko enino ke rutak nzuni bui, siy kit ngoi salko bano ka yaya wara oha eli. Godo ham do hindeno gofko banos, wara eni rugzito ko, bano wonsis rugzito shafto."