¹ Kauso hala ka a, algi kokrangkok Yeso a kolshe eni Ndeyi, do a erno bo haushik Janisarat. ² Si moiko gerei bolo ngarno bo haushi. Ana ngaha kerwo hatangkok hawosu a zugunto bubda geraza ngaha kerwosu. ³ Yeso ruko tong modik hawosu, yo Simon, ani ta tubidi gerei ye hawok ham ye shim. Moishe deiko some shutantak algi ki tong gerei ye e. ⁴ Do taka eni ni, Si angkok Simon, "Tubi gerei ye tong ham yo gera ngu kas geraza ngaha kerwotku ngu e ngafya." ⁵ Simon lafko ani ta, "Abano, mu 'yangko ruta tingki bedi, mu ngahangko 'ya bu, me dei ko angkoi, ne kasa gerazanoi e." ⁶ Ki bei do nzuni 'yangko 'ya woi, ngahangko kerwo shei har geraza ngaha kerwosu tatakranni. ⁷ 'Yangko wundik sha 'ensui tong gerei yo'otoi nditu zofsu sara. Nzuni ndano ngamtangko gerei boloi ki kerwo har somisu dula. ⁸ Simon Bitrus me, do moiko ka ai, ngata dom Yeso, a anshe ta, "Nzadik gemno, kika nen a zunhu, Bono a bano." ⁹ Kika monmoni ngahini, shafki mayei a nemki si, a ka moya kerwos ngahangko. ¹⁰ An Yakubu ki Yahaya, milla Zabadi, sha enti ana ngaha kerwok Simon. Nami Yeso anik Simon, "Ko e zuba bu, kika kutei godi dom ko soma ngakha biya." ¹¹ Do mokano gereisui a bo haushi, wusangkok lei miya dahangko Si. ¹² Hala ka a do a tong gyabanis so'oto, an a wale wondi. Do si moiko Yeso, ngata ka hawonni some donsha Si, a anshe ta, "Bono a abno, na ndaloti, ko gitik daranta ne'e." ¹³ Moishe Yeso zofko saranni saf si, ani ta, "Ne ndaloti. Daritko."Kit 'yak hena idok ehento darinni. ¹⁴ Si ani kada anik ngo bu, me ani, "I marshetko, ko tam katkok a ruta ban Ndeyi ko e sadka so bu'ushi, shida yo Musa angku, deyi 'yak tamya gemsu." ¹⁵ Me shafki ka a somok Yeso kaba tina dom, algi shei some ndishe gemni a kolshe shutantu ki gyaza darantuk tong gollansu. ¹⁶ Yeso me a ndishenni be is an ngo bu a donshu. ¹⁷ An badis so'oto so Yeso shutantu, an Farisaku ki malumshe sherya deino wondi ndanok gyabanaku shei ki elik Galili ki Yahudiya, shafki gyabanik Urushalima. Gedok Bomu abano deinok Si e darantu. ¹⁸ An biyai ma'ato ndano, namano ngoi sureno ka nzeete, gyazangko bille rishe go ze si dom Yeso. ¹⁹ Nzuni wangko be is a mokdi si hawo bu kika sheiki algi, moishe dansu ka soro zoftu sik baba ka nzeete ni, a tintil algi, dom Yeso. ²⁰ Ki moya ona jire su, Yeso ta, "Ngo, yahangkotik zunhutko." ²¹ Ana sherya ki Farisaku damtitik kasu ka eni woi 'e, a anshe ta, "Woi ngoi yiya a eni bokshi ka a ye? A yaha zunhui lo, kaba Ndeyi modabi bu?" ²² Yeso me, manotik dibnasu, lafko ansu ta, "Kika miya ngu dibna wonses a tong tilingku ye? ²³ Walla kahurui yiya ani ta, 'Yahangkotik zunhutko' do ani ta 'Hindik e marshetko?' ²⁴ Me tado ngu mante ta Lah ngo an gedo tong dunya yahe zunhu, Ne anshengko, 'Hindik nam nzeetengko, ndutko banotko.'" ²⁵ Wara eni moishe hinda domsu namko nzeeteni yo a suno kanni; nami manni banonni, a namshe ka Ndeyi. ²⁶ Lei ngoi yiya a monmoni nami nam ka Ndeyi. Shafsu zuba ngahinsu, a anshe ta, "Mu muyangkok 'yak dobo kute 'e." ²⁷ Ki bei hele 'ei mayei, Yeso hatak wondi moiko a biska ngala na suni Lawi a deino be'i biska. Si ani ta, "Dafti ne 'e." ²⁸ Lawi wusko lei miya, hinda dafko Si. ²⁹ Kaba moishe Lawi wunda Yeso tina wo'oto banonni, an ana biska ngalana shei wondi, an algi ana deino bo tebur ye a tishek nzuni. ³⁰ Me Farisaku ki malumshe sherya ngurarik majirakuni, a anshe ta, "Kika miya ngu tishek seshek ana biska ngalana ki ana zunhu ye?" ³¹ Yeso lafsu ta, "Biyai ana lahiyai a gyaza a ona uska bu, kaba ana mure lahiya a gyazai nzuni. ³² Nen ndino wunda biyai zignen tube bu, me kaba ana zunhu tube." ³³ Nzuni anani ta, "Majiraku Yahaya lei tamiya a golshe kizi ke a donshu, majiraku Farisaku ke ka a. Ko me majirakungko tishi ki seshi." ³⁴ Yeso ansu,"An ngoi a gitik zoha ana babnok sha'ensu goli kizi, a babnoi ke anni gemsu? ³⁵ Sommodi me isno badis a namtik a babnoi ki gemsu, a sommodi wom nzzuni gola kizi." ³⁶ Yeso jo ansudi sere bo ngamos so'oto. "An ngoi a tagra subaniy hoyo idi labu zug yo santi bu. Na iko ka ai, a tagritik subai hoyoi 'e, ke yo tagrak zug karei yo hoyoi na iko labuk si zug yo santiy a deya zina bu. ³⁷ Ka a ke e, an ngoi a kashe ham inabi tong jamjamiyas santi bu. Na si iko ka ai, ham inabiy hoyoi a buntitik dishis 'e, ham inabiy a saranni, jamjamiyas ke a yabtito. ³⁸ Ham inabiy hoyo me kaba kassi tong jamjamiyas hoyo. ³⁹ An ngo bu, ki bei sena ham inabiy balanni, a gyaza yo hoyo bu, kika si ta, 'Ei santi wallitko'"