¹ Ɗo Yeso, ngamnok kelui bu'uno, menok Huashik Urdun, kelui bu'uno worko si tong ² riya béis deiko sommoɗiy bi hoɗo ke sinkau kab ta si. Si tuko 'ya bu hawok sommoɗi' ye, a bo ernoto si kolko kizi. ³ Sinkau anita, 'Na ko lah Ndeyi, anik gosho woi ɗeyi to sinakir." ⁴ Yeso laf ni ta, "Tureno, 'Ngo ina zau ki sinakir moɗato bu.'" ⁵ Har kauso sinkau moko si béis so'oto ke tamni menei dunya shafto kit henak eha ido. ⁶ Sinkau anita, "Ne onkotik mene woi shaf ki zei to, ki ka onanoti, ne'e ken onti lei lo yon ndala. ⁷ Na ko kuba ko ino kubeshi, a ɗeya yoko." ⁸ Yeso me lafni ta, "Tureno ta 'ko ina kubeshik Bomu a bano Ndeyi, ke ko ini ruta moɗa bi.'" ⁹ Har kauso sinkau moko Yeso Urshalima ke zesi ka babak sali ban Ndeyi, ke ani ta, "Na ko lah Ndeyi, ngetetik wonde. ¹⁰ Ki ka tureno ta, 'Si anak maleikakuni , walte koi,' ¹¹ ke, nzu ni tahing ko tong sara su, ta kada ko gof shekenkok gosho.'" ¹² Yeso lafni anshe ta, "Tureno, 'Kadan kabte Bomu a bano Ndeyi bu." ¹³ Ɗo sinkau takatkk kabta Yeso, si ndunni ke wusini kaba jajum yo'oto. ¹⁴ Yeso meno Galili tong geɗok kelui bu'uno, somo n ni ke n duto lei tiya tong elis e'. ¹⁵ Si soma shutanta tong ban ɗonshu Yahudaku ke algi shaf a namshe kanni. ¹⁶ Si ndino Nazaret, bei'i malang ko si, ke kit shida ei si ishe,si runni tong ban ɗonshu mayahudaku hoti subdu ke si hinɗa erno iko karatuk ɗolya. ¹⁷ Nzuni onani lalaunk Nabi Ishaya. Si eha ke we beis turang ko ta, ¹⁸ Kelu Ndeyi kanno, ki ka si zotko ne'en an somos zei ki ana mure. Si sarno ne'en an wangu ki biyai ngaransu, ke ehe ida makmhe, wus biyai ngaransuk bone, ¹⁹ ne e' hekuwak sanik bomu a bano." ²⁰ Si boɗi ti ta k lalaunas 'e, ontik a rutai 'e, si ɗeyinni. Shaf ki algi tong ban ɗonshu Mayahudaku kasani ido. ²¹ Si soma ishen su eni, "Kutei eni woi runni kumanku." ²² Algi yo wonɗe shaf anangko zina kanni ke nzu ni monmoni ka eni y zina yo hetenok boni, nzuni dolang ko ta, "Woi lah Yusufu budu?" ²³ Si ansu ta, "Ki jire ngu ano sere bo ngamo wonse, e 'A darantu, darinti kat ko. lei miya yo mu kolang ko ta ko iko tong Kafarnahum, 'i ka'a tong banangko.'" ²⁴ Si me ta, "Nen ansheng ku jire, an Nabi yo biskang ko si tong banansu bu. ²⁵ Ne men anshengku jire ta andi daushaku shei tong Israila jajum Nabi Iliya, ɗo hangko ɓaɓa bo sani ku mutere ba'ashi moɗi'i, ke sarno kizi tong dunya shafto. ²⁶ sarangko Elija megya moɗi hawosu bu, me kaba Zarifat so Eli k Sidon, gyem daushi moɗik wonɗi. ²⁷ Anandi ana wale shei tong Israila sommoɗi Nabi Elisha, me si daranta lei moɗi k hawosu bu kaba Na'aman ngoi Suriya moɗa bi. ²⁸ Shaf ki algi yabtanko k tili yam ɗo nzu ni kolang ko ei woi'e. ²⁹ Nzu hinɗangko, ho'osi k gegeɗo k hawok banansu, mok si bozoro yo salangko banansu kato, ta nzu ni ube si eli. ³⁰ Me si geɗa k tintilsu go n ni beis so'oto. ³¹ Si ndunni Kafarnahum, tong eli k Galili, some shutansu hoti subdu. ³² Nzuni monmoni ka shutuni, ki ka si iko shuta ki geɗo. ³³ A tong ban ɗonshu Yahudaku andi gorzo yo an kelui disa, si gillak dolys geɗo, ³⁴ "Awaiya! mu ina miyak koi, Yeso yo Banazare? Ko n dino lakta mu ɗo? Nen manongko- ngoi bu'uno yo Ndeyi!" ³⁵ Yeso gilla ka maskai, ta, "Ko 'e eni bu hiti!" Ɗo maskai goko gorzoi tintil biyai, si hatanik hawonni, ke koli ni yam bu. ³⁶ Algi shaf a monmoni, ke some eni nik zehe. Nzuni ta, "Woi shida eni yiya? Si gilla ka kelui disa ki geɗo ke nzuni hatansu." ³⁷ Somo nniduto lei tiya tong elis 'e. ³⁸ Yeso wusko ban ɗonshu Yahudaku runni ban Simon. Sorkiti Simon me an hoɗa ka, nzuni ɗonsha nako. ³⁹ Si erko kato gille ka hoɗa ka, ke darito. ka moɗi te hinɗa some ishensu ruta. ⁴⁰ Ɗo bozoni ito, algi shaf mokano ana golla. Si zesusara kasu shaf ke darntinsu. ⁴¹ Maskaku ke hatankhawosu, a bebele anshe ta, "Kok lah Ndeyi!" Yeso gilla ka maskakui 'e ke ngesu ti k eni, ki ka nzuni mananko ti ta si Kiristi. ⁴² Ki babaɗi, si hatanni beis an biya bu. Algi me kato gyala si ke n dunsu beinis 'e. Nzu ni 'yanko ta ngahini kada si dei nzuni bu. ⁴³ Si me ansu ta, "Kabana ne iko wa'zu k somos zei so mene Ndeyitong gyabanaku shei, ki ka ka'a ne sarno ne'e wonɗe. ⁴⁴ Si some wa'zu tong ban ɗonshu Yahudaku tong eli k Galili shaf.