¹ Woi tina wo'oto zomu wara yisti inni nem, yo a wunda ta talshu. ² Ma'i ana ruta ban Ndeyi ki malumshe sherya some gyaza billei a dugdi Yeso mato, kika nzuniy a zubak algi. ³ Moishe singkau ruko tili Yahuda Iskariyoti, modik tong dirboloi 'e. ⁴ Yahuda nduko gem ma'i ana ruta ban Ndeyi ki ana moya moi billei a onsu Yeso. ⁵ Shafsu 'yangko kuyu, nami ani ta a oni dogdo. ⁶ Si daltinko, nami gyaze billei a onsudi si a tong dahi bu. ⁷ Hoti tina wo'oto zomu wara yisti ndino, badis ngafko kere la gyam yo onom. ⁸ Yeso sarko Bitrus ki Yahaya, ta, "Ndai ngu ramtemu tishik talshu, namim toi." ⁹ Nzuni dolangko si, "Ko ndalom ramte tiya?" ¹⁰ Si lafsu, "Kolai, na ngu rangko tong gyabanis, an ngoi yo'oto yo an sawah ham kanni a boltu nguni. Daha si tong banos a gonni rishe. ¹¹ Ngu anik abanoi ta, 'Malum angku ta, "Ta bi ngerhahi ye, be is ne tudi wo'oto talshuk majirakuno ye?'" ¹² A tamku biy na'ako salno ka zehe yo an karei umfu hawonni. Ramta tishis a wondi." ¹³ Nami nzuni go, bolangko lei miya kit shida yo si ansu. Nami ramte tishik talshu. ¹⁴ Sommodi do ndino, Si deikok ana deino kusani. ¹⁵ Si ansu ta, "Ne an kuyun to wo'oto talshu woi ki nguni kabui ne se maito. ¹⁶ Nen anshengku, ne sauwidi tishe bu bolo, kaba na ngamtangko si tong mene Ndeyi. ¹⁷ Moishe Yeso namko gerwale, do iko kunani, si ta, "Biska woiye 'e, sis-ha hototku. ¹⁸ Nen anshengku, Ne sauwidi sena ham inabi bu bolo, kaba na mene Ndeyi ndino." ¹⁹ Namko sinakir jo, do si iko kunani, dadatha, nami onsu, ta, "Woi zugono yo onangkok katku. 'Ya ka a ngu dibik ne 'e." ²⁰ Namko gerwale ki bei tishis, ta, "Gerwale woi yo ngara eniy hoyo tong domno, yo kasangko sik katku. ²¹ Me sa simbotku. Ngoi ongko ne 'ei a wonde be'i tina wo'otok ne 'e ka tebur modi. ²² Lah Ngo kam a gonni kit shida yo anangko. Me titikuk ngoi wom yo onangko ne 'ek saranni!" ²³ Nzuni some akna hotosu ta lo hotommu a ina 'ei woye. ²⁴ Kaba moishe shana hindito hotosu ka ngoi yiya a deya a na'ako. ²⁵ Si ansu ta, ma'inshe biyai manangko Ndeyi bu a ishensu mene kasu, mayei ana ishensu menei me a namshe nzuni kit ana ina zinak biyansu. ²⁶ Nguni me deyi ka a bu hototku. A bo ka a, erai woi na'ako hototkui mate kanni mama'i, ke woi yo an darjai a mate kanni kit baya. ²⁷ Ngoi na'akoi, ngoi deiko ka tebur, do ngoi a isheni ruta? Si budu yo deiko ka tebur ye? Shafki ka a Ne hototku kit a ishengku ruta. ²⁸ Men erkok i nguni tong sena kakabtuno. ²⁹ Nen onshengkui mene, kit shida yo Bono ono mene, ³⁰ ngu tina ki seshi ka teburno tong meneno, ngu deya ka njagdaku ngu ina sheryak shidai dirboloi Israila. ³¹ Simon, Simon, si simbotko, singkau barta do we koi, ndalo bui koi kit hai. ³² Men itkok donshu bo yoko, ona jiretko ngete bu. Nako mai ko on gedok yagenakungko." ³³ Bitrus ani ta, "Bomu abano, Ne ongkok kannon gok koi lei tong rono ki mato." ³⁴ Yeso lafko, "Nen anshengko, Bitrus, kabui gyaja 'e kokkiroto ko itik shanak manta ne 'e." ³⁵ Nami jo Yeso ani, "Don sarko nguni wara batkar, karei tishi, do taho bu, ngu yaklangko miya?" Nzuni lahangko ta, "'Ya bu." ³⁶ Nami jo ansudi ta, "Kauso me, ngoi na an batkar, a nami, ki karei tishi. Ngoi na an dirba bu a bo'ite subani keje. ³⁷ Nen anshengku, 'ei tureno kannoi a ngaminni, 'Namangko si a leihi.' Kika 'ei anangko kannoi ngaminni." ³⁸ Nzuni jo jo ta, "Bomu abano, moyi! Woi dirbaku bolo." Si ansu ta, "Mana ka'a." ³⁹ Ki bei tishi, Yeso ndunni, kit shida yo badgo, nzuni ka goshok zaitun, , majirakui dahangko si. ⁴⁰ Do nzuni tadangko, Si ansu ta, "'Ya donshu ngu ngete tong kabtu bu." ⁴¹ Nza'ako shim ki gemansu, kuba iko donshu, ⁴² a anshe ta, "Boti, nako daltiko, namtik gerwale maito wonses ki kanno. Shafki ka a zoha tilino bu, me yoko ngami." ⁴³ Kaba a moishe gaktaka urnok baba gemni, a onsheni gedo. ⁴⁴ Kika a tong bone, iko donshu yam, kurarunni deyito kit 'yak dom a ngekte eli. ⁴⁵ Do si hindak be'i donshuniy, ndino gem majiraku, bolko nzuni monsom kika yabtenok tili, ⁴⁶ dolko nzuni, "Kika miya ngu monsom ye? Hindai ngu 'e donshu, kika ngu ro tong kabtu bu." ⁴⁷ Do a tong eni, kaba, moishe dahik algi hatano, ki Yahuda, modik tong dirboloi 'e, a domsu. Si ndino nem ki Yeso do ngakhe si, ⁴⁸ Yeso me ani ta, Yahuda, ko onshe Lah Ngo ki nga-ngafya?" ⁴⁹ Mamayei a gem Yeso do moyangko ka ai, nzuni ta, "Bomu abano, mu da'ashe dok dirba?" ⁵⁰ Modik hotosu da'ashak kuma ngaru ma'i ruta ban Ndey, batik kumaniy tina. ⁵¹ Yeso ta, "Mana ka a!" Si safko kumani, darantini. ⁵² Yeso angkok ma'i ana ruta ban Ndeyi, ana deita ban donshu, ki koknakui ndanok kanni, "Ngu ndano kit ana ngaha a shiri, ki dirbaku ki zawa? ⁵³ Sommodi yon be'i modik nguni tong ban donshui, ngu zangko sara kanno bu. Kausoi me jajum woi yoku, ki ruta tutudu." ⁵⁴ Ngahangko Si, hodani hena, mokini ban ma'i ana ruta ban Ndeyi. Bitrus me dafko beinik gera. ⁵⁵ Gomtangko yesi tintil banos nami dek-yisu bei modi, Bitrus deiko hotosu. ⁵⁶ An lah gumyos so'oto baya moiko si do a deino bo yesis, za ido kanni ani ta, "Ngoi woi ke a bei modik si." ⁵⁷ Bitrus shantitko, ta, "Mandu, Nen man si bu." ⁵⁸ Nasko shim yo'oto jo moiko si, nami ta, "Ko kek modik hotosu." Bitrus me ta, "Ngo, ka a bu." ⁵⁹ Nasko ngoi yo'oto jo daurinni ta, "Jire ngoi a bei modik si, kika si ngoi Galili." ⁶⁰ Bitrus me ta, "Ngo, Nen man 'ei ko anshei bu." Nasko u, do a tong eni, gyaja iko kokkiroto. ⁶¹ Wangla, Bomu abano moiko Bitrus, nami Bitrus dib eni Bomu abano, do ani ta, "Kabui gyaja 'e kokkiroto ko ina shanak manta ne 'e ka kunu." ⁶² Bitrus hata bogenda some zigda bele. ⁶³ Moishe ana deita Yeso anani eniy disa gogok-hidi si. ⁶⁴ Nzuni henitik idani, ta, "Ani! Gofko koi lo?" ⁶⁵ Aknangko 'ya shei ka Yeso, a hulshe si. ⁶⁶ Babadi do wuya, koknaku dahangko bei modi, shafki ma'i ana ruta ban Ndeyi ki malumshe sherya. Mokangko si dom koknaku ⁶⁷ ta, "Na koi ko Kiristiy, a mu." Si me ansu ta, "Nan angkui, ngu ona jire bu, ⁶⁸ ke nan dolko nguni, ngu laha bu. ⁶⁹ Ki kauso me godi dom, Lah Ngo deya saras tiyak Ndeyi." ⁷⁰ Shafsu ta, "Kana ko Lah Ndeyi?" Yeso ansu ta, "Ngu anangko tan ka 'a." ⁷¹ Nzuni ta, "Kika miya mu gyazandi sheida ye? Muni guda kammum kolangkok boni."