¹ Yeso hafta kanni moiko ana dara a olshe onomsu tong shoko dogdo ban Ndeyi. ² Moiko mandus so'oto an mure olko afu bolo. ³ Si ani ta, "Nen anshengku jire, 'ei mandu wonses an mure ongkoi wallak kinei shafsu. ⁴ Onom wonses a ishei a onshek tong daransu. Daushi wonses me, ki tong murento, ongkok 'ei te andi yo tishi to shafni." ⁵ Ma'ato do a ka eni ka ban donshu, shida ramtui 'yangkok gosho zignen ki karei onom, si ta, ⁶ "Shafki 'ei mayei ngu moishei, sommodi isno so an goshos a wusa te ka zafto a rugza te bum an bu." ⁷ Moishe dolangko si, ta, "Malum, 'ei mayei a hele tamiya? 'Ei miya a tama ta 'ei mayei insu nem ki hele?" ⁸ Yeso lafko, "Deya ka babilotku kada boi'te nguni bu. Kika shei nditu tong suno, a anshe ta, 'Nen si,' ki, 'Sommodi inni nem.'Ngu daf nzuni bu. ⁹ Nang kolangko somok kekesi ki mure deinok lahiya, ngu kol zuba bu, kika 'ei mayei kaba na halangko yo tono, me tatakas a hele kauso kauso bu." ¹⁰ Nami ansudi, "Eli hinda ka eli, mene hinda ka mene. ¹¹ Eli ina didide na'ako, kizi hele ki mure lahiya be'i shei. An 'yak ona zuba shei helek baba. ¹² Me kabui 'ei maye shaf, nzuni ngakha nguni kud nguni, okningkuk ana ban donshu ki rono, moktu nguni dom ana mene ki manakshi kika suno. ¹³ Woi a ongku bille ana somotku. ¹⁴ Kika woi ngu damte katku ka 'ei ngu gotku anshe bu, ¹⁵ kika Ne zofku eni bongku ki mantu, yo ana kudangku gita dalteh domana 'e shana bu. ¹⁶ Me ana le'ingku, yagenangku, shidangku ki sha'engku bunji ogningku, a dugtik ma'atongku mato. ¹⁷ Algi shaf a kudingkuk ka suno. ¹⁸ Me lei modik tong som yo katku a bo'ya bu. ¹⁹ Habritkus a zohang we zauku. ²⁰ Na ngu moyangko Urushalima ana kesi kokrantoi, mantati ta lakta te ndinto nem. ²¹ Mayei Yahudiya gunasu ka gosho, ma tong gyabani gugnasu, ke ngu wus mayei a hena ro tong gyabanis bu. ²² Kika sommodi maye so maito, deyi 'ei mayei turenoi a ngami. ²³ Titikuk mayei ana hawo ki ana ona yedik milla tong sommodi mami'i! Kika maito go to urtu ka elis 'e, algiy ke tilinsu yabta. ²⁴ A dudgitik ma'atok dirba ngaftik ma'ato mokinsu ruta baya tong dunya, ana mure ona jire bibdatik Urushalima, kaba na sommodi ana mure ona jires na ngamko. ²⁵ An 'yak tamyak tong hoti, tong tere, ki tong jenjaku, namik eli. Dunya wena damto yam, a zofshe tili kika digmaku ham ki adir. ²⁶ Biya babarmisu kika zuba ki ngete bogebak ka 'ei a gonni hele dunya. Gedos tong baba shaf a ina didide. ²⁷ Nzuni moya Lah Ngo isno tong kebe ki gedo ki na'akok nama ka. ²⁸ Me 'ei maye na somansu helei, hinda erno ngu hafte katku, kika wangungku inni nem." ²⁹ Yeso ansu sere bo ngamo, "Moya roh mormi, ki kine roh. ³⁰ Na somangko tulo, ngu moishek katku keng manangkoti ta huzo ndinto nem. ³¹ Ka a ke e, na ngu moyangko 'ya woi a hele, ngu manangkoti ta mene Ndeyi ndinto nem. ³² Jire, Nen anshengku, sommodi woi a gede bu kaba na 'ei maye halangko. ³³ Baba ki eli gedasu, enino me a gede bu. ³⁴ Me sa simbotku, kada tilingku mok nguni tong seseshi ki hetek tong kelungku, ki dadamtos dunya, badi wonsis a nditu an mantu bu ki 'yak doka. ³⁵ Kika a urtu ka leilo yo a deino tong dunya wonses shafto. ³⁶ Me deya ka babilotku, ngu donshu ngu we gedok walshek tong 'ei mayei a gosu hele, ngu eri dom Lah Ngo." ³⁷ A tong sommodiy a shutanta tong ban donshui, ki bedi me a hetenni go suntu ka goshok zaitun. ³⁸ Algi shaf a ndishe gemnik babadi kolsi tong ban donshu.