¹ Hoti yo'oto, Yeso do a shutantak algi tong ban donshu ke anshe eni Ndeyi, ma'i rutai ban Ndeyi ki malumshe ndano gemanik koknaku. ² Nzuni 'yangko eni, anani ta, "Amu ki shida dobossiya ko ishe shida rutai woye? me ongko gedo wonses lo?" ³ Si lafko ansu ta, "Ne ken dola nguni. Anano ka ⁴ baptismak Yahaya. Ki baba do ki gyem biya?" ⁵ Nzuni 'yangko suskak zehe, ta, "Namu anangko ta, 'Ki baba,' si ana ta, 'Me kika miya ngu onangko jire kanni bu?' ⁶ Me namu anangko ta, 'Ki gem biya,' algiy shaf a ogla muni, shafsu namangko ta Yahayi Nabi." ⁷ Moishe lahangko ta nzuni manangko bu is te hetengo bu. ⁸ Yeso ansu ta, "Ne 'e ken angku shida gedos ne ishendi 'ei maye bu." ⁹ Si angko sere bo ngamo wonses ki algi, "Yo'oto kafko kori, ontik hayatok ana biska, gonni elis so'oto yo sommodi shei. ¹⁰ A jajum zungko sarko ngaruni gem ana biska hayas 'e, ta do nzuni oni bohawonnik tong le'ik roi 'e. Ana Tingsa me 'yani jibo, roksi sara-sarei. ¹¹ Sarko ngarui yo'oto jo shaf sike 'yani jibo, maitangko si wara kawa, roksi sara-sarei. ¹² Nami jo sar yo kunu nzuni kolani rege, nami sottini hena. ¹³ Moishe boti abano koriy angko ta, 'Nen ina miya? Ne sara lano yon ndalo. Bei a oni kawa.' ¹⁴ Me do ana biska hayai moyangko si, anangko hotosu, ta, 'Woi a tina gyados 'e. Dugya muni, gyados a deyi somu.' ¹⁵ Nzuni hodanik tong koriy nami dugini. Ei miya a kori woi a isu? ¹⁶ A nditu laktitik ana hayak koriy, nami ontik koriy ki ma'ato." Do nzuni kolangkoi, nzuni ta, "Ndeyi tadi!" ¹⁷ Yeso me moiko nzuni, a ani ta, "Ngafko miya 'ya woi tureno ye: 'Goshos ana sali kudangkoi deyito ka sukana'? ¹⁸ Lei ngoi yiya na ngata ka goshos a dathinni. Me na ngata ka leilo, a esini." ¹⁹ Moishe malumshe sherya ki ma'i ana ruta ban Ndeyi ndalangko ngaf si jajumniy 'e, kika nzuni manangkoti angko sere bo ngamo wonses ki kasu. Nzuni me a zubak algi. ²⁰ A deita si zina, sarangko ana zinge bolo yo a tamshe ta nzuni biyai zignen, ta bei a wena sik leihi ki bei reteni, kika do on sik a mene namik gedok gomna. ²¹ Nzuni dolangko si, ta, Malum, mu manangkoti ta ko anshe ke ko shutanta jire, ke ko damtak deinok leilo bu, me ko shutanta jire ka bille Ndeyi. ²² Suba mu on ngalanak Kaisar, do suba bu?" ²³ Yeso me manotik dibnasu, nami ansu ta, ²⁴ "Tamano dinar. Suba lo ki sun lo a kanni ye?" Nzuni ta, "Kaisar." ²⁵ Si ansu ta, "Onak Kaisar 'ei yo Kaisar, ki Ndeyi 'ei yo Ndeyi." ²⁶ Gitangko wena sik leihi ka eniy angko dom algiy bu, me a monmoni ka lafyas isu ye 'etansu. ²⁷ Do Sadukiyakui ma'ato ndano gemni, mayei anangko ta an hindak mato bu, ²⁸ nzuni dolangko si, ta, "Malum, Musa turemu ta na bali ngo matko, an mandu, me an lah bu, beinoni a nama man ba 'is 'e, nami we lak te. ²⁹ An yagenaku babilo yo tonoi iko babno, matko wara le'i, ³⁰ yo bolo ke ka a. ³¹ Yo kunui namko te, godi ka yo babiloi shaf an le'i bu, maftansu. ³² Ki bei ke mandus nditu suwato. ³³ Hoti hindak mato ye, tei a deya man lo? Kika shafsu babilo kak-yangko te mansu." ³⁴ Yeso ansu ta, millai tong dunya wonses a babno ke a onshe babno. ³⁵ Me mayei subangko hindak mato sommodi wom a ina babno bu ke a ona babno bu. ³⁶ Nzuni ke a mata bu bolo, kika nzuni deyansu modik Taktaku ke milla Ndeyi, kika hindansuk mato. ³⁷ Me kika ana mato hindansu, lei Musa tamko, a tong riya, be is wunda Bomu abano Ndeyik Ibrahim ki Ndeyik Ishaku ki Ndeyik Yakubu. ³⁸ Si Ndeyik ana mato bu, kaba ana zau me 'e, kika shafsu anan zau gemni." ³⁹ Malumshei ma'ato lahangko, "Malum, ko lafko zina." ⁴⁰ Nzuni gitango dola si bu. ⁴¹ Yeso ansu ta, "Lolo nzuni anshe ta Kiristi lah Dauda ye? ⁴² Dauda guda kanni angko tong Zabura ta, Bomu abano angkok Bono abano, 'Deyi sarannos tina, ⁴³ Kaba nan zofko ana kudangko elelik shekengko.' ⁴⁴ Dauda wunda Kiristi 'Bono abano,' iko lolo si deyi lah Dauda?" ⁴⁵ A dom algi si angkok majirakuni, ⁴⁶ 'Ya danum ki malumshe sherya, mayei ndalangko marshe tong subai geri, ndalangko sheiki lagdu tong goma, ki bei deinos zignen tong ban donshu, ki be is zignen bei tishi. ⁴⁷ Nzuniy bibiskantik ban mondei anan zazi bu, kika do mante a ishe donshui geri. Biyai ana ina karei woi a sena maitos yam."