¹ Yeso ruko a gedek tong Yeriko. ² An ngoi yo'oto wondi suni Zakka. Si na'akok ana biska ngalana ki an dara. ³ Ndalo moyi Yeso woi si lo, me gitko moya si bu kika algi, siy ngoi duglu. ⁴ Moishe gunanni dom nduko danni roh mormi do moi si, kika Yeso gonni daha billa wommi'i. ⁵ Yeso do ndino be is, si moiko baba ani ta, "Zakka, urti marei, kika kutei ne ura banotko." ⁶ Se urnok roshi ndino biskasik kuyu. ⁷ Do algi moyangko 'ya woi, shafsu some ngurngui, a anshe ta, "Si gonni ban a zunhu." ⁸ Zakka hinda anik Bomu abano ta, "Moyi, Bomu abano, bu ne ontik reta daranok ana mure, na ken njeka lei ngoi yiya, ne mateniti har ka hodo." ⁹ Yeso ani ta, Kutei wangu rinto bano wonses 'e, kika sike lah Ibrahim. ¹⁰ Lah ngo ndinok ka bartu ki wanga biyai bo'yansu." ¹¹ Do nzuni kolangko 'ya woi, si tuko dom ki eni nami sere bo ngamo, kika siy a nem ki Urushalima, nzuni ke dibshe ta mene Ndeyi go to urtu kauso kauso. ¹² Si angko jo ta, "An ngoi na'akoi yo'oto nduko elis so'oto gera do bodetu si ma'i nami metu. ¹³ Wunda ngarakuni bimmad, nami ansu ta, 'Ya goma kabui ne metu.' ¹⁴ Biyani me ndalangko sibu moishe tubangko ma'ato beini, ta, 'Munim wusa ngoi woi 'e mene kammu bu.' ¹⁵ Ei woi halai do si menok be'i biska meneni, si angko ta ngarakuniy mayei onsu dogdoi nzuni nditu gemani, ndalo mante shida ribas nzuni wangkok be'i gomansu. ¹⁶ Yo tonoi ndino domni, ta, 'Abano, famko bimmad ellenggo fam bimmad.' ¹⁷ Ngoi na'akoi ani ta, 'Use, ngarui zina. Kika ko iko zina tong 'ei mama'i, ko ina mene ka gyabanaku bimmad.' ¹⁸ Yo bolo ndino, ta, 'dogdongko, abano, wenggo fam bad.' ¹⁹ Ngoi na'akoi ani ta, 'i mene ka gyabanaku bad.' ²⁰ Yo'oto ndino, 'Abano, woi dogdongko, yon zatko zina tong guzur, ²¹ kika ne zubatko, koi ko ngoi yam. Ko namshe 'ei ko za bu, ke ko zungka be is ko kafko bu.' ²² Ngoi na'akoi ani ta, 'Ne iko sheryak eniy bongko, ko ngarui a tili bolo. Ko manoti tan ngoi yam, ne namshe 'ei ne za bu, ken zungka be is ne kafko bu. ²³ Kika miya mek moko dogdono Be'e za'i, nan menon biskek ham kanni?' ²⁴ Ngoi na'akoi angkok mayei a erno wondiy ta, 'Biskatik dogdoi saranniy 'e, ngu ontik woi yo an bimmad ye 'e.' ²⁵ Nzuni anani ta, 'Abano, si an dogdo fam bimmad.' ²⁶ Nen anshengku, ta lei ngoi yiya na andiy a sauwenidi, me ngoi andi bum, lei 'ei shim yo si andiy a biskeniti. ²⁷ Me nguni ana kudano, mayei ndalangkon 'e mene kasu bu, mokati nzuni wonde duginsu domno.'" ²⁸ Do si angko ei mayei, tuko dom ki marshe, a gonni Urushalima. ²⁹ Do si iko nem ki Betafaji ki Betanya, ki goshos a wunda te ta goshok zaitun, sarko majirakuni bolo, ³⁰ ta, "Nda tong gyabanis wonses nem se 'e. Na ngu rangko, ngu bola la koroi dambangko deshe beini bu. Bidati sing mokinno. ³¹ Leilo na dolko nguni, 'Kika miya ngu bide si ye?' ana ta, 'Bomu abano ndalo/'" ³² Mayei sarangko nzuniy ndangko bolangko la koroi kit shida yo Yeso ansu. ³³ A tong bide la koroi, ana bobi anansu ta, "Kika miya ngu bide la koro ye?" ³⁴ Nzuni ta, "Bomu abano ndalo." ³⁵ Nzuni makano sik Yeso, nami kakse kareisu bei koroi datante Yeso kanni. ³⁶ A tong marshe, kakngko kareisu ka bille. ³⁷ Do ndino nemki be is goshok zaitun dugzengo, shafki majiraku somangko kuyu a namshe ka Ndeyi ki dolyas na'ako kika nakshik rutai nzuni moyangko, ³⁸ ta, "Ma'iy isno tong sun Bomu abanoi an barka! Deinok lahiya baba nama ka tong baba!" ³⁹ Farisakui ma'ato tong dahis anani ta, "Malum, gilli ka majirakungko." ⁴⁰ Yeso lafko ani ta, Nen anshengku, na mamaye ye'tansu, goshaku ina lululak nama ka Ndeyi." ⁴¹ Yeso do ndino nem ki gyabanis, iko bele kato, ⁴² ta, "Ka na ngu manangkoti ei kauso, lei nguni, ei a mokitku deinok lahiya! Me kauso nzuni bungkenok idangku. ⁴³ Badi wonses a urtu katku, badis ana kudangku kokrekutik katkuk sali, nami kokrantingku, nami ritu katkuk lei hangal yiya. ⁴⁴ Nzuni oklingku eli shafki millangku. Nzuni wusa lei gosho modi ka zafto buno, kika ngu matangko kelu bu jajum yo Ndeyi nda wanga nguni." ⁴⁵ Yeso ruko tong ban donshu some roka ana goma, ⁴⁶ a anshensu ta, "Tureno ta, 'Banonno deya ban donshu,' me ngu matangko wuyok ana shiri." ⁴⁷ Yeso ishe shutantu lei tamiya tong ban donshu. Ma'i ana ruta ban Ndeyi ki malumshe ki koknaku algi ndalangko dugini, ⁴⁸ me nzuni wangko bille bu, kika algi shaf a kolshe si.