¹ ɗi wom, Kaisar Agustassarko uhe ta ɗo masni dunya shaf. ² Woi 'e masni so tono ɗo Kiriniyas mai Siriya. ³ Ka ka'a leilo nduko ture si gyabani su. ⁴ Yusufu ke hinɗak gyabani Nazarat tong Galili go n ni Yahudiya gyabans Baitalami, so a wunda te ta gyaba nik Dauda, ki ka si a shida ban Dauda. ⁵ Si nduko wonɗe ɗo mas sik Maryamu, yo si ngafka sarato ke te zeshe tili le'ya lah. ⁶ Tiyki nzuni wonɗe, sommoɗi uranto n gaminni. ⁷ Te leiko lah, lanto yo tono, ke te boɗini tong guzur molu. suntini tong gere, ki ka an bi urta ngerhahi bu ⁸ A laha eli wonse, andi ana deiyi a deino su hili a moishe temkansuk beɗi. ⁹ An eni bu, maleka Bomu a bano heteno, ke nama ka Bomu a bano iko talku gyamansu, ke nzuba ngahinsu yam. ¹⁰ Maleika ansu ta, "kada ngu kol nzuba bu, gyaron mokinku sommok zei yon zoha algi shei kuyu yam. ¹¹ Kutei 'e tong gyabani k Dauda le'in ku a wangu! si kiristi Bomu a bano. ¹² Woi 'yak tamya so a ongku, ngu bola lah kolgu boɗeno tong guzur molu gyendeno tong gerei. ¹³ An mantu bu kaba woi maleikaku shei namshe ka Ndeyi, anshe ta, ¹⁴ Nama ka Ndeyik ɓaɓa, ke ɗo ɗeinok lahiya urtu dunya gyem algi yo si kolshe zei su." ¹⁵ Ɗo maleikaku ndasuk gyeman su ndansu ɓaɓa, ana deiyi anagkok zehe ta, "Ndamu Baitalimi, mu moitu ei haelai 'e, yo Ndeyi tamimu." ¹⁶ Ndagkok roshi ke bolangko Maryamu ki Yusufu, ke moyangko kolgui gyendeno tong gerei. ¹⁷ Ɗo nzu ni moyani, anangko somok ei anan su ka lai'e. Shaf ki biyai kolang ko iyangko monmoni ka ya ei ¹⁸ ye anan koka lai'e. ¹⁹ Maryamu me ngafkok shaf ki ei te kolko,bunkinsu tong tilinto. ²⁰ Ana dyi mansu, nama ka Ndeyi ka shaf ki ei nzu kolangko ki ei nzuni moyano, kit 'yak yo anan su. ²¹ A bo ernok sommoɗi horɗo, ɗo a ini ɓato, ona ni sun Yeso, sun yo maleika oni kabui'e hawonni. ²² Ɗo sommoɗi ito yo Maryamu ki Yusufu ina ei uhe Musa angko, nzu mi mokani Urshalima ban Ndeyi dom Bomu a bano. ²³ Kit shida yo turangko tong uhe Bomu a bano, "Shaf ki lah gorzoi aha hawo a zena si bo yo Bomu a bano." ²⁴ Nzuni 'yangko onom shida yo uhe Bomu a bano angko,"ta korkodi bolo nama wukaku bolo." ²⁵ Kaba, an gorzo moɗi tong Urshalima, suni Saminu, si ngoi zina ke ongkok kannk Ndeyi. A zeshe tili ɗo si moi zena sara bo gyebak Israila, kelui bu'uno ke kani. ²⁶ kelui bu'uno taminiti ta si mata bu kaba na si moiko kiristi yo Bomu a bano. ²⁷ Kelui bu'uno mokno Saminu tong ban Ndeyi. Ɗo ana léi mokano Yeso, ini shida yo uhe angko, ²⁸ si namko si saran ni ke nam ka Ndeyi anshe ta, ²⁹ "Kauso dei ngarunko go lahiya, Bomu a bano, kit yo enigko angko. ³⁰ Ki ka idanno moiko wangug ko, ³¹ yon kolko dom algi shaf: ³² Talku yo a tama biyai Yahudaku bu ki nama ka biya n ko Israila." ³³ Bobi lei ki noni a monmoni ka ei anangko kanni. ³⁴ Saminu zafsu di barka anik Maryamu nonti kolgui ta, "woisi, zagko lah woi deyi 'yak ngeteshi ki hinɗa biyai Israila shei nki tamya so kuɗangko- ³⁵ ke ɗirɓa tugye tilinshi- kaba na safyangko dibnak biya shei. ³⁶ An Nabis so'oto sunto Hannatu wonɗe. Te baɗ Fanuyila yo shda Ashiru. Te jerito. Te ɗeikok mizinto sani bobilok bei deino gumyoto, ³⁷ ke te daushi sani bi horɗok hoɗo. Te ka moɗi de'iko ban Ndeyi bu me te rutak ɗonshu ki goli kizi, hotik beɗi. ³⁸ Jajum woi te ndino nem ki nzuni ke some kunna Ndeyi ke te iko eni ka lai 'e gyem leilo ngoi yiya yo geshe ndishe wangu Urshalima. ³⁹ Ɗo nzuni takangko shaf ki ei suba nzuni 'e yo uhe Bonmu a bano, znuni man su elik Galili, gyabanik Nazarat. ⁴⁰ Lai aya ki geɗo, sauwinni tong mantu, ke tili moɗik Ndeyi kanni. ⁴¹ Ana le'ni ndishe Urshalima lei sanis siya jajum tishik talshu. ⁴² Ɗo saninni dir bolo, har kauso kit yo lei ta miya nzuni ndagnko. ⁴³ Ɗo nzuni ɗeyangko jejum sommoɗi tishi, nzuni billa meshe bano. Me lai Yeso erinno bei tong Urshalima ana lei ni manangko bu. ⁴⁴ Nzuni zeshe tili si hawok dahik biyaiamarshek nzuni, har 'yangko marshek goli moɗi. Nzuni some gyala si gyem yagyenansu ki sha'ensu. ⁴⁵ Ɗo nzuni wangko si , bu men su Urshalima some gyala si wonɗi. ⁴⁶ Ki bei kit sommoɗi kunu, nzuni wagko si tong ban Ndeyi, a deinonni tintil malumshe, kolshe nzuni ke dolshe nzuni. ⁴⁷ Shaf ki biyai kolangko si a monmoni ka mantuni ki lafyanni. ⁴⁸ Ɗo nzuni moyani'i, monmoni ngahinsu. Noni ani ta, "Lahno , lolo ko imu ka'a? Koli, bokok ne'e kato gyala ko yam." ⁴⁹ Si ansu ta, "Ki bo miya ngu gyala ne?Ngu manangko bu ɗo tan ɗeya ban bonyi'e?" ⁵⁰ Nzuni me managnko hawok enini'y bu. ⁵¹ Si mennik nzuni kaba Nazarat a ɗaha nzuni. Noni me ngafikok ei woi a tong tilinto. ⁵² Yeso me tuko dom ki aya tong monmonik zugo, ke sauwinni tong mayaba dom algik Ndeyi.