¹ Yeso anko majirakuni "Manoti ta an ei yo a zoha mu ei zunhu, me titiku ngoi zunhu dinok gyema ni!. ² A ina zina ngar gosho bunco gi'yani nami olni tong haushi, na si zob ko moɗi hawok mamaye mimi'i zunhu. ³ Sa simɓotku. Na yagyenangko iko zunhu, zob ni kola idani, ken an si wanglini, yahinni. ⁴ Na si iko zunhu ka babilo tong goli moɗi, ke ka babilo meno gymako,anko, anshe,'Ne wangk' ko yaheniti. ⁵ Ana ɗeino kusaniananko Bomu a bano, "Sauwimudi ona jire." ⁶ Bomu a bano angko ta, 'Na ngu anandi ona jire mama'i kit ela sherka, ngu giti anshe woi na'akoi ta, 'Shaftik wonɗe ko go ke katko tong haushi,' ke te ɗaha enitko. ⁷ Me ngoi yiya hotonku, na an ngaruni'i isheni mara tong kori nama deita ni temkani kori, na si meno ani ta, 'Nditi marei deyi ko te wo'oto'? ⁸ Si ani ta, 'ramte no wo'oto toi, ko ngar jenitko ko ono kaba ne caka tishi seshi. Ki bei ko ke ko tinaki sheshi? ⁹ Si kunna ngarui bu ki ka si iko ei zoban ko si,si iko ka'a ɗo? ¹⁰ Ka'a ke, nguni na ngu 'yanko lei miya yo zohanko nguni, anata, 'Mu ngarunshei zina. Mu yanko ei yo suba me 'e.'" ¹¹ Hoti yo'oto ɗo Yeso ka billa go ni Urshalima, siɗafko bo ernok eli Samariya ki Galili. ¹² Ɗo si ruko tong gyenga hara so'oto, si gomko ki aligo biyaimato su ana wale. Nzuni eranko gyerak si ¹³ ke nzuni hafta ɗolyonsu, anshe ta, Yeso, abano, tu jigyayinmu." ¹⁴ Ɗo si moiko nzunim, si ansu ta, "Nda ngu tam katkuk ana ruta ban Ndeyi." Ke hala ka'a,ɗo nzu kato marshe, nzuni daran su. ¹⁵ Ɗo moɗi hawonsu moiko ta si darinni, si menok bei, ki ɗolyai geɗo namshe ka Ndeyi. ¹⁶ Si kuba ka sheke Yeso isheni kunani. Si me ngoi Samariya. ¹⁷ Yeso lafko,moishe ta, "Daranta biya bimmaɗ budu"ɓonum ye tiya? ¹⁸ An ngoi meno nama ka Ndeyi bu, kaba ngerho woi'e?" ¹⁹ Si anita, "Hinɗi ko 'e marshetko. Ona jiretko darintinko." ²⁰ Mafarisaku dolangko ta mene Ndeyi dutu ta miyai 'e, Yeso lafshe anshensu ta, "Ndishe Mene Ndeyi a ina kit ei biya moishetok ido bu. ²¹ Ke nzuni gita ana ta, 'Moi wonɗe!, ki ka mene Ndeyi hotongku." ²² Yeso anko majirakunni, "Sommoɗi (a) isno yo ngu tili moi moɗik hawo sommoɗi lah ngo, me ngu moya bu. ²³ Nzuni ana ku ta, 'Moi wonɗe! Moya, wonɗi!' Me ngu moyi bu, nama ngu ɗahik nzunu, ²⁴ Ki ka kit talku talshanta ɗo te hetenok lahei keɓe moɗi go di lahai yo'otoi, ka'a ke meshe lah ngo goni ɗeya a sommoɗi ni. ²⁵ Me yo tono kaba (d) na si sa maito yam dongo, ke kuɗi ni gyem biyai shida ni. ²⁶ Kit yo hala sommoɗi Nuhu, ka'a ke a hala a sommoɗi la ngo. ²⁷ Nzu tishi ki sheshe, nzuni babno, ke a onshe babno millansu, kaba hoti yom Nuhu ruko tong gere- ke ham tufana dino dugin su shaf su. ²⁸ ka'a ke hala sommoɗi Lutu-nzuni tishik sheshe, a keje a boitu,a kahi, ke a sali. ²⁹ Me sommoɗi wom Lutu wosko eli Saduma, kasano yesi ham ki gosho kolnok ɓaɓa duginsu shafsu. ³⁰ A ɗeya ka'a ke ɗo tammanko hoti lah ngo. ³¹ Hoti woi,ngoi deino ka bano urtu buta ɗo si nam karei nikori bano. Ka a ke ngoi tong kori metu bano bu. ³² Diɓ nak Lutu. ³³ Leilo na nda dasa zauni a yaktitite, ngo me a yaktitko zauni a dasa te. ³⁴ Nen anshenku, a beɗi wonse biya ɗeya ka indi moɗi. A namti moɗi, a wuadi moɗi. ³⁵ Monde bolo eso zug zehe. A namiti moɗi, wusdi moɗi." ³⁶ Biya bolo tong kori, a nam moɗi wusdi moɗi. ³⁷ Nzuni ta a tiya, bomu a bano"?Si (a) lafsu, " Beis an gubu, wonɗe ke Gyedɓashaku daha."