¹ Ɗo nzuni kato eniy woi, ɗo algi shei dahagko bei moɗi, ta kaba nzuni befde zehe, si anik majirakuni yo tono, "Ya danum ki yeast yo mafarisaku, ki ka wonses ngadar. ² Me andi ei tong eheno haɗa te bu, ke an ei bugkeno yo a hoɗa te hili bu. ³ Ɗo ma ei ngu ananko tong tutuɗu a kolti te tong talku, ke ei ngu ananko tong kumo a tong by na'ako a hoɗito ka bano. ⁴ Ne anshegku sha'eno bunji, ngu ei zubk ngoa duya zugogko maɗabi bu,ki bei woi ngu andi ei ngu ina bu. ⁵ Men ella kumagku ka ngoi ngu kola zubani. Kola nzuba ngo, yo bei si dugko, ke an geɗo ola nguni tong yesi. Ka'a, ne anshenku, kola nzubani. ⁶ A boita korkodi bad boyu kobo bolo budu? Shaf ki ka'a a mantei moɗi bu dom Ndeyi bu. ⁷ Me shaf ki som katko masno. Ngu ei zubabu. Ngu wallanko korkodi gyem Ndeyi. ⁸ Ne anshen ku, lei lo na tamko ona jireni kano dom alji, lah ngo ke ina eni kani dom taktakaku Ndeyi, ⁹ me lei lo kuɗino gyem algi ne kuɗini gyem Taktakaku Ndeyi. ¹⁰ lei lo na anko disa ka lah ngo a yaheniti, me na ngo angko disa ka kelui bu'uno, a yaheni ni bu. ¹¹ Na mokino nguni dom koknaku, ana mene, ki ana uhe, ngu damte ka ei ngu matesu bu, nama ei ngu ana, ¹² ki ka kelui bu'uno a shute ku ei ngu ana jejum ni. ¹³ Moɗi hawok algi anita, "Malum, anik benono si tike gyado ki ne'e." ¹⁴ Yeso anita, ngo, "Zane'en lo ɗon ɗeyi a sharya kalku a deino tintilkjui 'e?" ¹⁵ Si anita "'ya danum kadan ndey a ha ɗaku bu, ki ka zau wallitko shafki karei ngo andi." ¹⁶ Yeso jo ansu di sere bo ngamo, ta, kori a darai moɗi leiko tim, ¹⁷ si dibko ki kani, anshe, tanen ina miya, nen an bei's ne zahta tiya bu ye? ¹⁸ Si ta, 'Ne ina woi'e. Ne rugzitik dogoginno ne sal yo geɗa to, ne kasa shafki karei korino ki kareinoi zina. ¹⁹ Ni anik tilino, ta tili, ko andi karei zina so wanko yo a deya bo sani shei. Huti nyanko, ti, se, ko ei ko kol zei tili." ²⁰ Ndeyi me anita, 'koi yagna, a nam ko tik zau ko ki beɗi wonse'e, karei yo ko za, a ɗeya yo lo? ²¹ A ɗeya nka'a ke ki ngoi yo daha dara bo kanni si ke an dara Ndeyi bu." ²² Yeso ankok majirakuni, ngu damte ka zau ku bu- ei ngu tina, na me ma zugonku-ei ngu ola. ²³ Ki ka zau wallitko wo'oto, zugo ke wallitko karei ²⁴ Moya rayinshe, nzuni kahi a kahi a zunkobu. Nzuni an dogoji an karamfe bu, me Ndeyi onshensu wo'oto. Ngu gyɗa rayinshe ka mono? ²⁵ Ngo yi ya hotongku a giti sauwidi lei sommoɗi moɗi ka zau ni? ²⁶ Na ngu gita ina shida ei mimi'i ka'a bu, ki bo miya ngu damte ka ma'ato 'e? ²⁷ Moyan santai riya- billei nzu aya. Nzuni ruta bu heter bu billei unu. ki ka'an anshenku, lei Suleimanu tong nama kani zobko karei kit nzuni bu. ²⁸ Na Ndeyi namshe karei ka santai riya ka'a yo kute an zau moishe kute, ɗonshi me oliti tong yesi, bellei nguni ka mono, nguni ana mimi'ik ona jire! ²⁹ Ngu gyale tishi ki seshi bu, ke ngu damte bu. ³⁰ Ki ka shaf ki disa dunya gyala ei mamaye, ke boku manonti ta ngu ndalankoonzuni. ³¹ ngu barke , a onkuti shaf ki 'ya woi'e . ³² Ngu ei zubabu, dahi mimi'i, ki ka boku kolshe zei onku mene. ³³ Boi tati shaf ki karei ku ngu oni ana mure. Ramta lalinytar yo yabta bu-daras ɓaɓa yo wuye bu, bei a shiri gitaa rina bu, ke gegyado gita yabtabu. ³⁴ Ki ka beis ko za kareiko, tilinko deya wonɗe. ³⁵ Ɓatati suɓan kui gera ke ngu ngarti gegeben ku, ngu dei yesinku 'e talku, ³⁶ deya kit biyai gesa bosu a bano ɗo si mekuk ba babno, na si gofko bo duɓano, nzuni eheni. ³⁷ Ngaru mamaye ɗeyak barka, ɗo na basu aban nzuni gesa si. Nen anmshen ku jire, si hotik ti kareini , nzuni ɗeyi beik tishi, si onsu wo'otok sarani. ³⁸ Na si dinok bo bo zoni nama tintil beɗi, nama ka Bebedi, na bolno nzuni gesa si, ngaru mamaye a ɗeya ana barka. ³⁹ Har kauso manonti mamaye'e, ta na a bano manoti jijum a shiri ndutu, a ɗeya wara monsom a ngeniti rishe banoni. ⁴⁰ Ɗeya ka shekenku, ki ka ngu man jejumyo lah ngo ndutu bu." ⁴¹ Bitrus ta, "Bomu a bano, ko anshe sere bo ngamo wonse muni moɗa mu ɗo ke ki lei lo? ⁴² Yeso ta, "A ruta jire ki wayos lo yo Bobi a bano zena si ka ngarunshe ni ɗo si onsu wo'wtonsu jejumni ye? ⁴³ Ngarui an barka, yo Bobi a bano boltusi ishe ka'a ɗo me no. ⁴⁴ Ne anshenku jire ta si zena si ka shaf ki karei ni. ⁴⁵ Me na ngarui anko tong tilini, 'bono a bano metu kalau bu, 'ke si soma jibo ki sha'enni ngarunshe gorajik monde, si tishe ki seshe, ⁴⁶ Bobi a bano metu hoti'yo si za tilibu, ke jejum si man bu, a ɓaɓtini jila-jila oni bei ɗeinok ana mure ona jire. ⁴⁷ Ngarui yo manoti bobi a banoi, ke ramtitko zugonni nama rutitko ei si ndalo, a sena jibo yam. ⁴⁸ Moɗi me yon man bu ke iko ei suba jibo, a ini jibo shim. Me leilo onani ei shei , ki gyemani ke a zena tili ka ei shei, ngo yo onani shei, ke dolshe ka shei. ⁴⁹ Ne ɗino kasa yesi ka dunya, ke ne zeshe tili ta kauso yesi tishe. ⁵⁰ ne an baptisma so a ina men zobko tali a te kabana 'yano te. ⁵¹ Ngu dibshe ke tan mokno ɗeino lahiya dunya ɗo? ka'a bu, ne anshenku kaba tika ka. ⁵² ki ka'a kauso godi dombiya bad tong bano moɗi tikisu -kunu gahak bolo, biya bolo gahak kunu. ⁵³ A tikinsu, boti gahak lah, lah ke gahak boti; nonti gahak ba'ato, ke ba'ati gahak nonti, sorki gahak sorki to," ⁵⁴ Yeso anko algi ta, "Na ngu moyanko keɓe bo jeni, nguni anshe ta, 'Ndeyi goto ham,' ke a ishe. ⁵⁵ Na hibla bo haushi bui ko, nguni ta, 'a ina kuraru yam, ke a ɗeishe ka'a. ⁵⁶ Ana ngadar, ngu mananko anahawok 'yai eli ki ɓaɓa,me 'yanko lolo ngu mananko tong ei hele kauso bu ye? 7ki bo miya ngu tika ei zina ki ei zina bu 'ye? ⁵⁸ Ki ka na ngu marshek bo gotku gyem go ku gyem a sharya, tinki ka bille i si kalku ngu ramtitik eni 'e ki si ɗo kada si mokko gya a sharya bu, ki bo a sharya oninko ana ruta, ana rytaolijko tong rono. ⁵⁹ Nen anshenko, ko hetek wonɗi bu kaba na ko tuha lei miya shaf to.