¹ Aka ka'a namu ze hankalmu ɗaf kada yo'oto a kine ki rishe bang huti so Ndeyi zemu. ² Ona mutik dindo kit yo onangsu . Make sarnis anko nzunibu kiboonangko jire ki sarnibu. ³ Kibo muni yomu onangko jirene mu rina bang huti kit yo si ongko hushinno nzuni rina bang hutibu'' shafki ka'a rutani yo sala dunya takato tungki sartik zala salate. ⁴ Aka a be'isso'oto aka somboɗi babilo. ''Ndeyi huta ki rutani ,'' ⁵ Har kaiso anangkota'' Nzuni rina tong hutinnobu''. ⁶ Har kaiso kibo dasangko ma'ato bo rishe tongko huti, me Israilaku shei ma kolangko sani so zei wonse'e iowangko rishe huti wonsebu kibo kuɗa ɗaha uhe, Ndeyi, ⁷ Ndeyi jo za hotisso'oto ta. ''Kute'e.'' Ki bei somboɗi shei, iko eni kibo Dauda kit yo onangko ki kalau. ''Kute'e na ngu kolangko ɗolyani, kada ngu ho'ite tilingkubu.'' ⁸ Kibo Joshuwa onsutik huti, kana Ndeyi iko eni aka hoti yo'otobu. ⁹ Kibo ka'a har kauso andi hoti Baɗis gebe so huti dasangko ki biya Ndeyi. ¹⁰ Ngo kena runni ban huti ki Ndeyi, hutini kibo rutani, kit yo Ndeyi huta ki yobi. ¹¹ Kibo ka'a 'yamu yuta zina ki ka mu goh wonse'i bo kada ko ngo moɗi a ro tongko shida yaklu ɗaha uhe kit yo manakshi 'yangko. ¹² Meke eni Ndeyi an zau ke boni ta'ano geɗatkok bo dirɓa yoyiyake. Har a tikangtik gebek zau ki Kelu, ki gebek tuɓa ki nza-nzalo. A mangtitik 'yei bang tili anshe ki 'yaite ndali. ¹³ Andi 'Yai Ndeyi iko, yo bunkinni kibo idi Ndeyibu. 'Yei miyake a hili hetreno bi idani yo an tangtamanbu, mu masni 'Yangko. ¹⁴ Kibo mu anangdi na'akok malum yo ɗafno ɓaɓa, Yeso La Ndeyi, kaba mu ngab ona jiremu zina. ¹⁵ Kemu anandi na'akok malum yo damtaki jigyayik kasamu kibo ka'a kemu anangdi yo'oto yoki billei yiyake kabtangko si kit muni me ke wangko si ki zunhubu. ¹⁶ Kauso sai mu ndtu dom njakɗak Ndeyi ki geɗok nzugo a mene Ndeyi yo tili moɗi, bano mu biske onom ki tili moɗi yo shata biya yo tongko damto.