¹ To biyano yomu lahangko eshik Ndeyi. Diba Yeso, a sarni ki na'akok malum yomu tamshe ona jirenmu. ² Si biskeno gem, Ndeyi yo onio ruta kit yo ongkok nabi Musa yo ɗeyini biskeno a bang Ndeyi. ³ Yeso suba namte ka so geɗatkok so musa. Kibo ngoi yo salko bano geɗatkok banos ki namtaka. ⁴ Banos siyake andi a salito, me yo sala 'yai miyake Ndeyi. ⁵ Musa bidan biskeno a bang Ndeyi, aonshe saida aka 'yai yo hele ki dom. ⁶ Kiristi me si la a mene a bang Ndeyi. Muni ne banoni namu ngahangkok zoha tilimu. ⁷ Kibo ka'a kit yo Kelui bu'uno ongko ''kute'ye na ngu kolangko ɗolyani. ⁸ Ngu ho'itangte tilingkubu kit yo ma israla 'yangko a tongko habta hangkal a riya. ⁹ A sarti wansi; i' dikenku hitnatangku ne'e ki bille kabta ne'e ki bei moya 'yayo ne isu a tongko sani bi hoɗo. ¹⁰ Kibo ka'a ne hushinno ki ma zaman woiye'e. A tamiyake a ku'ushengtik ɗaha ne'e bang tilingsu. Manangko billeno bu.' ¹¹ Kit yo ne tuko ana atong hushi. ''Nzunhu wena rishe banhutinnobu.''' ¹² Mata hangkaliku yagyana kada a hototku a boltu le ngo moɗi ki disak tili yo kuɗa ona jire, tili yo wangla bei ki Ndeyi. ¹³ Kibo ka'a nzati hangkalku ki zehe a tomiyake kada yo'oto a hototku a hoi'ititk tilini kibo zunhu so ngadar. ¹⁴ Kibo mu ɗeyanmu ana ruta ki Kiristi nama ngahangkok zoha tilingku ki geɗo, ki zalshengto har bo ernoto. ¹⁵ Aka woiye'e anangko ta "Kute'e na ngu kolangko ɗilyonni, kada ngu hoi'ite tilingkubu, kit yo sartik shana so geɗa." ¹⁶ Maye kolangko eni Ndeyi a shangtesi ye? Nguni ki Kesarye budu? ¹⁷ Maye Ndeyi iko hushiki nzuni bo sani bihoɗoye? Biyaima 'yangko zunhu budu, biyaima gubangsu yarɓano tongko riyaye? ¹⁸ Aka matiya Ndeyi tuko ana ta nzuni a rina jannabuye? Na maye ku ɗangko ɗaha uheni buye? ¹⁹ Kemu moyangko gitangko rishe bang hutinibu kibo yaklu ona riresu.