¹ Kibo ka'a mu mata hangkalmu zina aka 'yai yomu kolangko bo kadama sutimu ki bongto. ² Na eniwoi yo heteno kibo taktakakui na ka'a ke daha uhe ki kuɗa daha uhe na kabtangko ki maito su. ³ Mu wala lolo na kudangkok wangu wonse'e? woi wangu so Bomu Apbano ki kanni tingki botono onko moye yo kolangko ki noni nami ngardi geɗo. ⁴ Kibei ka'a Ndeyi ki kanni tamsu ei amoyai aon jire kit 'yak mongmoni gedgede gedgede ki ruta Kelui Bu'uno gedgede gedgede ki biya kit yosi ndalo. ⁵ Ai kibo taktakaku Ndeyi gonni ina dunya somu eninto so isnosbu. ⁶ Me yo'oto a beis so'oto angkota, ''Ngoke miya yoko damta kisi? ⁷ Ko iko ngo kasa taktaka lashimi ko boiɗo kanni ki kile yo namtaka ki na'ako. ⁸ Ko zani aka shafki 'yai yo ko iki, joko zobkok Ndeyi onitik mene aka shafki lemiya. An 'yao yo si warabu. Me har kaiso mu moyangko a ishe shafki 'yai zohangko a delinbu dongo. ⁹ Me mu moyangko yo'oto yobo sarti shim zohangkosi a kase taktaka. Sine Yeso yo boiɗangkosi ki namtaka ki na'ako kibo sena bonenni ki mato, woime shaf ki bo tili moɗi Ndeyi zobko Yeso damɓa mato abo lonku. ¹⁰ Aka zina a gem Ndeyi, kibo eimiya a ɗeino bosi keki gemani, Bono matko algi shei hoti namtaka. 'Yei zina a gemani yo wangu a ɗeyi bu'uno ki bille sena bonenni. ¹¹ Kibosi yo bu'ushei'ye kima buɗangko'ye shaf ki korigsu moɗi kibo ka'a akoishe kawak esha nzuni yagyanabu ¹² Dosi angkota, ne kunna koi ki 'ai ko a tongko ɗahi algi.'' ¹³ Har kaiso, ''Anko ta ne ona gedonno kisi.'' Har kaiso, ''Moya woi ne'e ki milla ma Ndeyi ono.'' ¹⁴ Kibo ka'a tinda milla Ndeyi a dahi ka lu ki dom, Yeso ke a dahi ka zehe ki nzuni, kibo ki lehe mato si lalatitik bok zoha mato wato singkau. ¹⁵ Bono a hoɗ biya yo tin le'isu a tongko ɗeinok nginhu bo zubak mato. ¹⁶ Jire a shata taktaka bu, me turbak Ibrahim nzunine damtani. ¹⁷ Kibo ka'a suba siɗeyi kit yagenansu ki lehe yo yiyake, dona si ɗeyi a tili moɗi, ke na'akok malum yo ona jire aka ruta Ndeyi, bono metu yaha zunhusu. ¹⁸ Aka Yeso ki kanni sa bone ke kabtangkosi ke gitkok shata biya yo kabtangko nzuni.