¹ Kika ka 'a daha bille Ndeyi, shida yo millaniy ndalo. ² 'Ya marshe tong ndaltu, shida yo Kiristi ndalta muni ongko zaunik kammu. Si 'yak onom ki sadka, deyi atursak suntanta tili Ndeyi. ³ Bol ngunik hali aza domana deinos disa ki zodok hototku bu, kika woi zina bu gem ana ona jire. ⁴ Bugdo deyi hototku bu, yaknak eni, ki goyou so disa, so gomko bu. Ki bo woi deya ana kunani. ⁵ Woi ngu mantiti ta an aza, bugdo, domana ana zodkom, wom, ana goro, anan gyado tong ban mene Kiristi ki Ndeyi bu. ⁶ Ngu wusi ngo youte ngunik eniy sarei bu. Kika 'ya woi yabtu tili Ndeyi isno urshe ka milla ana mure kola eni. ⁷ Ngu deyik nzuni bu. ⁸ Ka ngu tong tutudu, kauso me ngu talku tong Bomu abano. 'Ya marshe kit milla talku. ⁹ Le is zinai andi talku tong lei ei zinas siya ke, bu'ushi, ki jire. ¹⁰ Gyazi 'ei yo a gomshentik Bomu abano. ¹¹ Ngu gomte katkuk le 'is disa ki ruta tutudu bu. A ka woi, hokdansu hena. ¹² 'Ei nzuni ishe tong bungkoi 'yak kawa ma'i ani. ¹³ Lei miya shaf, na talku, ndinoi a haktasu hena. ¹⁴ Lei miya na tamaniy deyinni talku. Kika ka a angko ta, "Hindi, koi a monsom, hindik hotok ana mato, Kiristi deya talku katko." ¹⁵ Mata kelu ki deinotku-kit biyai yaknaku bu me ana wayo. ¹⁶ 'Ya rutak sommdi kika sommidiy disa. ¹⁷ Ngu deyi yaknaku bu. A bo woi, manta 'ei tili Bomu abano ndalo. ¹⁸ Ngu se mishi bu, kika wom a mokshe ngo tong bo'yo. A ka woi, ngamak kelui bu'uno. ¹⁹ 'Ya enik zehe tong Zabura ki arko namik arko kelui bu'uno. 'Ya a rko nama ka Bomu abano shafki tilingku. ²⁰ Lei tamiya ona kunani ka lei miya a tong sun Bomu abano Yeso Kiristi godi ka Ndeyi Boti. ²¹ Suntanta katkuk zehe tong zubak Kiristi. ²² Monde, suntanta katkuk zazingku, kit ki Bomu abano. ²³ Kika mizi ka mandi, ki shida yo Kiristi ke ka ban donshu. Si a wanga zugo. ²⁴ Me kit shida yo ban donshu ongko katok Kiristi, ka a ke 'e monde kaba sunte kasuk zazinsu tong lei miya. ²⁵ Goraji,ndalta mondengku kit shida yo Kiristi ndalta ban donshu ongko kannik kato. ²⁶ Iko woi do matinto bu'uno. Si bu'uko tek ham tong eni ni. ²⁷ Iko woi do we ban donshu yo nama ka, wara bugdo domana wara ei disak moino, me ki bo woi deyi bu'uno ke wara leihi. ²⁸ Ka a ke 'e, goraji suba ndalte mondensu kit 'yak zugonsu. Ngoina a ndalta mandi a ndalta kanni. ²⁹ An ngoi damba kuda zugoni bu. Ki bo woi, kaba rambte ke ndalte si, kit shida yo Kiristi ndalta ban donshu. ³⁰ Kika munim biyai zugoni. ³¹ "Kika woi gorzo wustik bobi ki noni gomte kannik mandi, boloi a deyisu zugo modi." ³² Woi jires na'ako so bungkeno, men eni ka Kiristi ki ban donshu. ³³ Shafki ka 'a, shafku leilo ke kaba ndalte mandi kit kanni, mandus ke on na'akok mizinto