¹ Milla, ona nakshik ana le'ingku tong Bomu abano, woi zina. ² "Ona'akok boko ki nongko" (woi uhe yo tonok ngara eni), ³ "A zohang 'e deinok lahiya ke ngu nasa dunya." ⁴ Ke, bobenti, ngu zof millangku yabte tili bu. Ki ka woi, jugta nzunik merwe tong Bomu abano. ⁵ Ngaraku, ona na'akok bobengku ana bano ki suntanta ka tong lei miya, ki tili modi. Onasu na'ako kit shida yong onak Kiristi. ⁶ Ngu on na'ako kika moya ida bobengku ana bano dong suntante su tilinsu bu. Ki bo woi, suntanta ka kit ngaraku Kiristi. 'Ya 'ei Ndeyi ndalo ki tong tilingku. ⁷ 'Yani rutak tilingku shaf, kit ngu ishek Bomu abano bayak algi bu, ⁸ ngu mantiti ta lei shida 'ei zinas siya na ngo ikoi, a biska bo hawonnik gem Bomu abano, lei si ngaru do lai bano. ⁹ Nguni ke bobenti ana bano, 'ya ka a ke 'ek ngarakungku. Ngu maite nzuni bu. Ngu manangkoti ta woi yo si Bosu abano ki yokui a tong baba. Ngu manangkoti an ngoi walla yo'oto bu gemni. ¹⁰ Tatakato, deyak gedo tong Bomu abano ki tong gedo mene ni. ¹¹ Ngara karei kesi yo Ndeyi, zohing we gedok ershe dom singkau. ¹² Kesimmus ki luh ki dom bu. Ki ka woi, mu ishek algi bu kabak singkau ki ana rutanta disa, ki kelui disai tong baba. ¹³ Ki ka ka'a ngara karei kesi yo Ndeyi, zohing we gedo song era dom singkau tong sommodi woi disai 'e, na ngu takangkok lei miya, eratku ka babilotku. ¹⁴ Kika ka a era ka babilotku. 'Ya woi ye 'e na ngu ngarangkok jenitku jire tili modi deyi suba kesingku. ¹⁵ 'Ya woi ye 'e na ngu zohangkok shekengku moka somos zei so deinok lahiya. ¹⁶ Lei tong shida haliy yiya nama 'yak kashsha ho'osho so ona jire, ki woi ngu gitik dugya yesik ho'oshok ngoi disa woi ye 'e. ¹⁷ Nama teijkak wangu ki dirba Kelui bu'uno, wato eni Ndeyi. ¹⁸ 'Ya donshu lei tamiya ki gyazu, 'ya donshu lei jajum yo yiya tong kelui bu'uno. Ki shida woi, sa simbotku ki donshu ka ana ona jire. ¹⁹ 'Ya donshuk kanno, do eni Ndeyi nditu gemno nan aha bono. 'Ya donshu ne we gedok ana somos zei so bungkeno. ²⁰ Kika somos zei ne deyinno wakili tong yakla, do ne we gedok eni hawoto nan hinda ishe. ²¹ Me nguni ke ngu mante shida 'ei ne hawonni, Tikikus, yagena ngarui ongkok jire tong Bomu abano, a angkutik lei miya. ²² Ne sarko si gemku kika 'ei woi ye 'e, kika ngu mante 'ei mu ishe, sike a suntanteku tilingku. ²³ Lahiya deyik yagenaku, ki ndaltuk ona jirek gem Ndeyi Boti ki Bomu abano Yeso Kiristi. ²⁴ Tili modi deyik mayei ndalangko Bomu abano Yeso Kiristi ki shida ndaltui a mashe bu.