¹ Kika ka a, kit 'yak a ronok ka Bomu abano, ne donsha nguni 'ya deinos suba ka wundis Ndeyi iku. ² Deyak na'akok tili bu kek hitna bu mek habri. Biska zehek ndaltu. ³ Ngara titingku ngu ngaftik gomta ka wonses kelui bu'uno gomta tong lahiyas 'e. ⁴ An zugo modi ki kelui bu'uno modi, ke an zoha tili kit 'yak wundis 'yangku. ⁵ Ke an Bomu abano modi, ona jire modi, baptisma modi, ⁶ ki Ndeyi modi Boti lei miya. Siy a babak leilo a hawok lei miya ke tong lei miya. ⁷ Ongko onom ki leilo jajum yo Kiristi kabta. ⁸ Eni Ndeyi angko ta: "Jajum yo da baba, worko bayaku moko nzuni, Iko onom ki algi." ⁹ Woi ngafko miya, "Si da baba," kaba na sike jo urno eli? ¹⁰ Ngoi urnoi modik ngoi da baba gera yam. Iko woi ta do ngamte lei miya. ¹¹ Kiristi iko onom kit ka 'a: majiraku, Nabaku, ana wazu, Pasto ki malumshe. 2 Iko ka ai do ramte ana ona jire kika ruta, do salni zug Kiristi. ¹³ A ishe ka ai kaba namu bolangko gomta ka wonses a tong manta lah Ndeyi. A ishe ka ai kaba namu kanshangko mu tadatik manta Kiristi. ¹⁴ Woi deiko ka ai ta bolom deidi kit milla bu. Woi a zoham wus bille kika shutantui yo'oto bu, ki be'i wayo ki bille youta biya bu. ¹⁵ Kika woi me mu ana jire tong ndaltu kem aya hawoto lei tamiya hawok woi yo si kai 'e, Kiristi. ¹⁶ Kiristi gomtak zug ana ona jire be'i modi. Ngarno be'i modi tong lei miya do zugoi a aye sal zehe tong ndaltu. ¹⁷ Aka woi ne anshengku, ne zofshengku kola ido tong Bomu abano: ngu idi marshe kit ana mure ona jire bu ana marshe tong 'ei tilinsu ndalo. ¹⁸ Dibnasu disa. Tikansuk zau ki Ndeyi kika mure mantunsu ki ho'ikok tilinsu. ¹⁹ A kolshe kawa bu. Onangkok kasu ka rutanta disa tong lei shida miya. ²⁰ Me woi shida 'ei ngu shutangkok gem Kiristi bu. ²¹ Ne zofko tiling kolangkok somonni. Ne zofko tiling shutangko hawonni, kit 'yak jires a gem Yeso. ²² Kabang yabre shida 'ei ka ngu ishe onzi, hali ngo. Hali ngoi a dabtanni kika ndalta 'ei a dabtanni. ²³ Yabra haliy onzi kika ngu we deinok kelui bu'uno tong tilingku. ²⁴ 'Ya woiye 'e kika ngu haliy zina, tong bille Ndeyi. 'Yangko si tong jire ki bu'ushik jire. ²⁵ Wusatik rerei. "Ana jire, lei ngoi yiya ki a bo gendangko," kika mu sha'enti zehe. ²⁶ "Yabta tili, me ngu 'e zunhu bu." Ngu wusi yabtu tlingku mok ngete hoti bu. ²⁷ Ngu on be ik singkau bu. ²⁸ Leilo na a shiri sauwidi shiri bu. A ka ka'ai, a 'e ruta. A 'e rutak saranni, ki bei ka ai a jouti wena 'ei a gitik onshek ngoi ndalo. ²⁹ Ngu wus eniy disa hetetuk bongku bu. Ki bo woi, eniy a hetetui deyi yo a sauwa biya ka 'ei ndalangko, mayei a kolshei a sauwe. ³⁰ Ke ngu yabte tili kelui bu'uno yo Ndeyi bu. Bungkangko ngunik gemani kika badik wangu. ³¹ Yabtu tili, gyaha, shana, ki washi, ki shida rutai disa. ³² 'Ya 'ei zinak zehe. Kola jig-yayik zehe. Yaha zehe, kit shida yo Ndeyi yaheku tong Yeso.