¹ Kika ka'a ne 'e, Bulus a ronok ka Kiristi Yeso kika ana mure ona jire. ² Ne manoti ngu kolangkok somok tili moɗik Ndeyi yo onok katku. ³ Ne turengku kit shida yo Ndeyi tamno. Woi jires bungkeno son tureku kato. ⁴ Na ngu karantangko woi, ngu gitik manta ei tong jire wonses' e ka Kiristi. ⁵ A tong sommoɗiy ma'ato tamangko jire wonses ki milla biya bu. Kauso me ahantok gem kelui bu'unok majiraku ki Nabakui bu'uno. ⁶ Jire wonses bungkenos ta ana mure ona jirei ki bei wazuk Masihu gyadommu deyito modik nzuni tong Kiristi Yeso. ⁷ A ka woi ne deyinno ngaru ki be'i onom ki tili modik Ndeyi so onok be'i ruta tong gedonni. ⁸ Ndeyi ino onom wonses 'e, lei tan mama'i tong mayei zansu gengak ka Ndeyi. Onom wonses ta ne e wazuk ana mure ona jire ka Kiristi somos zei so an ngoi a gita masi bu. ⁹ Ne anik algi shida rutai Ndeyi ishe si tong bungko. Woi ei Ndeyi bungkai 'e tingki onzi, yo iko lei miya. ¹⁰ Ei tiliniy woi ye 'e, ki gem ban donshu, ana mene ki gedo tong baba a mantitik mantu Ndeyi gedgede. ¹¹ Woi a hele kit shida yo Ndeyi kabta do ngamik gem Kiristi Yeso Bomu abano. ¹² A hawok Kiristi mu anan gedok tili kika ona jiremmu gemani. ¹³ A ka ka an donsha nguni bogebatku ngete bu kika bones ne seshek katku. Mamaye ma nama katku. ¹⁴ Kika woi ne kasko buruno eli dom Boti, ¹⁵ yo zofko sun ki lei miya tong baba ki eli. ¹⁶ Ne donshu si ongku, 'ya shei ki tong darjanni, ongku gedo ki gedok kelui bu'uno, yo a hawotku. ¹⁷ Ne donshu Kiristi deyi tong tilingkuk be'i ona jire. Ne donshu do ngu katik shori tong eli zina ki be'i ndaltuni. ¹⁸ Ering deyi tong ndaltuni zohing mante, shafki kine ana ona jire, na'akonni miya, geranni, ki zornok ndaltu Kiristi. ¹⁹ Ne donshung mante na'akok ndaltu Kiristi, yo wallak mantu. Ering 'e woiye 'e kika ngu ngami ki ngamtu Ndeyi. ²⁰ Si yo a ishe 'ya shei, yo wallak 'ei mu donsha do ei mu dibnanni, ki be'i gedonni so a ruta hawommu, ²¹ nama kas sobi tong ban donshu ki Kiristi Yeso shafki sommodiy an bo ernosu bu. Amina.