¹ Kika ka'a, onzi mu gitanko ngara tilimu bu, moishe mu 'yanko dibna a ina zina mu iri a Atina. ² Moishe mu sarnanko Timoti, yagananmu a ruta Ndeyi a somok kiristi, aka ngarshemu geɗo a onshemu habri aka billa ona jire. ³ Mu 'yangko ka'a aka kada yo'otok hotokku zugoni samɗe aka shida bone mamaye. Kika nguni guda katku ngu manankoti wundagko muni kika ka'a. ⁴ Ki jire, jajum yo mu zuk zehe ki nguni, mu ananku ta mu 'yanmu nem sena bone, ke ka'ai halanni, kit shida yo ngu mananko. ⁵ Kika ka'a kana nen gitko habri bu, kana nen sarneno nen moi shida ona jiretku. Na ndabu akabtu kabte nguni ki billei yo'oto, ke bonetku a ɗeyinni bo sarei. ⁶ Me Timoti menok gyemanku mokimu somok zei aka ona jiretku ki ndaltukku. Me si amuta ngu dibnai zina akammu, me ngu ndalagko moya muni kit shida yo mu ndalagko moya nguni. ⁷ Me kika ka'a yaganakuno, mu wangko zena sara ki gyemangku aka ona jiretku aka yabtuk tilimu ki sena bonenmu. ⁸ Kauso mu anan zau, na ngu eranko ki geɗo a tong bomu Abano. ⁹ Me kauso shida kunnuk yiya mu onak Ndeyi a katku, kika lei shida kuyui yiya mu anandi a dom Ndeyi a katku? ¹⁰ Bedik ki hoti mu ishenku ɗonshu aka mu moi huskakku me mu ngamte ei mu daranko tong ona jiretku. ¹¹ Eri Ndeyi ki Bomu Abano Yeso, ɗeyi ka billa mu yo ndishe gyemangku. ¹² Eri Bomu abano saweku ndalta yaganakutku ki biya, kit shida yo mu ishenku. ¹³ Eri ɗo e ka'a ngarku tilinku ngu ɗeyi ana mure hufli a tong ei bu'uno a dom Ndeyi ki Bomu a jajum ndisheni Bomu Abano Yeso ki shafki biyai bu'uno.