¹ Kika nguni guda katku ngu manangkoti, yaganakuno, wundumu woi a gamagku a sarai bu. ² Ngu manankoti shida bones yo 'yamu a omu kawa a Filibi, mu anan geɗo tili tong Ndeyi aka ishenku eni Ndeyi tong Ngedi ³ Kika zoha kolamu idankui yo disa bu,lei a tong mure bu'ushe,ke yo youtubu. ⁴ Aka kit shida yo Ndeyi ommu ki muni aka somoni yo zei, ka'a ke mu ishe eni aka ɗo biya kol zeimu bu, me ɗo Ndeyi kol zeimu. Kika si moɗabi yo a kabta tilimu. ⁵ Kika mu damɓako isheku zei bobu, kit shida yo ngu mananko, lei zoɗok a tong bungko, kit shida yo Ndeyi mantu muni. ⁶ Me mu barta nama kah ki gyem biya bu, lei ki gyemku ɗo ki gyem ma'ato. Kamu ndalanko mu kol zei menemu yo ana ruta Kiristi. ⁷ Kika ka'a mu urtangkok kammu eleli a hototku kit shida yo nonti a ngarshe tili millanto. ⁸ Kika ka'a mu anandi ndaltu bo yoku, somok zei yo Ndeyi moɗa bi bu mu kolshe zei ishengku bu,me shafki ona zaumu a katku.Aka mu ɗeyi ana ndaltu a gyemansku. ⁹ Me tungga, yaganakutku, rutamu ki ngara geɗomu.Beɗi ki hoti mu ruta yam aka kada mu zee ndaɗo aka lei ngoi yiya ki hotokku. A jajum yo mu ishenku eni Ndeyi. ¹⁰ Nguni ngu shaida, Ndeyi kut shaida, yo mu 'yako ɗeino bu'uno ki tili moɗi ki mure et eni gyemangku eiyo ngu onan ko jire. ¹¹ Kika ka'a ngu manankoti shida eiyo mu 'yanko ki lei ngoi yiya ki hotokku, konta Boti ki millani, kit shida yo mu zohangku kola idanku ki onshenku geɗo, mu shaidanko. ¹² Kika ɗo ngu e marshe a ka billei zina yo Ndeyi, yo wunda nguni a ban meneni me ki nama kanni. ¹³ Aka 'yawoiye mu kunnak Ndeyi lei tamiya jajum yo ngu biskanko eni Ndeyi ki gyemamu yo ngu kolanko ki jire klie eni ngo bu. Kika ka'a, ngu biskanko te ki kit shida yo eni Ndeyi. Eni Ndeyi woiye tene a ruta hawotku nguniy yo ngu onanko jire. ¹⁴ Kika nguni, yaganakuno, ɗeya ana shutu ki ban Ndeyi yo a Yahudiya tong Yeso kiristi. Kika ɗo nguni ke ngu se bone shida yomu ki gyem biyai elitku kit shida yo nzuni sagkok sara Yahudaku. ¹⁵ Yahudaku ne duganko bomu abano Yeso ki nabaku, meke rokno muniy yahudaku, Ndeyi kolshe zeisu bu.Kika, zuni bonanta biya. ¹⁶ Zuni me ngamutik eni ki ana mure ɗafshe aka kada zuni we wanggu. Aka ka'ai lei tamiya zuni tong zunhu.Yabtuk tili Ndeyi ngeteno kasu. ¹⁷ Muni me, yaganaku, tikanmu ki nguni yo jajum shim, ki jire, yo tong tilibu, muni me mu 'yankok bo yomu ki ndala moya huskakku. ¹⁸ Kika mu ndalanko mu nditu gyemanku.NenBulus, ka moɗi bu, me sinkau gyemuti. ¹⁹ Me eimiya zoha tili mu yo dom, ɗo kuyu, ɗo ki ɓoɗa bo kah yo asse a dom bomu abano Yeso boli ndisheni? ²⁰ Kika ngunine nama kammu ki kuyumu.