¹ Me woi suba biya yon namam muni kit ngaraku Kiristi ana ngaha rutai bungkeno yo Ndeyi. ² ke woi 'ei yo ndalangkok gem ana ruta deyi ana jire. ³ Me a gemno woi 'ei yambu ngu ino sherya a bei sheryak ngo. Shida so biya man sheryanta kanno bu. ⁴ Nen mani ta lehi son iko bu, woi me tamko bu'uno bu. A ino sheryai Bono abano. ⁵ Ki ka ka'a, kadang ɓat sherya ka lei miya kabui sommodinto nditu bu, kabui Bomu a bano me tu. A ho'otik lei miya yo bungkeno tutudu hili a tamtik 'ei tong tili hena. Lei ngoi yiya abiska nama kannik gem Ndeyi. ⁶ Kauso, yagenakuno, ne mokno 'ei woi a kanno ki Afolos ki bo nguni, ki gemmu ngu shute 'ei mu anshe, "Kada ngu walle 'ei tureno bu. "Woi ka a an ngoi yo ngu hafta si wallitik yo'oto bu. ⁷ Ngoi yiya moikok gedgedes hototku ki ma'ato? Miyang anandi yong biskangko sarei bu? Me meng biskang ko, sarei kika miya ngu hafta ka kit ka'abu ye? ⁸ Kauso ngu wanngkok iei ei miya yong ndalanggko! Ngu ɗeyangku ana dara! Ngu ɗeyangku ana mene-wara muni! Jire, ne ndalong ngu 'e mene, muni kem e menek nguni. ⁹ A tong dibnanno Ndeyi zohimu majiraku zofko muni majiraku a ka ruta a hili kit biya ɓatansutik sheryak mato. mu ɗeyammu 'yak moino dunya ki taktakaku ki biya. ¹⁰ Mu ɗeyammu yaknaku ki ka Kiristi, me ngu ana asum a tong Kiristi. Mu anan geɗo bu, nguni meanan geɗo. Ko tong nama ka, munim tong urta ka. ¹¹ Har sommoɗi woi mu kolshe kizi wo'otok ham, mu anan mure karei, mu sangko jibo yam, kem anan bano bu. ¹² Mu ruta yam, mu ishek sarammu. Na onamu bone mu zofshe barka. Na maitangko muni, mu habrammu. ¹³ Na yabtangko muni, mu enik yabtenok tili bu. Mu deyammu, ke jo namangko muni, jiji yo kasa bugdoi dunya. ¹⁴ Ne turengku 'ei mayei ki ka ne ongku kawa bu, me ki ka ramte nguni kit millanoi ne ndalo. ¹⁵ Lei mang anan bobenti ana bano dubu bimmad a tong Kiristi, anandi bobenti tim bu. Ne ɗeyinno boku tong Kiristi Yeso ki be'i eni Ndeyi. ¹⁶ Ne donsha nguning ɗaf kusa shekeno. ¹⁷ 'Ei zofkon saringku Timoti, lah no yon nda sik jire tong Bomu a bano. Si soma dibshengku billeno tong Kiristi, kit yon shutanta lei tiya a tong Ndeyi. ¹⁸ A Kauso ma'atongku ɗeyansu ana hafta ka, a ishe kit ne nditu gemku bu. ¹⁹ Men nditu gemku kauso kauso, na Ndeyi geɗa dom. Ne manta eni mamayei ana hafta kai bu, me ne moiti har ki geɗo su. ²⁰ Ki ka ban Ndeyi ishe enik bo bu, kabak ona geɗo. ²¹ Ngu ndalangko miya? Ne nditu gemkuk zawa ɗo, ɗo ki ndaltu jo tong kelui zina?