1 Yeso wa suru akura Adǝshǝri Mme a tǝnateme, nze Atuma hame rawa me da ŋa beze me oreze ti-gura tiwa akurǝ Adǝshǝri. 2 Nze ma saŋare ŋe, "ŋina nari tigogoro tigiya zale? gaŋgaŋ na buki ŋi, a dawa deke re rizuwa aza re ne; kuyya riyu ara tipi mi ă nyaŋa." 3 Se Yeso wara cikǝ aza Owö u Olives, Atuma hame rawa me a rekero ŋa go, "buku ă woro nan ucunyu zi imi giya ra wuna, konzen iyaze tewero ti urawoye nan u masa massano?" 4 Yeso tare mago, "Pǝpǝi ni, tago owe rawi ŋi ma wuna ŋi remo ne. 5 Bakase ano cebete sărǝ anyimi rijaron, a gusa, "mmi zi onu kassa, konzen ŋara wursano cebete. 6 ŋi nin kuna utiyukara nan birǝ bi u-tiyukara a turara kekeŋ-kekeŋ, tago e kerkene ne. Tegogoro tegeme ara wuza me, nan nane, umasa massano dawa ra ne. 7 Nŋyaŋa mara ira aza nŋyaŋa, te-gomo aza te-gomo. Anin wuza ekomo nan Azuzukun nŋyaŋa a tirara. 8 Zale igiya u buru kuna ikwai ze. 9 Nze anin nyaka ŋi dă ŋa nyaŋi makwai konzen a woze ŋi, Massano konzen mara nyameno huŋi baka Mmi. 10 Uca ogeme ze ano cebete ŋara pikǝru, konzen ano ra nyaka ate a haŋe konzen ŋa nyamene ate a haŋe. 11 Konzen Atuma anpore cebete ŋara suru ŋa wuna ano cebete remo. 12 Baka u bare ara ǝpuru, nan ti-barsa tano cebete tira wuna shammo. 13 Ono gemse ma mutǝnǝ ă ka deŋe umasa me manze ara kawo me. 14 Konzen nlen magiya ma tegomo ara yisu mi a kuyaba zale ă massano da kweren ŋa cikǝ nan uru mi anŋyaŋa zale. Enze umasa me ra deŋe. 15 Uca ogeme e ŋi ni macara ǝnyimi akurǝ Adǝshǝri egemese utuma u wa Adǝshǝri, Daniel wa buki "(onu barame a ma ru)," 16 zale anu cikǝ a Judea some azo ti-wö, 17 tago ono gemese mara aza ugura u yake tũ akă yita iyabo eheme ǝtitau ni, 18 tago ono gemse mara uru kura ǝtitau a ka yita emu gubǝru ni. 19 Imi jai ze awai tipuru nan anu yiza abiya mane uca ogemme! 20 Remmo ni tago tesonŋa tiŋi ti cikǝ anyimi rekoze né atiyǝ awu vonke ne. 21 Uca ogome anin pete a makwai ma sololo magemes ǝdǝwǝ nǝri ni ăsuru ruza massano konzen a dama kuru wuza isǝnǝ mene. 22 Dan se awa kashe timuru timini, owe titan sopo ne; baka anagemse awa zake ze awa kashe teŋwe teme. 23 Uca ogeme tago owe goŋ ŋi, 'nǝrǝ, Yeso min giya,' né 'mǝ nin nǝ' tago ŋi gare ne. 24 Anu kassa npore ra suru nan Atuma npore, ŋara wuza tegogoro ti sassaru nan ri-wuna ri imi-wi konzen ŋa gǝlli ano agemese ana zake ŋe - ngase inin cikǝ nane. 25 Nǝrǝ inwa ruku buku mi ŋi. 26 Ngase owe guŋi,'nari ni magema anyimuja,' tago i suru ni, né 'ma giya anyimi tigura tǝ anyimi; tago ŋi gare ne.' 27 Uga nane se umalma ara we sansan ulu cunju, aka ulu uwǝru, nane ze, ukuru Vana Ono nen ze. 28 Aragemse ekeze ranu, aragemme ze ti-majuguwale ti tanu. 29 Amaro makwai ma timuru tegeme, oŋwe ra beje, konzen ubǝrǝmǝ dama runtu ni; Ewewero rǝ gari ă ŋyaŋa, adaishari zale ara zokomo. 30 Uca ogomese Vana ono ra yonko adaishari konzen zale ano massano ŋara riwa baka iwi. ŋara ni Vana ono ǝnyimi tewero nan agata a tegoma teme. 31 Masa tuma Tu-malika teme nan rejo ru gare suŋ, ŋasa wöro ano hame kweren ă sura tilu tinaze, usuru re-rekero ra adaishari aka re-rekero reme. 32 Wagiya, massă ni iyabo aza Utiti upǝu, ngase tuva teme ti-tiri ŋi wa rǝ ru si Rishi rina deŋe. 33 Bakan nane ngase i ni tegogoro tigiya kweren, ŋi ru se mana deŋe voto, a deŋe arǝkai. 34 Na buki ŋi, gaŋgaŋ, rimiza rigiya ri dama waka ne, she tegogoro tigiya tina binja. 35 Adaishari nan massano mara maso, ama nlenŋa maŋ madama maso ne. 36 Konzen aza Oŋwe nan uca ogomme, né Atuma Adǝshǝri né vana owe tǝru ni, se Aco base ru. 37 Uga nane se eteze ǝ titiyya ti Nuhu, nane ze ira cikǝ ǝ titiyya ti ura Vana ono. 38 Baka Ə titiyya tiwu binja manyi a massano; ana wara ǝwushu-wushu, ushiyǝ tegogoro, uwuza aŋya nan u nyaka aŋya, enze ǝtiyǝ ageme se Nuhu wa pete ă okoŋgo manyi; 39 ŋawa tǝ ru emegemse ira faron ŋe ne, enze manyi mawa rai ma wöro ŋe zale - nane ze timuru tu ra Vana ono tira cikǝ. 40 Enze ara mura anka repo uru, ara yita ono vento a deke ono vento. 41 Awai anka repo aru wara ira, ara yita ono vento a deke ono vento. 42 Bakan nane ze wuza ni ri-wuza ri-wuma, bakase ŋi tǝ ru atiyǝ agemese Aco u hiŋi sa ra ne. 43 To a ŋi ru igiya, tă go acakura ru uca ogome se ukari ra rawa ma atau nan atitiyya, ma ti nin muru rinyaŋana, ma tuna ono pete atauwa me. 44 Bakan nane ze cikǝ ŋi nan ogoro, Vanono sa ra uca ogemese ŋi tǝ ru ni. 45 Nze avizi orere u wuma, okese, ogeme se Acakura a hame wa nyame ri-manti ra kura hame, da ma yiza ne imunshu, uca u wuma? 46 Taye tira za orere ogemese Acakura hame sa kuru ma mura me a wuza nane se matiwuna manu. 47 Na buki ŋi, gaŋgaŋ, mara wuno home ă rinyaŋana ri umura o home zale. 48 Amma ngase orere me zen ara ǝpuru, mme gatu gusa a birwa beme, Acakura me dama rukku kuru ni. 49 Nze ma me u tări arene awi tuma e heme, ma wushi, ma shi nan anu shiyǝ mi. 50 Nze Acowa me sa ra atiya agemse ma tă ru ni uca ogemse ma tin ru ni. 51 Acome sa gwarse me tikutu timi nze ma gura me nan asossono ara gemese manin riwa nan u runza tini.