1 Uca ogemese Yeso wa wasa tigwiri cebece a biyǝ nlen ma lo aza akura Adǝshǝri a suŋ. Atuma hame rikuri wazen me, 2 taken ayawai se mawa zuziŋi uvunu ɔbɔ nan te-kwenekwena teŋe: Mary se agusanme Magdalene se mawa zuzi mi avunu abɔ sunare; 3 Joana, uwai Chuza, unu saru akura Herod; Suzana nan udaŋara me cebete, anagemese aza emegemese ŋa zenno ŋawa male apuŋa ŋe. 4 Se riyǝgǝ ranu sussa tigwiri tigwiri wa gurna aragemse mara nu, mawa bi uyu gǝmǝrǝ, 5 "uyu navara wa waŋa bira isǝnǝ. Uca u sarma eme, ee wa kunki uruna awa kayanu, itidi ko i tinka. 6 Ee wa kunki aza zuwa, iwa buro otozo nze i wǝyi, udira manyi. 7 Ee wa kunki anyimi ikana, ikana me wa tozo nan isǝnǝ me ara vento eze i tuna eme uwuna. 8 Ama ee wa kunki a inyaŋa ma wuma enze ee yoso iburi iwu mura imunshu se ewe isǝnǝ me ecebete tigu." Se Yeso wa masse ubiyǝ nane, enze ma chinǝrǝ uguna," onogemese mazin tetoŋe tu kuna a ma kuna." 9 Atuma hame saŋare me, iyaze ugǝmǝrǝ ugiya ra biyǝ mi. 10 Nze magonŋe, "ana nyaŋi uru bira be akura Adǝshǝri a suŋ, ama udaŋara me ra biyǝ oŋe tugǝmǝrǝ tenze, baka 'unǝrǝ ŋa tin nǝrǝ ni, ukuna ŋa tin ru ni.' 11 wagiya kuna ni kando gemse ugǝmǝrǝ me ze: nlen mǝ Adǝshǝri manze isǝnǝ me. 12 Iwu kunku uruna enze anagemse awa biyǝ ŋi nlen mame enze unu macara rai ma zuzi mame a ŋe a birwa da tago ŋa gare nan ukassa ne. 13 Iwu kunku azuwa enze anagemse inga ŋa kuna nlen mame ŋa kaye nan u runtu birwa. Ama ŋa ze uga utitu dira riiji, ŋa gare uca bate, ama inga ugǝlli rai ŋa wuru. 14 Isǝnǝ egemese iwa kunki anyimi ikana, nze anu kuna nlen mame, ama a turuna teŋe, adodonza haŋe ra epe tegogoro ti massano, konzen nlen mame ma tă mura aru cikǝ ni. 15 Ama egemese iwa sarmo a nyaŋa a wuma, nze anu kuna nlen mame nan birwa be vento bé telo, ŋa manti mame tase kake ŋa yoso iburi nan umutǝnǝ. 16 Waja, avin nin we ura a rebono, ma paten eso, né ma biza anyaŋa agadu. Utaze aza retǝri, da zale ono pete nari isansaŋ ara. 17 Baka iyabo dame iwu gurkuza se atin ru ni, né be bira bu pate se atin ru ni, konzen atin nari isansan ne. 18 Sabo nan nane, kunani, ono iyabo anin vati mi manu, unu dira egemese ma ru se mazenno anin kai eme ame. 19 Enze ayinome nan anuwanome rai epe unǝrǝ o home, baka ecebete riyǝgǝ rano ŋawa tă mura ura voton me ne. 20 Awa gonme, "ayinoye nan anuwanai ingeme a kai, ǝ ginǝroye." 21 Nze ma gare magonŋe, "ayinu nan anuwanan ŋaze anu kuna nlen mǝ Adǝshǝri ŋa wuza ituma nanno." 22 To aya tinyǝ mawa pete okongo manyi nan Atuma me, kozen ma gonŋe, "i pari a rekero ri yinnǝ." Nze ŋa meshe tǝno. 23 Uca pari rii rimi nro ma meme. Rikimu ri sǝru ra tu a rii rimi, nze okongo me me ubinjan nan manyi, konzen ŋawa repo kutǝru. 24 Nze Atum Yeso me waŋ ŋa ka zinzame, ŋagonme,"Acakura! Acakura! woron giyǝ a ka wǝnǝ!" Nze ma here ma sǝkǝnǝ a rikimu reme nan ucanze manyi mami, nze riwǝ tore manyi mami wete. 25 Nze magonŋe, "uyiya birwa biŋi bi yu?" Iwi wa mey ŋe. Se iwi wa mey ŋe ŋawa ko ŋa ni imi wi, konzen nze ŋa me u saŋara apunŋa ŋe, "unu giya me avizi si har manyi nan rekimu ri kuna usakǝnǝ o home re tete wete?" 26 Ŋa ti pari a ka ulu u Gerasenes, se anze inga a pari a wake re-rii ru surǝ Galilea. 27 Uca u tu Yeso a sura okongo manyi mami, mawa gurnan oyono a sura ape me, se mazin uvunu ɔbɔ. Mana takano nan udira tommo a repuŋ, ucikome anyimi isau ze ma damin ayitau ni. 28 Se ma ti ni Yeso nze ma me izama ma gara aja me ma sǝkǝnǝ, mago, "Iyaze u nin wunan mi Yeso vana Adǝshǝri ogomo u sǝru? kuna ijaiye hon, tago u wunan ne." 29 Baka Yeso na jarma uvunu ɔbɔ me ǝ ma suri anyimono me. Baka uvunu mi na dakano a damo ono me inga a zuzi ome u ko u ka pete me, uyu uca a wana tǝsi mi nan iyarma tore inyaŋana me, ma me eme ma tase a suri ma waŋ ememe uja. 30 Nze Yeso sanara me, "Avizi rija re?" nze mago, "Legion," baka tuvunu te cebete tina pete me. 31 Ŋa re itumi izama u nara ijai, tago a gwara ŋe a rewo re yo ne. 32 Re-riyǝgǝ re tilade titi sura uyu lu a waka, eze tu-vunu timi tego kusu awe ye a ŋa ka petă teme, nze ma nya ŋe uwari a ŋa waŋ. 33 Nze ŋa sura yimo ono me ŋa pete teme, tilade teme te mey toson ti ka petǝ anyimi rii rimi ŋa wiju. 34 Se anu tarsen tilade teme tiwa ni emegemese ina faro, nze care birwa ŋa heren toson ŋa petǝ anyimi ape me ŋa biyǝ epe me hara tepe tu laken ŋe. 35 Se ano wa kuna epe me ŋa wa suru a ŋa ka nǝrǝ nan aja ŋe, ŋa mura Yeso nan ono gemese anǝ zuzi uvunu timi. Mawa ra cikǝ alaken atao a Yeso nan tommo a ripuŋa reme, nan remǝ reme. Ŋa wa ni imiwi. 36 Nze anagemese ŋawa ra nǝri kando gemese ǝna we ono tuvunu tɔbɔ teme ma wamo ŋa me ubezezzo ŋe nane se tuvunu timi tiwa suri. 37 Nze ano Gesarenes me gon Yeso a ma ŋana ma teke ape me baka isǝni wi si e te mey ŋe. Nze Yeso petă okongo manyi da ŋa meshe uruna ü kuru. 38 Ono gemese a ti zuzi mi uvunu ɔbɔ me saŋara Yeso a ma tarse me. Nze Yeso gonme, 39 "wama ǝtau u ka bezezze ŋe emegemese Adǝshǝri te we." Ono me ti wame ape a hame ma ka biyǝ emegemese Yeso ti weme. 40 Se Yeso ti kuru ulu dinka riyǝgǝ rano re ti kaiye me, massanman anagemese ŋa ti ra pawo me. 41 To oye se agosenme Jairus, se manze mawaze unu sǝru akura Adǝshǝri, wa rai voton Yeso ma gurwǝnǝ anyaŋa ma sagara me a ma tu a mǝ atau, 42 baka se ugalla o home ovento se manzenno, ono siwai rikuri, ripuŋa reme riripu kirkome. Se Yeso ti meshe uruna a waŋ, riyǝgǝ rano cebete ra hira tururu a tarse me. 43 Oyu uwai wara anyima ano me se mana dakano nan ukunku manyi, mana tangarozo nan u wursi iru a ginǝrǝ ara tuka, owe wata date o we me ma wamo. 44 Ma ti wame a maro a Yeso ma tupa tomma teme aregemme ma wa wamo. 45 Yeso go, "avizi onogemese mana tupaŋ?" Zale owe ti tǝ gare mago manze ne, Nze Peter go, "Acakura, ituru riyǝgǝ rigiya ano cebete na dusai anyimi tǝno." 46 Ama Yeso go, "owe na tupaŋ, bakase ina ru se agata na suri mi." 47 Se uwai me ru si a nin ru mi, nze iwi meme ma rai ma gurwǝnǝ ripuŋa reme a shokomozo. Ma buki emegemese ina wuna me a tupo me, konzen se mana wa wamo. 48 Nze Yeso gonme, "uyiya birwa be bi na wame. Wame shammo." 49 Uca ogeme se ma ti da banu, nze owe deŋe a sura akura unu sǝru u wa akura Adǝshǝri mi go, "ugalla me na wǝnǝ. Tago u ko u dame ono bezezze me ne." 50 Se Yeso ti kuna egeme, nze ma gara magon Jairus, "tago u kuna iwi ni; gare base, mara wamo." 51 Se ma te deŋe atau mi, ma ti tǝ deke owe petă atau mini, yaka ma Peter nan John nan James nan Aco nan Ayinu ugalla me base. 52 Uca me ano agati izama ǝmǝ, nze Ma gonŋe, " tago i riwa ne ma dan wi ni, ma ra nro manze." 53 Nze ŋa me tekerka teme, nan uru si ma ti wi. 54 Nze ma zaki mi uware, ma tisa, mago, "vana, hira!" 55 uvuno kuri, konzen arame mawa hira. Nze ma go a nyame imunshu a ma wushi. 56 Ana cowa me ni imi wi, bata ma tunaŋe ubuku oye emegemese i ti mura ŋe.