Udaraŋa u 7

1 Se Yeso wa massa tegogoro te gemse ma wǝra bezezzoŋe, ma wa here ma petă Capernaum. 2 Uyonu sǝsǝru ti-suja wa zen orere si ma barsa suŋ, orere wara teje nan ripuŋ uga ma nin wi. 3 Se usuja me wa kuna epe Yeso, ma tome tenoŋono ti-Jews a ŋa gonme a a ma ra ma male orerome. 4 Se ŋa wa ka mura Yeso, ŋa luta remelo ŋa gonme,"Izikima u ka male unujiya, 5 baka unu pii nyaŋa manze, konzen manze ma ti pii do akirǝ Adǝshǝri." 6 Nze Yeso tareŋe, se ŋa wa ra voton ataumi, Usuja u sasaru mi tome oyorenome a ma gonme, "Aco, tago birwa be bi caro ne, mmi inru tiyiiy ohon, ndan deŋe onogemese ono nin rai atauwa han ne. 7 Aza igiya ze, mmi ru se ndan deŋe onu waŋa ŋone, ama ŋan remela re base orerohon nin wamo. 8 Baka mmi orere ze nan ti-suja ton zale. Mmi ngase ngon oweyoŋe waŋ ma nin waŋ, ra ma nin ra, konzen arera han min gosenŋe wũna nin igiya, ŋa nin wũna. 9 Se Yeso wa kone igeme, ma waŋaro ma gon riyǝgǝ ru tarsome,"dikan buki ŋi, ko ono Isrezel damin uyiya birwa bigya ne." 10 Se Arene agemme wa kura yitua mi, ŋa wa do ŋa ka mura orere me na wamo." 11 Amaro egeme, Yeso nan riyǝgǝ ru tarsome wa ka petǝ uyu gwiri se goseno Nain. 12 Voton arakai o petǝ u gwiri mi, awarǝ surun ekeze vana uyuwai (ushi) si mawa zen vana ovento base, riyǝgǝ rano cebete wa tarse. 13 Se Aco, wa ni nane, iwa tupa me nan ajai iwu shi mi, nze ma gonme,"tago u riwane." 14 Nze ma wan voto nan uyaga ekeze me, ma tupa, anu zaki ekeze me wa tore, nze ma gon ekeze, "onorome ngonŋo hira." 15 Ono me wa here ma tore ma me ubanu, nze Yeso ŋa ka me Ayinome. 16 Iwi wa me ano me, nze ŋa me uyisisa Adǝshǝri, agusa,"kane ina ni Utuma Adǝshǝri saru ayima hado." Konzen,"Adǝshǝri na barsa arera hame." 17 Ano wa kuna epe Yeso, zale ti-gwiri ti Judea, nan anu lakanŋe. 18 Atuma a Johne wa buka me tegogoro tegeme zale. 19 Nze Johne, tome atuma hame an ka repo a ŋa waŋa Aco, na ka gonme,"nŋo ze unu sa raiy, ne woro cikǝ ipă owe?" 20 Se atuma a johne wa deŋe voto nan Yeso, nze ŋa go,"Johne ono zoro, na tuma do de-go,'nŋo ze unu sa raiy, ne i pă owe?'" 21 Uca ogemme, ano te-kwenekwene, nan ano agemese uvunu ɔbɔ na peteŋe cebete ŋawa wǝmo, konzen arũ wa mura unǝrǝ ara. 22 Nze Yeso gara, magonŋe,"ngase i kuru i ka buka John emmegemse ina nǝrǝ, i ko i kuna. Arũ na mura unǝrǝ ra, Aguŋ a tăno, Akoto ana kwiji ŋi, Aturi a kuna tetoŋe, Anu wǝnǝ a kursu nan ruma, Anu nara ana bezezzeŋe nlen ma sau. 23 Onu dira uzuzi birwa i mi baka rewuza ron ono Taye tenze." 24 Amaro rituma re Johne, nze Yeso me ubiyǝ a riyǝgǝ ranu tarsome epe Johne,"I wanze ape ikiki di nǝrǝ iyaze? uvunu a shokomozo tegogoro? 25 Nze iyaze i wanze i ka nǝrǝ? Ono na soke kadi ka sauwu? Narǝ ni, Anu soke tommo ti iru, nan Anu cikǝ malo ra utidara tegomo tenze. 26 Nze iyaze i wanze i ka nǝri? Utuma Adǝshǝri? Gangaŋ, dikan bukiŋi, ma kirka udaŋara Atuma Adǝshǝri. 27 Aza hame ze awa darse, nǝrǝ, inra tuma nan utumo hon aja haŋi, onu mamara ara baka u rawoye.' 28 Dikan kon buki ŋi, zale ana gemese uwai wayoŋe, owe dan mura uyisiza se Johne ne. Ama onu bateke Akura a suŋ a Adǝshǝri kira me." 29 (Se zale ano nan anu kassa iru inyaŋa wa kuna epe igiya, nze ŋa gara se Adǝshǝri magangaŋ ze, baka ŋawa zoro, ozoro Johne. 30 Ama ti-Pharisis, nan Anu ru makiri ma ti-Jews nyamene emegemese Adǝshǝri na rozeŋe, baka awa tă zoroŋe ozoro Johne ne.) 31 Aza iyaze, inin guda Ano simiza sigiya? Inni zi ŋa ze? 32 Ɲaze uga abiya agemese ŋa rijaji a ra ucuwala uware, Anagemese nŋe ucikǝ hoŋe u tisa apuŋaŋe, agusa,'Ngase i wuriŋi rejo, konzen nŋi tă gari irina ne. Ngase i gose remeze ru wǝnǝ nŋi tan riwane.' 33 Baka Johne wa tă rǝ wushu-wushu, nan ushiyǝ obere ŋe, nze ŋi gon,'mazen uvunu ɔbɔ.' 34 Vana ono wa rai a wushu-wushu nan ushiyǝ, ŋi go,'nǝrǝ, unu giya ono tenwushu nan unu shiyǝ obere ze, orene anu macara nan anu kassa iru nyaŋa ze!' 35 Ama, Ano rekese ru zale abiya rekeze. 36 Nze oyu Pharisis nara Yeso a ŋa ka wushi imushu nan me. Amaro se Yeso wa petă atauwa hame, nze ma go a ŋa cikǝ ukujira u saru. 37 To, oyu wai wara ape me si awa ru mi nan macara. Se uwai me wa ru si Yeso na tuna akura ono Pharisis mi, nze ma ran maneŋe ma uŋya u wuma se agosenno Alabaster. 38 Ma tore amara hame, a laken tuva tă tawa hame, izama, nan maji ma aji a hame nsete se retă reme ze ma wa sarka tuva tă atau Yeso, a gatu tilala nan anu a hame, nze ma shokome tuva tă ataw me nan Alabaster me. 39 Se u-Pharisis una akura me wa ni igiya, nze ma we adodonzo awu guna,"tăgo unu giya utuma Adǝshǝri zi, ma tă ru isana uwaiyo gemese mara dusa o home, onu macara ze." 40 Nze Yeso gara ma gonme, "Simon, in zin emegemese inra buku ma ŋo." Ma go,"buki mi, ono bezezze!" 41 Yeso gonme,"Oyono wa nya ayan ka repo uduru. Ono vento, ti dinari ti-bituru ka bituru shibi, Ono repo me ti-bituru ka shibi. 42 Se ŋa wată biye me ne, ma wa kunki ma wapi kweren. Nze, avizi anyima haŋe nin kira barso me?" 43 Simon gare, mago,"U nara o hon, ono gemese mawa nyame cebete." Yeso gonme,"una nari kima." 44 Nze Yeso waŋaro uwaime, ma gon Simon,"u na narra uwaiyu giya. Ina petǝ aŋo atau u dan nyan manyi mu kwiji atau ne, ama mme ma na kwiji atauwa han nan maji mawa aji a hame, ma sake nan seta seme. 45 Nŋo dan tilalan ne, ama tunu rawo hon atauwa hai, ma dan deke utilala tuva tǝ atauwa han ne. 46 Nŋo dan shokomo retaron nan maneŋe ne, ama mana shokomo tuva tǝ atauwa han nan maneŋe. 47 Aza igiya ze ngunŋi, macara mame, se maze cebete, ana kunki mame - baka ubarso me o cebete. Ama ono gemese ana kunki mi macara ma bate nane ze ibate, tubarsa teme." 48 Nze Ma gon uwaime,"ana kunki macara mai." 49 Anagemese ŋa warǝ cikǝ arame, ŋa mu gusa," Avizi onu giya se har macara ma zuzuzi?" 50 Nze Yeso gon uwai me,"uyiya birwa be bi na kase, wame shammo."