1 Uca ogeme, Awe aregeme biyǝ mi epe ano Galili, anageme se manyi ma Pilate mawa gurna nan u nyaka hoŋe. 2 Yeso wa gare ma go, "nŋi rǝ nǝrǝ uga ano Galili ugiya zen macara ma u kira udaŋara Galili mi zi na wu na ŋe a shiyǝ makawi magiya? 3 Babo, dikan buki ŋi, ingase i ta kunki macara ma ŋi ni, zalu ŋi nin wǝnǝ uruna ogemme. 4 Né ano bituru nan uru a Shilo ageme se ugura o jololo wa garra aza haŋe ŋa wi, i ni uga ŋa wa zin macara mu kira ma awe Jerusalem? 5 Babo, na buki ŋi, ingase i ta kunki macara ma ŋi, zalu huŋi nin ko i wi." 6 Yeso wa buki ugǝmǝrǝ ugiyǝ, "owe wa bira utiti u run ulambu o home, nze ma wa wanze da ma ka nara imu wushu utiti mi ma tä mura ne. 7 Nze ma gon oni tuma ulambu mi, 'nǝrǝ, anyimi suwai si taro sigiya se ina rasa dan nara imunshu iwu titi uguya in dan mura ne. Gware ome, iya nen we do a deke ome se una pate ara ze ka wai?' 8 Oni tuma ulambu mi gara ma go, 'da deke ome a ruwai rigiya, nnin gasi adizi mi in we timin tiibiya a nu. 9 Ingase u ka yoso a ruwai ru ra, kima; ingase u ta yoso ne, vati ome a nyaŋa!"' 10 Uca ogeme se Yeso wara bezezze ano akura Adǝshǝri, a tinyǝ Sabath. 11 To, oyo uwai wara arame se a ka deŋe suwai mazin bituru nan uru, ma wa zen uvunu ɔbɔ se u wuza me a cikǝ tauwu, konzen ma wa putono ma ta date ma tore kima ne. 12 Se Yeso wa nǝrǝ mi, ma wa tisa a me, ma go, "Uwai ana zuzi itauwu e he." 13 Ma wa we uware aza hame, nze aregemme ma wa here ma tore kima konzn ma me uyisiza riji rǝ Adǝshǝri. 14 Bata unu sǝru uwa kura Adǝshǝri mi wa tä kuna malo ne, se Yeso na wuza ituma u wai me atiyǝ Sabath. Nze unu sǝru mi gara, ma gon riyǝgǝ rano reme, "i zin titinyǝ tase se teze ti ituma. Rani di mura ituma ripuŋa riŋi, ama daban nan atiyǝ Sabath." 15 Yeso wa gara me, ma go, "Anonpore! dan kweren u huŋi buzizi itan nan ivare i hiŋi, i tipi eme a ka shi maŋyi a tinyǝ Sabath ne? 16 To nze, ugalla u Abraham ugiya se Shetan na tǝsi mi suwai se yo bituru nan uru, tago a buzi mi atinyǝ Sabath ne?" 17 Se ma wa massa u buki igiya, anageme se ŋa wa tore aza hame wa kuna imme, bata zale riyǝgǝ rano ri wa ri izalla aza tegoro ti wuma se ma na wuna. 18 Nze Yeso go, "Inni zi tegomo tǝ Adǝshǝri teze, konzen iyaze a nin guda nanno? 19 Eze uga isǝnǝ Mustard se oye yita ma vati anyimi ulambu ohome, konzen i bare i cikǝ utiti u sǝru, nze itidi iwa adaishari piyǝ tidu aza tare teme." 20 Ma ko mago, "aza iyaze in nin guda tegomo tǝ Adǝshǝri? 21 Eze uga Yeast se owe yete ma gura nan ti mudu ti tari ti mbini se ina gurna anyimi mbimi mami." 22 Yeso wa petǝ tigwiri, nan tepe a bezezzo ŋe uruna a waŋa Jerusalem. 23 Owe wa gon me, "Aco ano bate ze nin mura u kassa?" Nze ma gonme, 24 "tore ŋi kima epo petǝ uruna u pate, baka, dikan buki ŋi, ano cebete re epo pete, ama ŋa dawa date pete ne. 25 Uca ogeme se una kura me here ma pate arǝkayi mi, nze ŋi nin cikǝ akai a gatu vaye arǝkai konzen ŋi go, "Aco, Aco, dekǝ woro pete,' Ma nin gara ma go, 'In tǝ ru ŋi ni, né nŋi anu surǝ aba ne.' 26 Nze nŋi nin guna, 'i wa shi nan u wushi imunshu arevnto, konzen u wa bezezze do a tigwira tedo.' 27 Bata ma nin go, 'Inna buki ŋi, in tǝ ru né nŋi anu surǝ aba ne, hira ni arigiya, anu wuza macara!' 28 Nŋi nin riwa nan u runza tini uca ogeme se ira nǝrǝ Ibirahim, Isaac, nan Jacop, kozen nan zale Atuma Adǝshǝri a tegomo tǝ Adǝshǝri, bata ana kura ŋi akai. 29 Ŋa nin rai a surǝ adizi, akayaza, ulu uwǝru, nan ulu u suru o onŋwe ŋa cikǝ aru cikǝ avento a tegomo tǝ Adǝshǝri. 30 Ru ni igiya, anageme se ara nǝrǝ uga ŋa damin amfane ne ŋanze anu bura, ana geme se ani uga ŋazin amfane ŋanze ana maro." 31 Amaro uca bate, te-ti-Pharisis wa raiy ŋa gonme, "ŋana o deke arigiya bakase Herudia repo u wuno ŋe." 32 Yeso gare mago, 'wan ni i ka bukǝ me, 'nǝrǝ, unu giya zuzizi uvunu ɔbɔ, ma na we ano wamo kane, nan ŋyaru, konzen atiyu taro ma sä massa emege se ina ranme.' 33 Anyimi kuyya epe, zikima in we aji kane, ŋyaru, nan titinyǝ tu tarse, Tun si makiri manze tago a wo utuma Adǝshǝri a aya ape ageme se dan Jerusalem ze ne. 34 Jerusalem, Jerusalem, Anu wuza Atuma Adǝshǝri nan u gisi ana geme se ana tuma ŋe iŋi. Ka nyano ze in nin damo epo gura abiya haŋi kando geme se betokoro bi gursa abiya hame a tigǝllua teme, bata nŋi wa nyamene. 35 Nǝrǝ, owe dawa atauwa haŋi ni. Ina buki ŋi, i dawa nǝro hon ne se ina guna, 'Ono taye manze unu ra ariji rǝ Aco."'