1 Anuwanan, tago i yiya birwa a Acowa hado Yeso ukassa, Aco awu yisiza, nan ubarse awe unyamene udaŋara. 2 Sin ingase owe pete aru bǝnu nan ogoro aniru, nze owe ko deŋe nan ogoro ano tiyaŋ. 3 Inze ingase i nǝrǝ oniru mi e go, "Adǝshǝri deke cikǝ ara wuma agiya," bata i ko e gon ono tiyaŋ teme, "a ŋo tore ariyinnǝ," né, "cikǝ a tuva tǝ atauwa han," 4 nŋi dan biyǝ nlen ma tubarsa tiŋi ingeme ne? Nŋi dan ciƙǝ anu biyǝ nlen nan adodonzo macara ne? 5 Kunani, anowanan sen imbarsa, dan Adǝshǝri wa zake ano tiyaŋ da ŋa cikǝ aniru anyimi uyiya birwa nan ucikǝ anu wushu tegomo tegeme se ma wa buki si ma nin nya anu barso me ne? 6 Bata nŋi na duti ano tiyaŋ, dan aniru zi yiza ni imme ne? Dan ŋanze ŋa wanzen ŋi a ru biyǝ nlen ne? 7 Dan ŋanze anu tinziza riji regeme se ŋi na yiya birwa anu ni? 8 Aza nane, ingase i wuza zale emegeme se makiri maze, kando gemese awa darsa, "i barsa anulake a haŋi uga retǝ riŋi," ina wuza kima. 9 Ama ingo i barsa awe base, ira macara manze, konzen i nin tisa ŋi anu nyamene makiri. 10 Baka onogeme se ma garra nan makiri, bata ma kutaru aza uruna ovento, ma na cikǝ onu nyamene makiri zale. 11 Baka ono geme se ma wa guna, "tago a woze rijama ne," manze mawa ko ma go, "tago owe wuna oyene." Ingase u tǝ wuza rijama ne, eze u ka wuna owe, una cikǝ onu nyamene makiri. 12 To buki u ko u wuza uga ana geme se a nin biyǝ nleŋa maŋe nan makiri ma ano sopo. 13 Baka übiyǝ nlen ma anu dira ijai nin rai nan udira ijai. Ijai wushiji aji aza ubiyǝ nlen. 14 Iyaze ze i kima, anuwanan, ingase owe go ma zin uyiya birwa, bata ma da min ituma ne? e geme nin kassa me? 15 Se ingase oyeno owai né onorome ma na soke tommo caron, konzen ma da min imunshu iwu wushu atiyǝ mi ni. 16 Se ingase oyeyo huŋi gon ŋe, "wan ni shammo, cikǝ kpai i nin seke." Ingase i ta nya ŋe emegeme se ripun ri repe me ne, iyi imi wuma ingeme? 17 Sakaman nane, uyiya birwa base, dan nan ituma ne, ekeze ze. 18 Bata oye nin go, "nŋo zin uyiya birwa, konzen mmin zin ituma." Bizan uyiya birwa be bu dira ituma, dan bizai uyiya birwa bon anyimi ituma e hon. 19 Nŋi gara se azen Adǝshǝri avento ze, ina we kima. Ama ko uvunu ɔbɔ gara egeme, nze we ŋa kuna iwi. 20 Nŋo ulakere ono, orepe utǝ ru si, imu dira iyabo ze uyiya birwa dan nan ituma? 21 Dan Acowado Abraham wa mura riji ri wuma aza ituma se ma wa nyaka Isaac vano home aza aru taye ne? 22 I ru si uyiya birwa bi wuza ituma nan ituma e me, konzen aza ituma e heme ze awa piyi uyiya birwa be me. 23 Nlen mu darsa, ma wa binja se awa go, "Abraham wa yiya birwa a Adǝshǝri, nze awa bara me anyimi ano ruwuza ri wuma," konzen awa tisa me orene uwa Adǝshǝri. 24 I na ni aza ituma ze ono na mura riji ri wuma, dan aza uyiya birwa base ne. 25 Sakaman nane konzen, dan Rahab wa mura riji ri wuma aza ituma, uca ogeme se ma wa kaiy atuma ageme nze ma we ŋe ŋa ngana a uyu runa ne? 26 Baka tunsi ucikǝ ripun ken nan uvunu ekeze ze, nane ze konzen, uyiya birwa ken nan ituma ekeze ze.