Udaraŋa u 6

1 Aza nane, di waka ubura rituma ri unu kassa i ka deŋe u wushaji nan ukissi. Tago woro ko i nikana a bi bura bu kunku macara mi ituma i caron nan uyiya birwa a Ədǝshǝri, 2 né bi bura bi obezezze ozorano nan utǝra tare, uyisiza anonkeze, nan ubiyǝnlen ma suŋ. 3 I nin wu na igiya ingase Ədǝshǝri garadome. 4 Baka i tin wu na ne ingase anageme se a wa biyǝ ŋe, ŋawa ko ŋa kuna malo ma imu mura eheŋe, ana geme se a wa wara uvunu isanan nan ŋe, 5 konzen ana geme se ŋa wa kuna malo mi ituma i wuma i wa Ədǝshǝri nan agata a simiza sura, 6 nze ŋa ko ŋa rizi eteheŋe - a tin ko iya kursu ŋe a ŋa kunku macara maŋe ne. Igiya ze baka se ŋa na ko ŋa gappa vana Ədǝshǝri nan atta haŋe ŋa nyame imme konzen anyimano. 7 Baka inyaŋa mageme se ma shiji bura be geme se bi rassa a nu, konzen ma yoso titi ti wuma baka ana geme se a wa wuza ituma inyaŋa mame - manze inyaŋa ma wu mura taye asura Ədǝshǝri. 8 Bata ingase e yoso ikana nan titi ti ijaro, a tin mura iyabo anu ni, inyaŋa mame ma nin ze uga a wa wu na mame anu. Aza amaro a dishi. 9 Bata woro na nǝrǝ igara nan tegogora te ti wuma, ano tubarsa, tegogoro ti epe tu kassa, ko se i buki nanna. 10 Baka Ədǝshǝri da ma ononpore ne se ma nin wapi nan tegogoro ti wuma se ina wuza konzen nan tubarsa te geme se ina biza aza rija reme. Baka se ina wuza anu gara nan me ituma nŋin geme i da a wuzo hoŋe me. 11 Woro tubarsa tedo tenze da kuwavi nin biza umuntǝna iri ovento a ka massa me, baka unbinja ti ru ti itǝndǝsi. 12 Igiya ze da tago i cikǝ ano madoro ne, ama di woze uga ana geme se baka uyiya birwa be ŋe nan umuntǝnǝ ŋa na mura ruma regeme se ana buki. 13 Baka uca ogeme se Ədǝshǝri nya Abraham remeloa reme, Ma nin tonozo nan retǝ reme, tun si Ma da min nan uyyu nagata se Ma nin tono nanno ne. 14 Ma go, "suŋ ze In nin nyai taya ton, konzen In nin we u vatǝnu ganka." 15 Uruna ugiya ze Abraham wa mura emegeme se a wa go a nin nyame se ma wa mutǝnǝ ma pa. 16 Baka ano tonozo nan emegeme se i kira ŋe, a massa kuyya magita ma ŋe, otono cikǝ imu garra. 17 Inga Ədǝshǝri go ma nin biza anu wushu imu mura heme a filli, imu nyaka e heme, se imu barso home tazen ucuwala ne, Ma wa garra nanno nan otono. 18 Ma wa we nane aza tegogoro tu dira ucuwalo te repo - se i ten wu na Ədǝshǝri we npore ne - Woro se i wa suma a ka ara rikassa, i ni mura agata a birwa di mantǝ kima itǝndǝsi aza uyiya birwa se a wa beze do. 19 Woro zen itǝdǝsi igiya aza unǝrǝ si ruma redo ri ra aruyiya a wuma, itǝndǝsi iwu mura opete anyimi ulu amaro dabile. 20 Yeso na pete aregeme aza unaji o hodo, se ma wa cikǝ uPriest u sǝru u suŋ aza rewuza re Melchizedek.