1 Bakan nane, cikǝ ni anu massa Ədǝshǝri sakama ogeme se Ma barsa abiya. 2 Konzen ngana ni anyimi tubarsa, uga nane se ukase barsa do, enze Ma nyaka retǝ reme a woro, imu nyaka i wuma konzen egemese Ədǝshǝri wa tuzi. 3 Ama anyimǝ haŋi tago e gose epe macara ma akwaro ne né kuyya imi buru, né ubarsa rete baka igiya taze kima ne arere a Ədǝshǝri a sansaŋ. 4 Tago a deke madini, ubǝnu ri lakere, nan ijaji i buru— zale egeme se itaze i wuma ne. Ama, a gose kukwan nan tu nyaka. 5 Baka nŋi nin tore igiya, da oyono macara ma akwaro, onu dira isansan, né onu barsa rete—se eze, u wuza rebere—tin mura ara a tegomo tukase nan Ədǝshǝri. 6 Tago e deke owe gǝnli ŋi nan agangan a wǝ ni, baka aza tegogoro tigiya tenze u cara puru Ədǝshǝri ra tunu aza abiya awu ta kunanu. 7 Bakan nane, tago i gurate nan ŋe ne. 8 Baka nŋi wara mǝri, wagiya ŋi ze sansan anyimi Acoo. Nyana ni uga abiya a sansaŋ, 9 (baka iburi i sansaŋ ira anyimi riwuza ri wuma, ribiu ri wuma, nan magangaŋ) 10 konzen, giŋara emegeme se Acoo barsa. 11 Tago i pete anyimi riwza ri itutma mǝri ni, baka nane ze u pǝrisi ŋi. 12 Baka ezen mme ko se abuki emegeme se ŋa wa wuzuza a gorkono. 13 Bata uca ogeme se kuyyiya wonko isansaŋ i ura, a nin nǝrǝ wǝŋ. 14 Baka kusun emegeme se i wonko wǝŋ eze i sansan. Aza nane, u gusa, "zimani, nŋi anonro, yira ni asuru anu wiju, da ukase kasa ŋale ŋale aza haŋi." 15 Suka na aji di ni ucikǝ u huŋi—dan uga anu dira rekese ne, bata uga ano rekese. 16 Cikǝ ni kima baka tenŋwe teme ti buru tenze. 17 Bakan nane, tago i cikǝ alakere ne, bata di ru emegeme se Acoo barse. 18 Konzen tago i ushiyǝ obere u huŋi kerne ne bakase i nin wuna ŋi a riwuza ri rudangalo. Aza nane, binja ni nan uvunu u sansaŋ, 19 a bǝnun kuwavi anyimi irina elo nan irinu vunu, a gusame nan remelo relo a ka Acoo nan birwa be kweren, 20 kuyyu ca a gusanme kukwan baka zale tegogoro anyimi riyi re Yeso ukase, a waŋa Acowo hodo Ədǝshǝri. 21 I nyamene apuŋa haŋi atǝ haŋi sakama ogeme se ukase wa nyaka. 22 Awai, nyaka atǝ hǝŋi Acakura hǝŋi, uga a Acoo. 23 Baka Acakura manze rete ru Uwai kando ogeme se Ukase manze rete ri akura pate rete, konzen Ukase me manze unu kasodo. 24 Bata uga kando geme se akuru pate rete nyaka rete u Ukase, nane ze konzen Awai nin nyaka retǝ reŋe aAcakura haŋe anyimi kuyyiya. 25 Anarome, Barsa ni Awaiya haŋi, kando geme se Ukase barse anu tarsome. 26 Ukase wa nyaka retǝ reme baka nŋe da ŋa we ŋe sansan, se Ma na kwiji ŋi nan ukwiji manyi taken nlen, 27 da Ma mamara ŋe ŋa wonko a me nan uyisiza, dan nan madini ni né opotono né iyiyabo uga igiya, bata isansaŋ nan udira imu tinza. ̈ 28 Anyimi egeme, Anarome a ŋa barsa Awaiya ŋe uga ripuŋa reŋe. Onu barsa Uwaiyome ma barse retǝ reme. 29 Baka owe tin nyamene retǝ reme ne, ama mamare nan u uwuzanno kima, kando geme se Ukase mamare ma ko ma wuzan akura awu pate rete kima, 30 bakase woro tilu ti ripuŋa teme ze. 31 "Bakan igiya ze ono nen deke acowa me nan ayino me enze agura me a uwaiyo me, nze anka repo nin cikǝ ripun re vento." 32 Magangaŋ mu pate magiya mazen agata—ama in ra bǝnu aza Yeso nan akuru pate rete ze. 33 Aza nane, kuwavi u huŋi konzen i nin barsa Awaiya haŋi uga apuŋa haŋi, konzen uwaime nin gurwǝnǝ o rommome.