¹ Woro ra barsa a ŋi ru, ayeno, aza ogwene uwə Ədəshəri se ana nyaka a churches ti Macedonia. ² Uca rikunuŋa ri cebete a makpai, enze u runtu birwa beŋe nan udira ənyimi tiyan te cebete ŋa zuzu ŋa nyaka cebete nan birwa be vento təndəsi. ³ Baka nane mmi zi ono repo we ŋa nyaka cebete a nane se ŋa date, konzen i wa wake eme geme se ŋa date. ⁴ Konzen e heŋe u nyaka u barsa birwa nan avale derte ŋa vale do baka epe rǝrə ru wara ǝnyimi ituma igiya a ano yiya iruwa. ⁵ A wuza nane dan baka igiya wa ŋuna uga nane se woro wara yisa birwa. Se ita ze nane, Ŋa bura u nya ate a haŋe a waŋa Aco. Enze ŋa nyaka ate a haŋe a woro aza u gara Ədəshəri. ⁶ Woro na vale Titus, se manze ma bura ituma i giya, a ma mase riwuza ri ijai rigiya se mana bura ənyimi əhəŋi. ⁷ Ngase ŋi na gaŋana u ŋuna tegogoro ti ŋuna kima, ənyimi u yiya birwa, nan ubənu, nan u ru, nan zale u nyaka rete konzen ənyimi ti barsa ti ŋi a woro. Baka nane a ŋi gaŋana u wuza ituma ijai igiya. ⁸ Ndan buki i giya uga kake ne, se ita ze nane, na buki igiya dan kunuza dondon ti barsa ti ŋi dan ni u gapana teme nan u ŋuna birwa ba adaŋara ano. ⁹ Ŋi ze nan uru ogwene u Aco o hodo Yeso se manze Ukase. Né baka maa ze nan umura, baka ŋi mə cikə ono tiyan, baka tiyaŋ ŋa teme da ŋi cikə ano u mura. ¹⁰ Ənyimi nlen ma giya Min ra nya u huŋi agaŋgaŋ a geme se anin male ŋi. Riwai re vento se ri na waka, ŋi wa taa ra bura u wuza iyabo base ne, a ŋi barse da wuza eme. ¹¹ Wagiya masa eme, uga birwa nan u barsa u wuza eme rǝnu, irənu ŋi nin masa u wuza me, nane se agata əhəŋi na ka deŋe. ¹² Baka nga ŋi ze nan birwa bi u wuza ri wuza ri giya, eze kima nan imu ka. Inə cikǝ kake aza eme geme se ono ze nan no, dan aza eme geme se ŋŋo damen no ne. ¹³ Isana ri wuza ri giya ri ta reze ne se awe a deke ŋe konzen ŋŋi irənu a ta ŋi u tira. Se ita ze nane, i cikǝ garere. ¹⁴ Konzen eme geme se ŋi ze nanno a nyaŋa wagiya inin bare a sheŋe eme geme se ŋa ra giŋərə mi. Baka konzen eme geme se ŋa ze nanno a nyaŋa wagiya ŋa sheŋi eme geme se enze ŋi ra giŋǝrǝ mi, konzen nane ze inin cikǝ kima. ¹⁵ Eze nane se eze nan udarsa: "Ono ogeme se maze nanno cebete ma ta kerne u barsa eme ne, konzen ono ogeme se ma ze nanno bate ma ta ze nan uyu dira ne." ¹⁶ Enze a goŋ Ədəshəri kukwan, ono ogeme se maa ŋuna ənyimi biruwa bi Titus ri bənzi uga nane se min ze nanno bakaŋ ŋi. ¹⁷ Baka ma taa nyamene u ka eme geme se woro wa saŋare me ne, taken nane ma ŋuna birwa ənu konzen. Ma ra ma nyaŋi imu barsa birwa beme. ¹⁸ Woro na tuma me nan oyeno ono ogeme se a tuŋare me a zale te churches baka ituma e heme u yisun nlen. ¹⁹ Dan baka egeme base ne, konzen baka ti churches ta zake me da ma wuza tano nan woro ənyimi u wuza ituma i giya i ti mala. Igiya zale Baka da a iza Aco nan rete a reme nan u ŋuna birwa be do da a wuza ti mala. ²⁰ Woro ra yisa rekero tago irənu owe me uriwa aza a hado epe telo ti giya se woro na nyaka rete iri izama ənu. ²¹ Woro ra Pəpəi nan u wuza tegoro tegeme se tinin iza do, dan baka Aco base ne, konzen əji ano. ²² Woro konzen ira tuma oyo yeno nan ŋe. Ina dakano a kunuza o home,inə shə u ŋiza o home ituma ma woze ma ta meshe magita ne. Wagiya ma na vəti uru ituma ənu baka itəndəsi e cebete egeme se maze nanno iŋi. ²³ Aza i Titus, emme wano i tuma nan ono ituma e hoŋ a ŋi. A epe ayeno a hado, te churches tenze tina tuma ŋe. Ŋe ano u yiza ze u Ukase. ²⁴ Baka nane beze ŋe ti barsa te, konzen woŋke ti churches eme geme se ina ŋuna se woro ra nikana aza a hai.