¹ Ano ubarsa, ngase woro nə məntə eme geme se ə ətəsə u giya a woro zoro ate a hado ǝsuri a nyimi zale tegogoro te geme se te woze do madini əpuŋ a hado nan uvunu. A woro gaŋana u giŋərə ma saŋsaŋ ənyimi iwi Ədəshəri. ² Mamara do ugura! Woro dan worko owe ne. Woro dan kuna owe kpai ne né woro yizu owe ribiu ni. ³ Na buku igiya dan baka daa ənəri ŋi nan iburu zi ni. Bakase nta naa bura u buku mi nane se ŋi ra woro iruwa, da woro wənə nan ŋi konzen i cikǝ nan ŋi. ⁴ In ze nan itəndəsi cebete iŋi, konzen Mi na tere begesen nan ŋi. Mmi na a binja nan u rənə birwa. Uruntu birwa abon u ra kuŋkuzu baka izalla nan zale eme geme se woro raa wuza me. ⁵ Se woro wa rai a Macedonia, əpuŋ a hado dan vonke ne. Dan nane base ne, a wuza do betoi a kuyyu ulu nan ukara əsuru əkəi konzen o kerkene u giya ənyimmi. ⁶ Bata Ədəshəri, ono ogeme se mə rənə ərəni, Ma rənə do nan o deŋe u Titus. ⁷ I wata a ze baka o deŋe ohome base ne se Ədəshəri wə rəni do ne. I waze take nan urənə ogeme se Titus wa kai əsuru iŋi. Ma buku a woro te goro ti səssəru te geme se ŋi wa woze, e dendeŋ iruwa ihiŋi, nan adodonzo a geten ə həŋi imi. Baka nane Na wuza izalla cebete. ⁸ Utakarda ogome se min wa darse u wa ŋuna ŋi u cara əpuru, ripuŋ ŋa roŋ ra taa wənə nan no ne. Bata ripuŋ ŋa roŋ ra wənə nan no se in wə nəri utakarda o hoŋ u wa ŋuna ŋi i care əpuru. I wa care əpuru a timuru bate. ⁹ Wagiya birwa bina runtun, dan baka u nya u huŋi mazina ne, eze baka u cara əpuru əhəŋi na ra nan u gara. Ŋi wa ru riwuza ri wuma nan u cara əpuru, baka nane u shǝ kpai dan nan u dira baka woro ne. ¹⁰ Baka riwuza ri wuma u ucara əpuru u na ra nan u gara me se onze umura ri kase se rita ze nan taa go nə ru ni. U cara əpuru masano, né inni, u rase aza uwənə zi. ¹¹ Nərə isana o kerne remo rigiya se riwuza ri wuma u cara əpuru rina wuza iŋi. Inni zi o kerne remo ri waze ənyimi əhəŋi da re beze ŋi se ŋi wata ru ni. Inni zi o kerne u cara əpuru u huŋi, iwi ihiŋi, e cenene i hiŋi, i gwazaran ihiŋi, nan u barsa u huŋi da ŋi nəri se ana wuza magaŋgaŋ! A tegogoro cebete ŋi wa beze ate ǝhǝŋi se ŋi ta ru iyabo aza nlen magiya ne. ¹² In wa darse a ra iŋi, In wa ta darsa baka ano ri wuza ri caron ne, né baka ano ageme se ŋa kuna kpai baka ri wuza ri caron ne. In wa darsa baka da magaŋgaŋ ŋa məŋi a woro da a pəni iŋi ulu Ədəshəri. ¹³ Eze baka igiya ze woro ze təndəsi. A gura nan urənə o hodo, woro konzen iwa wuza izalla i kira nane baka u runtu birwa bi Titus, bakase uvunu o home wa gaŋana u vətənu bakaŋ ŋi kusun. ¹⁴ Ngase in wa yiza rete ame epe i hiŋi, a ta nyan mme ne. Daa itə cikǝ nane, nane se woro wa buki kusun tegogoro iŋi ti waze gaŋgaŋ ze, itəndəsi e hedo aza əhəŋi epe Titus i wa suri gaŋgaŋ. ¹⁵ Ti barsa ateme iŋi ti bare, nga se ma dunza udutu rete ri kusuŋ uhuŋi, nane se ŋi wa ka me nan iwi nan makira. ¹⁶ Na wuza izalla baka inze nan zale itəndəsi iŋi