¹ Mmi, Paule, rete aron na vale ŋi, nan u dutu rete nan riwuza ri shauwo u Ukase. Inze təndəsi uca ogeme se Min ra ənyimi əhəŋi, konzen enze cenene aza əhəŋi uca ogeme se in damen ŋi. ² Min naa vale ŋi daa, uca ogeme se in ze nan ŋi, in dama barsa dan cikə cenene nan itəndəsi ni. Konzen na dunza Nin cikǝ cenene uca ogeme se na nyamene nan ano gusa ago woro na nikana aza i ripuŋ. ³ Ngase woro ra ŋana a iripuŋ, woro dan butu ukara baka ripuŋ ni. ⁴ Baka tommo ti ukara te do dan ti tare nan ripuŋ tenze ne. Daa ita uga nane, ŋa ze nan agata daa ŋa pose tommo ti gbau. Ti taa ra nan iyabo ne se magita maŋ pore. ⁵ Woro konzen ira wirti kweren imu bare se e yere e tore a magita ma uru Ədəshəri. Woro yita zale adodonzo a re rere a kuri awu tarse Ukase. ⁶ Konzen woro ra cikǝ u pa daa a biza zale ono ridima ro workozo, sasa ngase u tarse me u huŋi u naa binja. ⁷ Nərə eme geme se eze wəŋ əji a hai. Zale ono ogeme se ma ruu se mme ono Ukase ze, a ma dunza rete a reme se uga nane se maze ono Ukase ze, nane ze woro konzen. ⁸ Baka ngase min biiji cebete bate aza agata a hado, se Aco wa nya do da woro piyə ŋi dan da woro ŋuna ŋi i rizi ni, in dama kunan me ne. ⁹ Min dama barsa eme cikǝ se min ra nya u huŋi iwi nan eree e hoŋ ne. ¹⁰ Baka awe go, "Eree e heme eze gbau nan agata, bata unii əji maze lororo. Amelo a hame a ta lo ukuna ne." ¹¹ Deke isana ano ageme ŋa ru se eme geme se woro ze ənyimmi amelo ere e hedo se woro wə dəmənu ni enze egeme se woro ra wuza me ənyimi ituma e hedo uca ogeme se woro ra ageme. ¹² Woro dan yo nan u ŋuna ate a hado ti puru ti puru né a ŋuna ate a hado garere nan ano ageme se ŋa tuŋare ate a haŋe. Bata ngase ŋa gura ate ahaŋe nan adaŋara Konzen nərə əpuŋ a haŋe nan adaŋara, ŋa damen rekese ne. ¹³ Woro, a kuyyu ulu, itan biiji i wake ara me ne. Da a wuza nane, woro ra wuza nane ǝnyimi eme geme se Ədəshəri na goŋ woro, ənyimmi aka deŋe peu ara əhəŋi. ¹⁴ Bakase woro dan wake nan ate a hado se woro wa deŋe nan no iŋi ni. Woron waze ano u bura o deŋe nan nlen mu Ukase peu uga iŋi. ¹⁵ Woro dan biiji i wake ara me ne aza ituma iwa adaŋara. Daa a ŋuna nane, woro na yiya birwa da u yiya birwa biŋi bi bare nane se ara ituma e hedo anin bəku cebete, konzen aregemme ənyimi ara a hame kima. ¹⁶ Woro na yiya birwa aza nane, baka da woro mura i yisun nlen né an nyaŋa ma geme se ma wake məməŋi. Woro tan biiji baka ituma se ana wuza ənyimi ara owe ne. ¹⁷ "Konzen deke ono ogeme se mana biiji, ma biiji ənyimi Aco." ¹⁸ Bakase dan ono ogeme se ma tuŋara rete a reme manze ana gara me ne. Ita ze nane, manze ono ogeme se Aco gare.