1 Ingase owe u huŋi zin magita nan oye, ma tin waŋ nan nlen mame akura awu biyǝ nlen aji unupaŋ, aza ara unu yiya birwa a magangaŋ ne? 2 Nŋi tǝ ru se unu yiya birwa a magangaŋ ze nin biyǝ nlen ma massano ne? Ingase eze, se nŋi nin biyǝ nlen ma massano, iya nin tuna ŋi ubiyǝ nlen ma bateke magiya? 3 Nŋi tǝ ru se i nin biyǝ ma ti malika nẹ? Iyaze nin tuna do ubiyǝ ma massano magiya? 4 Ingase i nin biyǝ nlen ma titiyǝ ti masssano, iyaze wu na ŋi se i yete nlen magiya i ka nya anagemese ŋa damǝ anyimi ana sansan ne a ŋa bi nlen mame? 5 Ina buki ŋi igiya aza imme maŋi. Owe dawa anyimǝ haŋi si mazin remo ru mamara nlen ma magita anyimi reno ne? 6 Bata gando geme se eze, uyu onu yiya birwa ka waŋ a ru biyǝ nlen aza ono repo u yiya birwa, konzen nlen mame maraji onu dira u yiya birwa! 7 Uguna se magita mara anyimi onu tarse Yeso eze urizi u huŋingeme. Iya nin tuna ŋi u kai makpai mu udangalo owe? Iyaze itin kira i deke a coce ŋi ni? 8 Bata ina dangalo i ko i coce aye se ŋaze renoa riŋi! 9 Nŋi ru si anu dira magangaŋ dawa mura opete a tegomo tǝ Adǝshǝri? Tago igara nan npore ne. Rijama, Rebere, Akwaro udira anya, anarome anakwaro buwu, akwaro a onorome nan onorome né uwai nan uwai, 10 Akari, Ano bishare né ubarsa rete, anu kutarzu obere, Anon pore, Anu gǝllǝ ano nan rikari - owe yoŋe dawa pete anyimi tegomo tǝ Adǝshǝri ni. 11 Nane ze aweya haŋi waze. Ama ana kwiji ŋi, nŋi zi sansan, ana wu na ŋi nane se izi kima a Adǝshǝri anyimi riji ri Aco Yeso unu kassa konzen nan uvunu uwa Adǝshǝri. 12 "I mi koyammo makiri manze," konzen dan koyammo ze i wuma ne. "Koyammo makiri manze i mi," bata iyiyabo tin cikǝ Acakura a han ne. 13 "Imunshu baka apuru zi, konzen apuru baka imunshu zi," bata Adǝshǝri nin massa ŋe. Ripuŋ dan baka akwaro macara ne. Ama, Ripuŋ baka Aco ze, konzen Aco nin nyaka emegeme se ripuŋ ri repe me. 14 Adǝshǝri manze unu yisiza Aco, konzen ma nin yisiza do nan agata a hame. 15 Nŋi tǝ ru si apuŋa haŋi aze rekero ri unu kassa ne? Wagiya i nin yita tekero ti ukassa i ka gura nan akwaro a macara? Tago nane ne nan taya ton! 16 In ŋi tǝ ru si onogeme se ma gura ripuŋ nan unakwaro macara na cikǝ ripuŋ revento nan me ne? Kando geme se imu darsa wa go, "an ka repo nin cikǝ ripuŋ revento." 17 Ama onogeme se ma gura nan Aco ma nin cikǝ uvunu ovento nan me. 18 Suma ni ara makwaro ma macara! kuyya macara mageme se ono woze mara amaro ripuŋ rono renze, ama ono akwaro macara ma wuza macara aza ripuŋa reme. 19 Nŋi tǝ ru si apuŋa haŋi anze akura uvunu isansan ne, ogeme se uranyimǝ haŋi, si iwa mura a Adǝshǝri? Nŋi tǝ ru si i wa tǝ ruza retǝ riŋi ni? 20 Baka awa kwa ŋi nan iru zi. Sakaman nane yisiza Adǝshǝri nan ripuŋa riŋi.