1 Konzen Yeso wa me obezezze o hoŋe a rekero ri udanira, ri yǝyǝgǝ ra ano cebete ŋa liŋəri mi enze ma ka pete o koŋgo mə cikə a rekero ri udanira, zale ano wa ra a rekero ri ugillu mi. 2 Ma bezezze ŋe tegogoro cebete nan u gəmərə, konzen ǝnyimi obezezze o home, eme geme se ma a buki a ŋe i giya. 3 "Kuna, ono avarkon wa suri ma ka bira isana eheme. 4 Se ma a bere, isana me e wa kuŋku u runa, enze i tidi wa rai ŋa tenke e me. 5 Isana me e wa kuŋku aza te pɔɔ, konzen ti ta kerne nan nnyaŋa ne. Ita dakano ne iwa tozo, baka u ta kerne nan nnyaŋa ne. 6 Uca ogeme se oŋmwe nya kpai, o tere e me, konzen baka se ita kerne nan siji ni, enze i wai. 7 Udaŋara isana me i wa kuŋku ǝnyimi ikana. Ikana wa bare i kate isana me, ita mura u wuna ewo ne. 8 Taken nane e wa kuŋku an nyaŋa ma wuma, i wa tozo, i bare enze ewe ewɔɔ, i wa wuna ate- e ewo akuru taro, e ewo akuru tase, e ewo rinu," 9 Nze ma go, "ono ogeme se ma zen tetoŋe ti uKuna, a ma kone!" 10 Uca ogome se Yeso wa ze tenteme, ano a geme se ŋa ze voto nan me nan an ka rikuri ŋa saŋare me aza u gǝmǝrǝ mi. 11 Ma goŋ ŋe, "nŋi awa nyaŋi bira be tegomo tə Ədəshəri. Ano a geme se ŋara əkǝi kweren se nan u gəmərəkun, 12 Nane ze uca ogeme se ŋa nǝrə, ŋa giya ǝ nǝrǝ mi, konzen ŋa ta nii ni, konzen uca ogeme se ŋa kuna, nane ze ŋana kuna, konzen ŋata ru ni, ane ŋanin waŋaro konzen Ədəshəri ita macara maŋe." 13 Enze ma go ŋe, "Ugəmǝrǝ ugiya ŋi ta ru ni? Anin wuna inni zi ŋi ru zale udaŋara agəmərəkun mi? 14 Ono avara me se ma bira isana manze ono ogome se ma bira nlen. 15 Igiya enze egeme se iwa kuŋku aza u runa, ara ageme se a bira nlen ma me, se ŋa kuna ma me, shetan uca ogemme ma rai ma ita nlen ma geme se a bere a ŋe i ruwa. 16 Igiya enze egeme se i wa kuŋku ara zuwa, ano, uca ogeme se ŋa kuna nlen ma me, ŋa kai sasa nan biruwa bi run. 17 Baka se ŋa damen siji ni, enze ŋa mutana a ti muru bate. Ngase bi nyarna nee ma kpai ma yere baka nlen ma me, enze sasa ŋa kurin ta maro. 18 Udaŋara me enze egeme se awa bere ǝnyimi ikana. Ŋa kone nlen ma me, 19 baka a yayau a masano ageme se ǝrǝ gǝllǝ ano, anze u nara nan bishare bi udaŋara te go goro, ti rai te pete a rete reme, konzen ma ta wuna ewo ne. 20 Enze egeme se a gware an nyaŋa ma wuma, ŋanze ano a geme se ŋa kuna nlen ma me ŋa kai ma me, enze ŋa yɔɔ a mura ee-ewo akuru taro, ee-ewo akuru tase, ee-ka rinu i kira egeme se a gware." 21 Yeso goŋ ŋe, "Ŋi ra nan u pitila ǝnyimi u gura da ŋi gubǝri nan opozo nee ŋi biza a garawa ara o tete? Ŋi biza o me enze ŋi tare o me ara u tarsa me. 22 Iyi yabo dǝmǝ nu se ana a gurkuza se a tan ruu ni, konzen iyabo dǝmǝ nu se eze nan u pate se a tan bursu ni. 23 Ono ogeme se ma zen tetoŋe ti u kuna, a ma kone!" 24 Mǝ ǝ buku a ŋe, "Kuna ni kima, nan o gose ogome se u na a gose, nane ze ara gose o hoi me, konzen ara vati o hoi me. 25 Baka se ono ogeme se ma ze nan no, manze anin vati mi mi ǝnu, ono ogeme se ma damen no ne, eme geme se maze nan no ara ka me a gura nan e heme." 26 Ma kuri ma go, " Te gomo tǝ Ədǝshǝri te ze uga ono ogeme se ma suri ma ka bira isana aa nyaŋa. 27 Ma ka tete nan ətitiyǝ ma yere nan atetenmwe, enze isana tozo i barse, mǝ tǝ ru nee inni zi ana wuza ne. 28 Nyaŋa ma ŋiza imu wushu nan rete a reme: Dinka-owellen, bata si kakka, enze ate me ŋone a si kakka se me. 29 Uca ogeme se imu wushu mi na yina enze sasa ma tome ano te koke baka uca u gura imu wushu na deŋe." 30 Konzen ma go, "Iyaze woro nin gura nan te gomo tǝ Ədǝshǝri se ti yinkǝnǝ nan no, nee anin gəmərə inni zi? 31 Aze uga bewo bi mustard se uca ogeme se a bere, benze be wɔɔ be geme se bi kira kusun ewɔɔ i bate. 32 Taken nane, ngase a bira beme, bi bare bi kira titi ti uru ti mi zale, konzen uruza abiya tiiti ti səssərə, daa itidi i tu i piyə ti du a teŋe ǝ nyimi ururu mi." 33 Nan ǝgǝmǝrǝkun cebete uga nane ze ma a biyən nlen ma me a ŋe, nane se ŋanin date ŋa ruu, 34 konzen mə tə buki iyabo a ŋe ne se nan ǝgǝmǝrǝ mi. Bata se ma ze tenteme, mə pǝrsi zale tegoro teme a atuma a hame. 35 Ətiyə a gemme nan uwəru, ma gon ano u tarse o me, "ǝ pǝri u lunnǝ." 36 Ma deke riyǝgǝ ra ano, ŋa yete Yeso nan ŋe, nane se ma a ze, ənyimi okoŋgo. Te te koŋgo ta ze nan ŋe. 37 Enze uvunu bura ka vikana, ekoŋ manyi ka yira e pete o koŋgo me, nze manyi ma ra voto a binja o koŋgo me. 38 Yeso nan rete a reme maze geten a maro o koŋgo, an rɔɔ u cushion. Ŋze ano tarse ome zinza me, a gusa, "Obeze, idama aŋo a birwa se ana ra voto a wiju ni?" 39 Ma yere ma tore, ma jarame uvunu mi, magoŋ ekoŋ manyi ma mi, "Shauwo! Tore!" nze uvunu mi tore, wet. 40 Nze ma goŋ ŋe, "Baka iya ze ŋi na kuna iwi? Izini dan u dira u yiya birwa?" 41 Ŋa binja nan iwi enze ŋa goŋ ate a haŋe, "Əvizi ono u igiya me?, uvunu nan ekoŋ i manyi e kone me!"