Udaraŋa u 3

1 Konzen Yeso ma wame u gura Ədəshəri, oyo ono kaware wara ara me. 2 Awe ənyimi a haŋe ŋa ra a ginǝrǝ uruna ogome se ŋa nin me Yeso, ŋa soke ǝji, ŋa nǝri nee Yeso nin wuna me ma wamo ǝtiyǝ awo o vonke. 3 Yeso goŋ ono kaware ka me, "yira tore a rigiya a zate ǝji kǝvi." 4 Enze Yeso goŋ ano me, "iyu zi kira ətiyə o vonke; a woze i wuma nee awɔɔ?" Enze ŋa cikǝ wete. 5 Enze ma nǝri ŋi nan u caro birwa, nze ma care əpuru baka udira u kunǝnu o hoŋe, nze ma goŋ ono me, "witi u ware o hoi" nze ma witi o me, u ware me wamo. 6 Nze ti Pharisees nan ti Hirudians ŋa suri əkəi, ŋa gura ənu nane se ŋanin wuna Yeso. 7 Enze Yeso suri nan ano u tarse o home ŋa wame udanira, nze ri yǝgǝ ra ano ri tarse me ǝ suru ǝ Galilee. Se ano kone eme geme se ma raa wuza me, ano cebete ŋa rawa ame ǝsuru a Judea, 8 Jeruselem, Idumea, nan ano u suru a Tyre nan Sidon, 9 Baka riyǝgǝ ra ano, nze ma goŋ ano u tarse o me, aa ŋa giŋǝri mi ka kongo, ma some, tago ano shene me ne. 10 Baka ano makwene cebete wara nara u dupa ome. Konzen ano cebete a geme se ŋa ze nan u dira gayan, wa wamo a me. 11 Zale uca ogeme se uvunu u dira sansan, ŋa nəri mi, ŋa gare a nyaŋa nan bekoko a gusa, "Ŋŋo Vana uwǝ Ədəshəri zi," 12 Nze ma wuŋki ŋi te toŋe ma goŋ ŋe tago i bursun a awe Konzen ne. 13 Yeso maa nyana aza ɔwɔɔ, enze ma tisa ano a geme se ma barse, enze ŋa ra ame. 14 Enze ma zake ano rikuri re me (ano ageme se ma gusan ŋe atuma), ŋa cikǝ nan me konzen ma tome ŋe ŋa wame aa yisun nlen ma me, 15 konzen da ŋa mura agata ŋa zuzi uvunu u buru. 16 An ka rikuri re geme se ma zake in giya: Simon, ono ogome se ma nyame riji Peter; 17 James vana u Zebede, konzen Jone u wanome James, ono ogeme se ma a nyame riji Boanerges, enze, a biya bura; 18 nan Anduru, Filibusu, Bartalamawu, Mathew, Tomas, James vana u Alphaeus, Thaddeus, Simon u Zealot, 19 nan Juda Iskariot, ono ogeme se mara rǝsə o home. 20 Enze ma wame ǝtitǝu,Konzen ano cebete ŋa gurna a rame, baka nane Yeso nan ano u tarse o me ŋa ta mura u wǝri u wushu imu wushu ni. 21 Se ano wanome wa kuna nane, ŋa wame da ŋa mee me, baka ŋa guna, "rete ri naa waŋaron me." 22 Nze ano obezezze makiri aa suru a Jeruselem go, "uvunu u Beelzebul na pete me! konzen nan agata a uvunu o boo manze mara a zuzu uvunu mi." 23 Yeso wa tisa ŋe ŋa ra ame nze ma me u gǝmǝrǝ o ŋe nlen, "Anin wuna nni zi shitan zuzi shitan? 24 Ngase te gomo ti warna baka rete a reme, te gomo teme ti tan tore ne. 25 Ngase ǝtitǝu warna baka rete a reme, ǝtitǝu a geme a tan tore ne. 26 Konzen in gase shitan nyamene reta reme nze ma warna, ma tan tore ne, u maso o me na deŋe. 27 An buki ŋi, ono dǝmǝ nu se ma nin pete ǝtitəu ono a gata,ma me u kanka tommo a teme ne, se mǝnǝ bura ma tǝsǝ ono a gata me nze bata manin date ma kanke tommo ta kura a hame. 28 Gaŋgaŋ nǝ buki ŋi, ara ita kweren macara ma ano nan nlen ma bɔɔ ma geme se ŋana biyǝ. 9 Bata ngase ono worko aza u vunu u sansan a dama ita macara ma me ne, baka se mana gǝlǝku a macara ma sun." 30 Yeso wa buki nane ba kase ŋa ra gusa, "Maze nan uvunu u dira sansan." 31 Enze ǝyimi nan ano wanome rai nze ŋa tore ǝkəi. Ŋa tome ame, a tisiza o home nan a gata. 32 Ano wǝrǝ cikǝ pǝtǝrki nan me, nze ŋa gomme, "Ayiyi nan ano wanoye ŋa geme a ginǝrǝ o hoi ə kəi. 33 Enze ma saŋare ŋe, "an nya ze əyinu o hoŋ nan ano wanome a haŋ?" 34 Nze ma waŋaro ma nǝri ano a geme se ŋana liŋəri mi ə cikə, nze ma go, "əyinu o hoŋ nan ano wanome a haŋ ŋanze ano a giya! 35 Ono ogeme se ma wuza eme geme se Ədəshəri ra barsa me, manze ǝyinu o hoŋ nan u wanon".