Udaraŋa u 11

1 Se ŋā ra a Jeruselem, ŋa deŋe voto nan Bethphage nan Bethany, ā owo u Olives, nze Yeso tuma atuma a hame a repo 2 enze ma go ŋe, "wanni ǝnyimi u gwiri a bakana nan woro. Nan o deŋe se ŋi pete, ŋi ra mura ka banan Ka bi kananka be geme se a dawa nyana ǝnu ni. Buzu enze u ra nan beme. 3 Ngase owe goŋ ŋi, 'Baka iya ze ŋi ra wuza imi giya?' Ŋinin go, 'Aco ra barsa be me konzen mara Kursu be me wagiya."' 4 Ŋa dura enze ŋa ka mura bi kananka beme se ǝnǝ tǝsǝ ǝrǝkǝi ǝkǝi a lake nan ū runa, enze ŋa buzi beme. 5 Awe wa ra tore a rame enze ŋa goŋ ŋe, "Iyaze ŋi ra wuza me, se ŋi rǝ buzu bi kananka be geme?" 6 Nze ŋa biyǝ a ŋe uga nane se Yeso wǝ buku a ŋe, enze ano me deke ŋe ŋa dura eme heŋe. 7 nze atuma a hame a repo me rai nan Ka banan ka Ku kananka kome a Yeso enze ma gāre igarenkwa aza me da Yeso ma date ma nya ma ŋanan no. 8 Ano cebete ŋa nasa tommo ateŋe u runa, konzen awe kuŋki segen se geme se ŋa gwarse u ja. 9 Ano a geme se ŋa gǝtǝji nan ano a maro ŋa tarse me ǝ sǝnǝ, "Hosanna! Taye tenze ono ogeme se ma rai ǝnyimi riji ra Aco. 10 " Taye tenze te gomo tu rā ǝ riji ra Acowō do David! Hosanna geten ǝnyimi ǝdǝshǝri!" 11 Enze Yeso pete ǝnyimi Jeruselem konzen ma wame ǝnyimi u gura Ədǝshǝri mǝ liŋǝri mǝ nǝri ku yammo. Wagiya, uca nǝ yi mi, mǝ suri ǝ kǝi ma wame a Bethany nan a tuma a hame ri kuri. 12 Ətiyǝ u tarse me, se ŋā kuri a suru a Bethany, ekomo wa me me. 13 Ə nǝrǝ u pare a yayau u waze nan tuva luku Luku, ma wame ma nǝri irǝnu ma mura iburi ǝnu, se ma deŋe ara me, ma ta mura iyabo ne se tuva, baka se dan uca apare ze ne. 14 Ma bukǝnun ome, "Owe dame a kuru u wushu iburi a ŋo konzen ne." Konzen atuma ahame wa kuna me. 15 Ŋa rawa Jerusalem, enze ŋa pete ugura Ədǝshǝri nze ma me u zuzu ano u rǝsǝ nan ano u quija tommo ǝnyimi u gura Ədǝshəri mi. Ma waŋare ti tabul ta ano u cuwale iru nan tira tu cikǝ ta ano ageme se ŋa rǝsi ti gǝnci. 16 Ma ta deke owe zaki iyabo ma pete mǝ rǝsi ǝnyimi u gura Ədǝshəri ni. 17 Ma bezezze ŋe nze ma go, "Awa ta darsa ne, 'A kura a haŋ ǝrǝ cikǝ a kura o remmo a masano zale ne'? Enze ŋi na ŋuna ame ǝ cikǝ ara u gura te ǝ kǝri." 18 Agomo ti Priest nan ano o bezezze makiri ŋa kuna nane se mǝ buki, enze ŋa giŋari uruna ogome se ŋa nin wuna me. Enze ŋa kuna iwi ye me baka se ano zale ŋa kuna iwi nan isana o bezezze o me. 19 Se ǝtitiyǝ wa ŋuna, ŋa deke ape me. 20 Se ŋa wara atano nan u cunju, ŋa nǝri u pare me nǝ wǝ zale nan si ji simi. 21 Enze Pita donze ma go, "Rabbi, nǝrǝ! U pare ogome se u ti wuna ome ǝnu unǝ wǝ." 22 Yeso gare ŋe me, "Yiya birwa Ədəshəri. 23 Gaŋgaŋ na buki a ŋo nane ono ogeme se ma goŋ owo u giya, 'Yira a rigiya waŋa a mǝnyi,' konzen ngase ma dan meshe magita ǝnyimi birwa beme ne enze ma yiya birwa be me se eme geme se manǝ buku ira ŋuna, nane ze Ədǝshǝri ra ŋuna me. 24 Baka nan nane Na buki ŋi: Zale eme geme se ŋi remmo ǝnu konzen i saŋare, ŋuna birwa se ŋi na ka eme, nane ze inǝ cikǝ e he. 25 Uca ogeme se o tore a remmo, se ŋo nā kuŋku zale macara ma geme se awe na ŋunai me, baka Dada o hoi ogeme se mǝrǝ nyimi ǝdǝshǝri, ma sarke macara mai." 26 27 Enze ŋa rawa Jerusalem konzen. Se Yeso wa ra ŋana ǝnyimi u gura Ədǝshəri, ogomo ti priest, ano obezezze makiri, nan ano a ŋono ŋa ra a me. 28 Ŋa gomme, "Nan iya agata ze u wuza te gogoro ti giya, konzen ǝvizi na nyai a gata u wuza teme?" 29 Yeso goŋ ŋe, "Ra saŋara u huŋi iyabo. Bukum mi konzen mmi rǝ buku mi i ŋi isana agata ageme se ra wuza tegogoro ti giya nanno. 30 Ozoro o Jone, ome waze u suru Ədǝshǝri nē u suru ano? Bukunni i mi." 31 Enze ŋa gurna ŋa bǝnu ŋa meshe magita a ŋe ǝ pu enze ŋa go, "Ngase e go, 'Əsuru ǝdǝshǝri, 'mara guna, 'Baka iya ze ŋi dan gare me ne?' 32 Bata ngase e go, 'Əsuru ano,'... ."Ŋa ra kuna iwi ano, baka se kuwǝvi ru se Jone u tuma ze. 33 Enze ŋa tare Yeso ŋa go, " Woro tǝ ru ni." Enze Yeso goŋ ŋe, "Min dǝmǝ buku mi i ŋi isana agata ageme se mi ra wuza tegogoro ti giya ne."