1 Nze Yeso mē obezezze ohoŋe nan ǝgǝmǝrǝkun, Ma go, "Ono wa wuza ti gita ūru, ma liŋəri nan udərni, konzen mǝ gǝsi rewō ru pirki mǝnyi mī buri titi timi. Mǝ piyǝ ara ri nyaŋa na, nze ma nyaka uru mi ā no rimanti dā ma mǝnti. Nze ma dura ma wuza tāno eneheme. 2 Ma basa, se uca ō woro iburi nā deŋe, enze ma tuma orere o home ā ma wame ā ono rimǝnti ri uru ri mi da ma ka kai iyi iburi mi ā ŋe. 3 Nze ŋa zǝki orere me, ŋa tǝri mi, konzen ŋa Kore me ŋa tā nyame iyabo ne. 4 Konzen ma tome o yo orere me, konzen ŋa ka puluka me rete ŋa wuza me emem me. 5 Ma Ku ma tome owe, enze ŋa ka wuna ono u giya. Ŋa we ano cebete nane, ŋa təri awe Konzen ŋa wuza awe. 6 Mā dan ono vento o gome se ma ra tuma me, Vana ogeme se ma barse. Manze ono u masa me se mā tome a ŋe. Ma go, "Ŋa nin kuna vana ohoŋ." 7 Ano i tuma ūru ŋa goŋ ate ā haŋe, "Manze ka mədəki ə kame. Ra, a mē me, i wɔɔ me, enze uru i buri mi u cikə o hodo." 8 Ŋa zuzi mi tommo, ŋa wɔɔ me,nze ŋa vati mi a maro u darni mi. 9 Baka nane, iyaze ono ūru nin ŋuna? Ono ūru mi rā ra ma woze ano ū məntə ūru iburi mi nze ma nya awe ūru mi. 10 Ŋi dawa bara nlen magita ne? 'Rizuwa regeme se ano u piyə ara ŋā kini, renze ri nə re regoro. 11 Igiya wa suru a Aco ze, konzen eze nan u nyaka iwi əji ā hado."' 12 Ŋa ginəri u runa ō me Yeso, bata ŋa kuna iwi ī riyəgə, baka se ŋanə ru mənə əgəmərəkun a yiya aza a haŋe ze. Enze ŋa deke me ŋa dura ene he 13 Enze ŋa tuma te ti Farisis nan ti Hirudiyans ā me dā ŋa ŋuna me ogero nan agaŋgaŋ. 14 Uca ogeme se ŋa ra, ŋa go nan me, "Ono obezezze, woro ru ŋo ta tarse amaro owe ne, bata ŋo tā beze u barsa rete ǝnyimi ano ne. Ŋo bezezze nlen ma gaŋgaŋ ma ū runa Ədǝshǝri. Eze kima a ŋiza iru in nyaŋa a Caesar nē o'o? Woro ŋiza nē o'o?" 15 Nane Yeso nǝ̄ ru u kisa eboze e heŋe enze ma goŋ ŋe, "Baka iya ze ŋi ra kunuza ohoŋ? Nyanni denarius dan nǝri ome." 16 Ŋa ra ŋa nya Yeso oi. Ma goŋ ŋe, "Ti yikǝnǝ tǝ vi tenze konzen rete rǝ̄ vi renze ri giya?" Ŋa go, "Kesar ze." 17 Yeso go, "Nya ni Kesar eme geme se eze i Kesar, konzen nya ni Ədǝshǝri eme geme se eze iwǝ Ədǝshǝri." Nze ŋa kuna iwi ye me. 18 Nze ti Sadusis, ano ageme se ŋa go u yisizan keze dǝmǝ nu ni, ŋa rawa me ā gusa, 19 "Ono obezezze, Moses wa darse do me, 'Ngase u wanome ōno wi enze ma deke u waiyome, dā vana ne, ono me yete uwai ūwanome me,dā ma mura u wanome me abiya.' 20 Āze nan ano sunare ā reno a reɲe; ono u bura me yete uwai enze ma wi, ma damen vana ne. 21 Enze ono repo yete me konzen ma wi, ma damen vana ne, nane ze ono u taro me. 22 An ka sunare me ŋa tā deke vana ne. UMasa me kweren, onze uwai me mə wi. 23 Ətiyə u yisizan keze, ngase ŋa yere, uwəyə vi zi ma nin cikǝ? Baka zale an ka sunare ā reno a reŋe mə̄ cikə uwaiyo ŋe." 24 Yeso go, "Dan baka nane ze ŋi workozo ne, baka se ŋi tə ru nlen ma me nē agatə Ədəshəri? 25 Baka nga se ŋa yere ə suru āno u wiju, ŋa tā wuza anya nē a nyaka ara anya ne, baka se ŋa ze uga ti maleka tenze ənyimi ədəshəri. 26 Konzen aza ano ageme se ŋa nā wiju, ŋi watā bara ǝnyimi u takarda u Moses, ubukǝnu aza ōmo, nane se Ədəshəri wə buka ame ma go, 'Mizi Ədəshəri a Abraham nan Ədəshəri a Isaac nan Ədəshəri a Jacob'? 27 Mme dan Ədəshəri an keze manze ne, āno ruma renze. Nŋi ra workozo." 28 Ono vento ǝnyimi ano obezezze rai enze ma kone eme geme se ŋa nǝ biyǝ; ma nǝri nane se Yeso na gara ŋe me. Ma saŋare me, "Iya makiri manze ma kira nan a gata kweren?" 29 Yeso gare, "Ma geme se ma kira nan agata ma giya, 'Kuna, Israel, Ədǝshǝri Aco wo do, Aco o vento ze. 30 Kake ŋi nin barsa Aco, Ədəshəri ǝhǝŋi nan zale birwǝ bi ŋi, nan zale ruma ariŋi, nan adodozo ǝhǝŋi kweren, nan kweren a agata ǝhǝŋi.' 31 Makiri mo repo ma me manze ma giya, 'kake se ŋo nā barsa ono u lakoye uga rete a re.' Mai makiri mǝ dǝmǝnu se ma kira ma giya ne." 32 Ono obezezze makiri go, "kima, obeze! Ŋo nā buku gaŋgaŋ se ogo Ədəshəri a vento ze, konzen owe tā ze voton me ne. 33 Ubarsa o home nan zale birwa konzen nan zale uru nan zale agata ye, konzen da ŋo barse ono u lakoye uga rete a re, i kira zale u dishi utira ō megeme se ŋo nā nyaka." 34 Uca ogeme se Yeso nǝri se ma nā gara nan remo, ma gomme, " Ŋo dan yō nan tegomo tǝ Ədəshəri ni. " Əsure egeme, owe tā date ma saŋare Yeso i iyabo konzen ne. 35 Yeso tare, se mā ra abezezze ano ǝnyimi akura Ədǝshǝri; ma go, "Baka iya ze ano obezezze gose Ono u kasa vana David zi? 36 David nan rete a reme, ǝnyimi uvunu u sansan, ma go, 'Aco go nan Acowo hoŋ, cikǝ a bilaiya bon, se na ŋuna ano u nyameno hoi u rako u tara atau,' 37 David nan rete a reme ma gosemme 'Aco,' anin wuna nnizi Ono u kasa ma cikǝ vana David?" Riyǝgǝ ra ano cebete nŋe ā kunuza ome nan birwa bi pau. 38 Ənyimi o bezezze o home Yeso go, "Kuna iwi iwa ano o bezezze makiri, ano ageme se ŋa barse u ŋana ā Simin se yoyyo konzen ŋa barse ā gosen ŋe ko a tura ti jamene 39 konzen, ŋa barse u cikǝ ā tura tu cikǝ ta gomo ā ti kura ta Ədəshəri nan tira ti izalla. 40 Nŋe konzen ā ŋana u kasa ti titau tǝ shii, konzen ŋa dakano ā remmo dā ano nəri. Ano a giya ara nyamene o hoŋe ganŋka." 41 Nze Yeso cikǝ ma gāre me, ara awu yi sa iru ənyimi bida ba akura Ədəshəri; Mme ə nərə ano ā yi sa iru e heŋe ǝnyimi eso. Ano ū mura cebete a yisa iru cebete. 42 Enze ushii, ono tiyan rai ma ŋuna te hafo te repo, te geme se te deŋe u sulai vento. 43 Ma tisa atuma a hame enze ma goŋ ŋe, ushii ono u dira u giya, "Gaŋgaŋ nā buki ŋi, ushii ono ū dira u giya ma nā ŋuna eheme, i kira zale ano ageme se ŋa nā ŋuna e heŋe ǝnyimi eso me. 44 Baka kweren o hoŋe ŋanā nyaka ǝnyimi egeme se ŋa ze nanno cebete ze.