¹ Wagiya owe wərə ənu se a gusanno me Ananias, nan uwai o home Saphira, mə rǝsi udaŋara u ru ohome, ² enze ma gurkuza udaŋara iru i urəsə a ra me (u wai o home konzen ma zen uru mi), enze ma rai nan udaŋara me ma yiya ara a tuma a Yeso. ³ Enze Peter go, "Ananias, baka iyaze shetan na binja birwa a be enze o we Uvunu u Saŋsaŋ empore enze u yiya udaŋara iru iwa ara me? ⁴ Se uwə ruku a dan rəsi ni, u dan ruku o hoi ze ne, konzen amaro se ərəsi, dan ome uwaze o hoi ze ne? Inni zi ŋo na wuza adodonzo enyimi birwa be aza te goro ti giya? Ŋo dan wiya empore ano ne, Ədəshəri zi." ⁵ Nan u kuna agaŋgaŋ a giya, Ananias gare a nyaŋa enze ma wi, enze iwi pete kusun ano a geme se ŋa kuna nane. ⁶ Enze ano maŋina rai ŋa təsi mi, enze ŋa zəki mi ŋa ka wasa me. ⁷ Amaro uga iru i taro, uwai o home pete, nan u dira uru eme geme se ana wuza. ⁸ Peter gomme, "buki imi irənu ŋi nə rəsə uru iru mi nane." Ma go, "aa, nane ze inə rəsə." ⁹ Enze Peter goŋ me, "Eze inni zi se ŋi na gura anu kweren da ŋi kunuza Uvunu u Aco? Nərə, atau a ano ageme se ŋa na wuza ri wase ri Aca kura a hai ərəkəi, ŋanze ə zəkə o hoi ŋa suru nan no." ¹⁰ Aregemme mə rizi atau a hame, mə wə wənə. Se ano maŋina pete, ŋa mura mənə wənə, enze ŋa zəki ŋa suru nan no konzen ŋa ka wasa me a laken Aca kura a hame. ¹¹ Iwi wa pete derte a kusun church me, nan zale ano a geme se ŋa kuna tegogoro ti giya. ¹² Ti runa nan imi wi cebete se a wuza ənyimi ano əsuru a tare ti a tuma Yeso. Ŋa ze kusun ara a vento ənyimi ikimu i Solomon. ¹³ Owe wa ta ze nan birwa bi ugurnan ŋe ne; taken nane, ano wa nǝri ŋi nan məri a maŋe. ¹⁴ Ano u yiya iruwa Aco ǝvərənu, ano cebete ano arome nan awai, ¹⁵ iwa ka deŋe nane se ŋa me uzəsə ano u dira gayaŋ a wan nan ŋe a ti runa nze a lusa ŋe a te peŋe nan ti church, baka ngase Peter muka waka, ururu o home nin dupa awe a haŋe ŋa wamo. ¹⁶ Awe konzen ŋa na ka yira kusun ano cebete əsuru a te pee- pee ti u lake a Jeruselem, a rasa nan ano makwene nan ano ageme se uvunu u buru na pete ŋe, konzen zale o hoŋe ŋa wamo. ¹⁷ Enze ono u sǝru u ti priest yere ma tore, nan kusun ano ageme se ŋa ze nan me (se ŋanze Ano u suru ulu u ti Sadducees); enze ŋa binja nan bi nyarna ¹⁸ ŋa me o meshe atuma a Yeso, a wuza o hoŋe inyan. ¹⁹ Nan ətittiyə u maleka uwa Aco rai ma pəni ti rəkəi ti nyanze teme enze ŋa zuzi ŋi əkəi, ma goŋ ŋe, ²⁰ "Waŋ, tore ni ənyimi u gura Ədəshəri konzen i bii ano zale nlen ma ruma ma yiya." ²¹ Se ŋa kone nane, enze ŋa pete ənyimi u gura Ədəshəri nan u cunju enze ŋa me obezezze. Enze ono u sǝru ti priest ma rai, nan ano ageme se ŋa ze nan me, enze ma tisa u gurna, ano aŋono ano Isreal kusun, da ŋa wame ŋa ra nan atuma Ədəshəri. ²² Konzen ano ageme se ŋa wame ŋa ta a mura ŋe ǝnyimi inyanze me ne, enze ŋa kuru ŋa buki a me, ²³ "Woro na mura inyan me nan u pate konzen ano ri nyaŋana ərəkəi mi, Se woro nə pəni a me, i dan mura owe ənyimmi ni." ²⁴ Wagiya se kaptin uwa kura Ədəshəri nan Ogomo ti priest ŋa a kuna nlen ma giya, iwa waŋara ŋe iruwa aza a haŋe nane se iyaze nin suru ənyimin nlen ma me. ²⁵ Enze owe rai ma goŋ ŋe, "Ano a geme se ŋi ti ŋuna ŋe inyan ŋa gene a tore ənyimi ugura Ədǝshǝri konzen a bezezze ano." ²⁶ Enze u kaptin ma wame nan ano əsəsəru ano tarse o home, enze ma a ra nan ŋe ma kursi ŋi, ŋa ta wuza u kara ne, baka se ŋa kuna iwi irənu ŋa gisi ŋi nan azuwa. ²⁷ Se ŋa ra nan ŋe, enze ŋa reme ŋe əji a ano əsəsəru mi. U priest u səru ma me u jarama a ŋe, ²⁸ a gusa, "I wa bənu iŋi tago i bezezze ano ənyimi riji rigiya ne, ina gamene, ŋi na binja Jerusalem nan obezezze u huŋi, nan u barsa da ŋi rai nan mənyi ma ono u giya aza a hado." ²⁹ Enze Peter nan atuma Yeso ŋa gare, "Woro kake ira kira a kuna Ədəshəri ken nan ano. ³⁰ Ədəshəri a ano Aco a hado wa yiza Yeso, ono ogeme se iwa wuna me, nan u gara ohome u titi. ³¹ Ədəshəri wa yiza me u ware bilai a beme da ma cikǝ vana Ogomo nan Ukase, da nyaka u kawa Ədəshəri a ti Isreal, nan u yita macara maŋe. ³² A wuza tegogoro ti giya nan woro ənu, nane ze uvunu u saŋsaŋ,ono ogeme se Ədəshəri wa nyaka ono u tarse o home." ³³ Se ano u cikǝ u tidara kone nane, enze ŋa kone u cara əburu konzen a nara u wuna atuma a Yeso. ³⁴ Enze uyu Pharisee nan riji Gamaliel, ono obezezze makiri, ono ogeme se ano kweren ŋa wa yiza me, ma yere enze ma buki a da a zuzi atuma a Yeso əkəi bate. ³⁵ Enze ma goŋ ŋe, "Ano Isreal, ra nin iruwa ihiŋi voto nan emegeme se ŋi na yiya da ŋi wuza nan ano a giya. ³⁶ A te timuru se ta wake,Theudas wa yere ǝ biyǝ mai nlen ago mme oyono ze, enze anarome cebete, ǝwǝlǝmu uga sinu si naze, ŋa gurna nan me. A wuna me, konzen kweren ano ageme se ŋa ra tarse o home ŋa sarmo enze a tore da iyabo ne. ³⁷ Amaro ono u giya, Judas u Galilee ma yere ənyimi ti muru ti ubara ano enze ma a wunki awe a maro a hame. Mme konzen ma a wuri, nan zale ano ageme se ŋa tarse me ŋa sarmo. ³⁸ Wagiya na buku iŋi, suru ni u runa ano a giya konzen a deke ŋe eme heŋe, baka ngase ogoro nee ituma igiya iwa ano ze, ara a bishumi. ³⁹ Konzen ngase iwə Ədəshəri zi, ŋi dama date i bishi ŋi ni; irənu ŋi ra barsa ŋi nəri ŋi ru ukara ze nan Ədəshəri." Nane ze ŋa dunkəli ŋi. ⁴⁰ Enze ŋa tisa atuma a Yeso ə nyimmi enze ŋa tǝri ŋi Enze ŋa buki a ŋe tago ŋa kuri ŋa bənu ənyimi riji ri Yeso ne, enze ŋa deke ŋe ŋa dura. ⁴¹ Ŋa deke ano ara u gurna me izalla se ŋana deŋe u shǝ kpai ə nəri do dan iyabo ne baka Riji a reme. ⁴² Amaro me kuyya ətiyə, ənyimi ugura Ədəshəri nan u suru ətitəu ə wəŋə ətitəu, ŋa a wushu ǝji nan obezezze nan u yisu Yeso Se manze Ukase.