¹ Se Peter nan Jone wa ra əbǝnu nan ano, ti priests nan captain u akura Ədǝshǝri nan ti Sadducees ŋa rai a ŋe. ² Ŋa ze nan iruwa wa kerne u wuna o hoŋe denden baka se Peter nan Jone ŋa ra bezezze ano konzen a yisu nlen ənyimi Yeso u yiza əsuru ənyimi ano u wiju. ³ Ŋa meshe ŋa ŋuna ŋe ənyimi nyanze a wame u cunju, baka iwaze nan u wəru zi. ⁴ Enze ano cebete se ŋa kone rituma reme ŋa yiya birwa; konzen ano ageme se ŋa yiya birwa ŋa vətənu ŋa deŋe uga ti guu shibi. ⁵ I wa rai uga nan ŋəru se ano u tarse ŋe, te noŋono nan ano o bezezze wa gurna ənyimi Jerusalem. ⁶ Annas u priest u səru wara rame, nan Caiaphas, nan zale ano a geme se ŋa ze ayeno a u priest u səru mi. ⁷ Uca ogome se ŋa kune Peter nan Jone ənyimi a haŋe, enze ŋa saŋare ŋe, "Nan iya gata nee ənyimi riji rəvi renze, ŋo na wuza igiya?" ⁸ Enze Peter nan u binja nan Uvunu u saŋsaŋ, goŋ ŋe, "Ŋi ano u tarse nan ano, nan anaŋono, ⁹ ngase woro a Kane ara saŋara aza ri wuza ri wuna se ana wuza ono u dira gayaŋ—baka nan iya ze a ŋuna ono u giya ma wamo? ¹⁰ Deke a ŋi ru igiya zale Konzen a wame a ano Isreal zale, se ənyimi riji ri Yeso Ukase u Nazareth, ono ogome se ŋi wa gape, ono ogome se Ədəshəri wa yiza ənyimi ano u wənə— bakan me ze ono u giya a tore a rigiya a bida biŋi mana wamo. ¹¹ Yeso Ukase manze rizuwa re geme se ano u piyǝ ara wa kini renze a ŋuna ri cikǝ ri zuwa re regoro. ¹² Owe ta ze ono ri kase konzen ne, baka nane re riji ri dəmənu ədəshəri se a nyaka a ano konzen baka reme ara mura ri kase kake ne." ¹³ Wagiya se ŋa nǝri itəndəsi i Peter nan Jone, konzen se ŋa ru se nŋe dan iyabo ze ne, ano u dira u ruu iyabo, ŋa kuna iwi, se ŋa rai ŋa ru se Peter nan Jone ŋa ze nan Yeso. ¹⁴ Baka se ŋa nǝri ono ogome se ma wamo a tore nan ŋe, ŋa ta ze nan emegeme se ŋa nin buku iwu nyamene ara aza igiya ne. ¹⁵ Konzen amaro se ŋa mase u buku mi enze ŋa goŋ atuma a Yeso a ŋa deke ara u gurna me, ŋa bənu ənyimi a haŋe. ¹⁶ Ŋa go, "Iyaze woro nin ŋuna nan ano agiya? Nane se ŋa na wuza dondon epe egeme se ə dəwə nəri ni konzen kuwǝvi ono ogome se maze nan u cikǝ a Jeruselem ŋə ru nane; woro tan meshe magita ne. ¹⁷ Konzen da a tuna u pənu nan u yisun nlen a ano ənyimi riji rigiya." ¹⁸ Ŋa tisa Peter nan Jone ə nyimmi enze ŋa buki a ŋe tago ŋa kuri ŋa buki iyabo nee obezezze ənyimi riji re Yeso ne. ¹⁹ Enze Peter nan Jone ŋa gare enze ŋa goŋ ŋe, "Nee eze kima ulu uwə Ədəshəri da a kuna konzen a tarse i hiŋi nee e heme, ə ŋi buki. ²⁰ Woro dama date i tuna ubənu aza tegogoro te geme se woro wə nəri konzen e wa kone ne." ²¹ Se a mase u bənu a Peter nan Jone a ŋa pəpəi, nze ŋa deke ŋe ŋa dura. Ŋa ta mura iyabo egeme se ŋa nin nyaŋe kpai ne, baka se zale ano me wa ra a tuŋara Ədəshəri aza eme geme se ana wuza. ²² Ono ogeme se ma bura ugurna nan ridiya ri u wamo ma kira siwai əkuru naze nan ɔyɔɔ. ²³ Amaro se a nyaŋe rərə, Peter nan Jone ŋa rai a ano a haŋe enze ŋa bii zale eme geme se ogomo ti priest nan ano a ŋono wə biyə a ŋe. ²⁴ Se ŋa kuna nane, enze ŋa yiza amelo a haŋe kweren Ədəshəri enze ŋa go, "Aco, Ŋo ze wa ruza ədəshəri nan anyaŋa nan ti dandale, nan kusun eme geme se ira nyimmi. ²⁵ Ŋo wə bənu ənyimi uvunu u saŋsaŋ ə suru ənu o orere o hoi, aco odo David, 'Baka iya ze nnyaŋa ma ano əpən ma ra a yisiza iruwa, Konzen ano a gose tegogoro te woro?' ²⁶ Ŋo go, 'A gomo annyaŋa ŋa gura ate a haŋe, enze ano u tarsen ŋe ŋa gurna nan bi nyarna aza Aco, konzen aza Ukase o home.' ²⁷ Nane, Herod agura nan Pontius Pilate, a gura nan ano əpən nan ano Isreal, ŋa gurna ara vento ǝnyimi ape agiya baka u nyamene orere u saŋsaŋ u huŋi Yeso, ono ogome se ŋo wa tare me alare. ²⁸ Ŋa gurna ara a vento da ŋa wuza zale eme geme se tərə tiŋi konzen ŋi wuza eme geme se ŋi na yiya əji se ira yonko. ²⁹ Wagiya, Aco, nərə eme geme se ŋa ra biyə mi enze u nya arere a hai agata da ŋa date ŋa biyǝn nlen ŋa mai nan i təndəsi. ³⁰ Witi uware o hoi da a wamo, konzen da a nyaka ti runa nan imi wi ənyimi riji ri orere ohoi u saŋsaŋ Yeso." ³¹ Se ŋa mase be remmo, ara ageme se ŋa gurna ǝnu a wara shokomozo, konzen zale oŋe ŋa binja nan uvunu u saŋsaŋ enze ŋa biyǝ nlen mǝ Ədəshəri təndəsi. ³² Ano cebete ano ageme se ŋa gare ŋa yiya birwa ŋa ze nan be vento nan birwa. Owe dan go eme geme se ma zenan no e heme ze ne, ŋa wuza kuyammo na o sope tare. ³³ Nan a gata a gbau atuma a Yeso wa yisu nlen ə bənu aza u yira u Yeso Aco, konzen ŋa ze nan ijai cebete ənyimi a haŋe kweren. ³⁴ Owe wata dira iyabo ənyimi a haŋe ne, baka zale ano a geme se ŋa ze nan ti-ru a teŋe nee ti titəu ŋa rəsi teme enze ŋa rai nan iru i tegogoro te geme se ŋa rəsi ³⁵ enze ŋa rai ŋa yiya a zate atuma a Yeso, enze ŋa ware kuyya ono a nyame aza eme geme se ma ra a giŋǝrǝ mi ³⁶ Joseph, u levite, ono u suru a Cyprus ono ogome a tuma a Yeso tisiza me Barnabas (se enze Vana u Birwa), ³⁷ mə rəsi uru enze ma rai nan iru mi enze ma yiya a zate atuma a Yeso.