¹ Uca ogeme se ŋa bii se ŋa ra wame o koŋgo a Italy, ŋa ŋuna Paule nan adaŋara ano inyan a tare ti centurion se a gusen me Julius u Imperial Regiment da ma woze rinyaŋana reŋe. ² I wa yete okoŋgo əsuru a Adramyttium, se ŋa ra nara ŋa taa wane o koŋgo tnteŋe a Coast u Asia. Enze I wame udandale. Aristarchus əsuru a Thessalonica ənyimi Macedonia ma wame nan woro. ³ Ətiyə u tarse me i deŋe a ape a Sidon, ara ageme se Julius wa dima nan Paule kima konzen ma deke me ma wame o rene ohome da ŋa mənti mi. ⁴ Əsuru a regeme i wame udandale enze i wame ənyimi Cyprus o koŋgo manyi, ǝliŋərə nnyaŋa a laken Island, bakase uvunu wa kate do. ⁵ Se i wa mase u pəri udandale o koŋgo enze woro a lake u gillu u Cilicia a Myra, ape a Lycia. ⁶ Aregeme ze ono u səru ti suja ma mura o koŋgo əsuru a Alexandria se u wa raa wame a Italy. Ma biza do ənyimi ome. ⁷ Se i wara a tano shauwo timuru cebete enze bata degete ze e deŋe a laken Cnidus, Enze uvunu tuna do daa i vəti taano ənu a wame u ulu ogome, enze i wame u ulu u ruru u Crete, a bakanan Salmone. ⁸ Woro ze wa turki o koŋgo me degete, bata i deŋe a riya se a gosen no Havens, se aze voto nan ape a Lasea. ⁹ Wagiya i na dakano, uca u pətə ənu u ti Jewish konzen una waka, konzen i taa reze a wuza taano okoŋgo ne. Baka nane ze Paule wuŋki ŋi te toŋe, ¹⁰ enze mago, "Ano arome, Nə nərə taano te geme se woro ira nara ita wuza tinin ra do nan makpai nan udira, cebete, dan baka Cargo nan Okoŋgo base ne, konzen baka ruma aredo." ¹¹ Nze u suja u səru mi kira a ruka te toŋe ono u səru nan ono koŋko manyi mame nan tegogoro tegeme se Paule na ware u buku mi. ¹² Baka ara uyisa te koŋgo teme a wata ze kima da rekoze ri mura ŋe ara me ne, ano te koŋko cebete ŋa bənu a ŋa deke ara me, bakase irənu inin ŋuna i ka deŋe ape a Phoenix, a wuza rekoze ageme. Phoenix ara u yisa te koŋgo tenze ǝnyimi Crete, konzen a ra nǝrǝ ulu ǝkǝyǝ aza nan u cunju konzen nan ulu ǝkǝi ǝ dizi nan u cuŋju. ¹³ Uca ogeme se uvunu u ǝdizi ome u piku shauwo, ano u tarse te koŋgo ŋa go ŋana mura emegeme se ŋa ra barsa me. Enze ŋa takare magwaiwa mame ara avento ŋa meshe uruna a waŋa Crete, voto nan ugillu. ¹⁴ Konzen dan nan udakano ne uvunu u suru a hurricane u rai nan agata, se a tisiza ulu ǝkǝi aza nan ucuŋju ome u pankalo hoŋe ǝsuru ǝnyimin nyaŋa ma udandale. ¹⁵ Se uvunu wa mee u takare okoŋgo me, uwa ta date u kuri u tarse ənyimi uvunu mi ni, enze i paa uvunu mi u wake yǝi ome a waŋaro ohodo. ¹⁶ Enze u waŋ nan woro a mai nyaŋa a zate manyi se a gusanno Cauda, ǝnyimi o kerkene degete ze i wa ka suru nan okoŋgo me nan ruma. ¹⁷ Uca ogeme se ŋa zəki okoŋgo u bate ənyimi okoŋgo u səru, ŋa wuza ituma nan simin ŋa təsi amaro riləu ri okoŋgo u səru mi. Ŋa kuna iwi irənu edenden me nin ŋuna ka pete ənyimi ikiki i Syrtis, enze ŋa kashe u tira me ŋa təsi nan magwaiwa Enze ŋa wuŋki. ¹⁸ Baka nane se uvunu wa ra pankalo hodo a wanza əji nan amara ətiyə u tarse me ŋa me u vəti Cargo me əsuru a okoŋgo u səru mi. ¹⁹ Ətiyə u taro me ŋa kuŋki tegogoro ti u mamara okoŋgo u səru mi nan tare a teŋe. ²⁰ Se oŋmwe nan ewewero wa taa tere aza a hado ne timuru cebete, konzen bura bi giya ǝtərsə o hodo, woro wa taa dan birwa bi u guna woro rə suru nan ruma ne. ²¹ Uca ogeme se ŋa wuza taano ŋana yoo imu wushu dəmənu ni, enze Paule here ma tore ənyimi okoŋgo u səru mi ma go, "Ano arome, tago ŋi na kuna e hoŋ, ŋŋi tinin nin wuŋku okoŋgo ǝsuru a Crete ni, daa azene a rai a mura makpai nan udira uyiya ne. ²² Wagiya Na buki ŋi zǝkǝ ni te rome i mǝnti iruwa ihiŋi, bakase owe dəmə wǝnǝ ǝnyimi ahado ne, konzen ara dira te koŋgo tenze base. ²³ Nan ətittiyə ǝŋǝru se a ti wake umaleka Ədəshəri se a me ze na nikana, manze konzen in gurwəzǝnə —umaleka o home o tore a laken me ²⁴ enze o go, 'tago u kuna iwi ni, Paul. Kake se una wame əji Caesar, enze in nəri, Ədəshəri ənyimi telo te teme mana nyai zale ano ageme se ŋa ra okoŋgo nan ŋo.' ²⁵ Baka nane cikə nan ti barsa ta ano! Na gara nan Ədəshəri se ira ŋuna uga nane se a ti buki imi. ²⁶ Konzen inin wǝrkǝ a nyaŋa a te ti gwiri ti ǝnyimi manyi." ²⁷ Se ti tiyǝ bituru nan ti naze tina deŋe, nane se ara wuŋku mi a wame ulu ugiya a wame ulu u ninnǝ konzen a wuza nane ǝnyimi Udandale u Adriatic, nan bi zate bə ǝtitiyǝ ano koŋko me a gusa né ŋana deŋe voto nan maiyen nyaŋa. ²⁸ Ŋa biza resoo geten əmənyi ŋa mura uwitu ti kape ituru e repo; ŋa shenko bate ŋa mura bituru nan shibi. ²⁹ Ŋa kuna iwi tago ŋa wərki ri zuwa ne, enze ŋa duti magwaiwa ma naze əsuru a maro okoŋgo enze ŋa remmo aza u guna ara ra sana sasa. ³⁰ Ano u wuŋku mi wara giŋərə aregemese ŋanin tura okoŋgo me konzen ŋa sope okoŋgoruma ənyimi u dandale, enze ŋa gəta a wuza uga ŋara vəti magwaiwa ǝsuru ubaŋ me. ³¹ Enze Paule goŋ ono u səru ti suja nan ti suja teme, "Se ano agiya nə cikǝ ənyimi okoŋgo me, dan nane ne ŋi dama suru ni". ³² Enze ti suja teme ti gware simin si oKongo nze ŋa deke okoŋgo me dura. ³³ Nan oŋmwe ǝsuru, Paule goŋ ŋe kweren a ŋa wushi imu wushu. Ma go, "Kane ze ǝtiyə a bituru nan ti naze se ŋi tira paa me konzen daa uwishu iyabo; ŋi dan wushi iyabo ne. ³⁴ Baka nane na buki iŋi wara ni imu wushu, baka eze kima iŋi da ŋi cikə nan ruma. Konzen ono vento u huŋi damaa dira né rimin re sete ənyimi sete se reta reme ne." ³⁵ Se ma mase u buku nane, ma yete re borode enze ma goŋ Ədəshəri kukwan əji əkəvi. Enze ma pore re borode reme ma me u wushu mi. ³⁶ Enze zale o hoŋe ǝ bǝnu a ŋe bata enze ŋa wushi imu wushu konzen. ³⁷ Woro waze ano 276 ǝnyimi okoŋgo ogeme. ³⁸ Se ŋa mase u wushu imu wushu ŋana seke, enze ŋa kashe tommo tǝ ǝnyimi okoŋgo teme ŋa kuŋki iyǝu ǝnyimi udandale. ³⁹ Se i da oyere, ŋa taa ru nnyaŋa mame ne, ŋa nǝri ara, manyi manaa liŋəri ŋi, enze ŋa bənu nane se ŋa nin pete ŋa duura ənyimi ome. ⁴⁰ Enze ŋa gwarse magwaiwa mame ŋa kuŋki u dandale. Uca ogomme ze ŋa buzi simin si amaro okoŋgo me konnzen ŋa tǝsi ti pəri te okoŋgo teme baka uvunu; enze ŋa dura ulu ara udano u para rii. ⁴¹ Enze ŋa rai a riya se manyi mu suma maa gurna, enze o koŋgo me ka dupa anyaŋa uwa tore. Ubaŋ u okoŋgo me tore konzen a ta date a shenke ne, enze amaro me ame udarso baka ukara e ekoŋ manyi. ⁴² Emegeme se ti suja teme ta raa barsa u wuza me nze daa ŋa woo ano inyan nane se ŋa tin date ŋa somporo ŋa suri a manyi mame ne. ⁴³ Konzen ono u səru u ti suja teme mara nara u zuzu Paule, enze ma tuna emegeme se ŋana raa barsa u wuza me; enze ma goŋ ano ageme se ŋa ruu uwuza ii a ŋa bura u canko əsuru o koŋgo daa ŋa pəri ulu. ⁴⁴ Bata adaŋara ano me tarse, adaŋara a ti planks, awe konzen a te tommo tə nyimi o koŋgo me. Nane ze aa wuza se zale o hodo wa suri i pəri shammo.