¹ Uca ogeme se a ra nan woro shammo, bata woro ru se nnyaŋa ma zate manyi manze se a gusanno Malta. ² Anon nyaŋa se a gura do nan ŋe dan ano nyaka malo ma bate manze ne, ŋa gura ura bata ŋa gusan woro koo zale, baka esololo bura nan tuyi. ³ Konzen se Paule wa kaŋka rete ri titi enze ma ŋuna ura, enze obome suri baka makpai mu ura, konzen nan teson a rawa me u ware. ⁴ Se anon nyaŋa mame ŋa nǝri se bina potono a ame u ware, ŋa goŋ ate a haŋe, "Ono u giya nane ze kake ma wuza ano mana ka comporo əsuru u dandale manyi, wagiya ano u biyǝn nlen ŋa dan sope me da mə cikə ni." ⁵ Konzen enze ma zərwi beme ənyimi ura me konzen ma ta kuna iyabo ne. ⁶ Ŋŋe a paa o home né tekono tinin nyana me ma me makira né ma rizi mə wənə. Konzen amaro se ŋa na dakano ə nərə o me enze ŋa nǝri iyabo dan mura me ne, enze ŋa cuwale adodonzo a haŋe enze ŋa go ədəshəri zi. ⁷ Wagiya ənyimi a riya voto ara awu ogomo u nnyaŋa ma zate manyi, ono me a gusanno me Publius. Ma kai do konzen ma ŋiza do imu wushu a timuru ti taro. ⁸ Iwa ŋuna se aco Publius ma taze gayan ne nan makwene ma ewereren nan ugwərə. Se Paule wa wame ame, ma ŋuna taye, ma tare taare aza ahame, enze ma wamo. ⁹ Amaro u wuza egeme, adaŋara ano an nyaŋa ma ənyimi udandale manyi se ŋa ta ze gayan ne konzen ŋa ra ŋa wamo. ¹⁰ Ano me konzen ŋa yiza do nan u yisiza o cebete. Uca ogeme se a goro da i kuri okoŋgo, ŋa nyado eme geme se woro barse. ¹¹ Amaro ti bərmə ti taro iwa biza ti sail ənyimi ship ogome se u wa dakano an nyaŋa ma azate mənyi uca ma shammo, u ship u Alexandria, nan "ti ədəshəri ti ibara" se a fape a rete reme. ¹² Amaro se woro wa deŋe ape a Syracuse, iwa ŋuna timuru ti taro a regeme. ¹³ Əsuru a regeme woro pete a ti sail enze i wa deŋe ape a Rhegium. Amaro ətiyǝ avento uvunu uwə dizi ka vikana, ənyimi timuru te repo, woro wa ra ape a Puteoli. ¹⁴ Ageme ze i wa mura re reno se ŋa giŋəri do i cikǝ nan ŋe a timuru sunare. Nane me ze i wa ra a Rome. ¹⁵ Əsuru a regemme, reno se ra kuna epe ehedo, ano usuru a ra ijamane i Appius nan ano a regeme se a gusanno Uwushu Taro. Se Paul wa nərə reno, ma goŋ Ədəshəri kukwan kozen enze a gata me vətənu. ¹⁶ Se i wa pete a Rome, a deke Paule mə cikə tenteme nan ti suja tegeme se ta ra wuza rinyaŋana reme. ¹⁷ Enze i wa ra nane se amaro timuru ti taro Paule wa tisa ŋa gurna ano ageme se ŋa ze ano əsəssəru a nyimi ti Jews. Se ŋa gurna, ma goŋ ŋe, "ayeno, dan ago na wuza awe iyabo i buru zi ni né ri wuza ra ano co ahado, a yitan a nyaka ago ono inyan əsuru a Jeruselem a waŋa ti Roman. ¹⁸ Amaro se ŋa mase u saŋara o hoŋ, enze ŋa gare ŋa zuzun ŋa nyaŋ rərə, bakase iyabo oworko wata rənu se e deŋe u wənə ni. ¹⁹ Konzen se ti Jews tə bǝnu aza eme geme se ŋa barse, i wə cikǝ kake se mmi nin ka mura Caesar, dan ago min waraa nara in ta ra nan agaŋgaŋ aza anon nyaŋa a man ne. ²⁰ Epe u mura o hoi, enze, min wa saŋare dan nẹri daa in bǝnu nan ŋo. Eze baka emegeme se Isreal ze təndəsi aza nane se ana tǝsǝn nan magwaiwa magiya." ²¹ Enze ŋa gomme, "Woro wa taa ka utakarda əsuru a Judea aza hai, né owe ənyimi ayeno na ra ma buki iyabo i buru aza hai ne. ²² Konzen woro ra barsa ita kuna əsuru a ŋo eme geme se ŋo na gose a aŋo a birwa, bakase woro ze nan uru mi se a ku aba arə biyə mi." ²³ Se ŋa yiya oŋmwe o home, ano cebete ŋa ra ame ara ageme se ma tunu ǝnu. Ma biyə ŋi nlen ma me, enze ma bənu aza nane se te gomo tǝ Ədǝshǝri te ze. Ma nare ma ta waŋare ŋe nan epe Yeso, kweren ənyimi Makiri ma Moses nan ma usuru atuma, əsuru nan u cunju a wame nan u wəru. ²⁴ Adaŋara wa gare nan tegogoro te geme se mə buki, konzen a daŋara wata gara ne. ²⁵ Se ŋa taa gara nan ate ahaŋe ne, ŋa dura se Paule wa mase u buku remelo re vento ri giya, "Uvunu u Saŋsaŋ uwa bənu əsuru a Isaiah utuma uwa ano aco əhəŋi. ²⁶ Maa go, 'Wa ni a ano agiya enze ego, "Nan u kunuza me ŋi ra kuna me, konzen ŋi damaa ru mini; konzen ə nərə mi, ŋi dama ru mini. ²⁷ Bakase iruwa ano agiya inə cikǝ lororo, konzen nan tetoŋe a teŋe ŋa ta date ŋa kone ne, konzen ŋa naa pate əji a haŋe. dan nane ne ŋa ta nəri nan əji a haŋe, Konzen ŋa kone nan tetoŋe a teŋe, konzen ŋa ru nan iruwa eheŋe enze ŋa waŋaro konzen, enze bata in ŋuna ŋe ŋa wamo."' ²⁸ Baka nane, a ŋi ru se ri kase rə Ədəshəri a tome nanno a ano əpən, ŋŋe konzen ŋa ra kuna me." ²⁹ (Se ma buki nane, enze ti Jews ta yere a kukkumuzu nan əpun.) ³⁰ Paule wa cikǝ siwai se repo curus ətitəu ageme se ma yete nan iru eheme, konzen ma kase zale ano ageme se ŋa rase a me. ³¹ Ma raa yisu nlen ma tegomo tə Ədəshəri konzen a bezezze tegogoro aza Aco Yeso Ukase nan kweren itǝndǝsi. Owe wa taa tuna me ne.